ଭବାନୀପାଟଣା: ଦିନକୁ ଦିନ ଜିଲ୍ଲାରେ ବୃଦ୍ଧି ପାଉଛି ଚୋରି ଡକାୟତି ଓ ରାହାଜନୀ ଭଳି ଘଟଣା। ଯେଉଁଥିରେ ସାଧାରଣ ଲୋକେ ଭୟଭୀତ ଅବସ୍ଥାରେ ରହୁଛନ୍ତି । କଳାହାଣ୍ଡି ଜିଲ୍ଲା ଗୋଲାମୁଣ୍ଡା ଅଞ୍ଚଳରେ ପ୍ରତ୍ୟେକ ଦିନ ଏଭଳି ଆଇନ ଶୃଙ୍ଖଳା ପରିସ୍ଥିତି ଦେଖା ଦେଉଥିବା ବେଳେ ଏହାକୁ ରୋକିବାରେ ଫେଲ ମାରୁଛି ପୋଲିସ । ଦିନ ଦ୍ବିପହରେ ଆକ୍ରମଣ କରି ଲକ୍ଷାଧିକ ଟଙ୍କା ଲୁଟି ନେଇଛନ୍ତି ଦୁର୍ବୃତ୍ତ । ଫଳରେ ଘରୁ ବାହାରକୁ ବାହାରିବା ପାଇଁ ଲୋକେ ସୁରକ୍ଷିତ ମନେ କରୁନାହାନ୍ତି । ରାତିରେ ଚୋରୀ ଘଟଣା ବୃଦ୍ଧି ପାଉଥିବାରୁ ଲୋକେ ଭୟରେ କଳାତିପାତ କରୁଛନ୍ତି। ପୋଲିସର କାର୍ଯ୍ୟକାରିତା ଉପରେ ଏନେଇ ପ୍ରଶ୍ନ ଉଠାଇଛନ୍ତି ସ୍ଥାନିୟ ବାସିନ୍ଦା ।
ପୋଲିସ ଠିକ ଭାବେ ପେଟ୍ରୋଲିଂ କରୁନଥିବାରୁ ଡ଼କାୟତ ମାନେ ଖୁଲାମଖୁଲା ଡକାୟତି କରୁଥିବା ଅଭିଯୋଗ ହୋଇଛି । ବିଶେଷ କରି ଜିଲ୍ଲାର ଗୋଲାମୁଣ୍ଡା ଅଞ୍ଚଳରେ ପ୍ରତ୍ୟେକ ଦିନ ଚୋରି ଡକାୟତି ଘଟଣା ଘଟୁଛି । ସ୍ଥାନିୟ ବାସିନ୍ଦା ଆଜି(ଶନିବାର) କଳାହାଣ୍ଡି ଏସପିଙ୍କ ନିକଟରେ ଅଭିଯୋଗ କରିଛନ୍ତି । ଗୋଲାମୁଣ୍ଡା ଅଞ୍ଚଳରେ ପୋଲିସ ପାଟ୍ରୋଲିଂ ଜୋରଦାର କରିବା ନିମନ୍ତେ ଏସପିଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି ।
ଇଟିଭି ଭାରତ, କଳାହାଣ୍ଡି
