ନୀତି ଆୟୋଗ ବିତ୍ତୀୟ ସ୍ୱାସ୍ଥ୍ୟ ସୂଚକାଙ୍କରେ ଓଡ଼ିଶା ପ୍ରଥମ, ନବୀନଙ୍କ ସୁଶାସନକୁ ଶ୍ରେୟ ଦେଲା BJD

NITI ଆୟୋଗ ବିତ୍ତୀୟ ସ୍ୱାସ୍ଥ୍ୟ ସୂଚକାଙ୍କକୁ ନେଇ ସନ୍ତୋଷ ବ୍ୟକ୍ତ କଲେ ନବୀନ, ବିଜେପିକୁ ଟାର୍ଗେଟ କଲା ବିଜେଡି

ଭୁବନେଶ୍ୱର: ନୀତି ଆୟୋଗଙ୍କ ବିତ୍ତୀୟ ସ୍ୱାସ୍ଥ୍ୟ ସୂଚୀରେ ଓଡିଶା ପ୍ରଥମ ସ୍ଥାନ ଦଖଲ କରିଛି । ଏନେଇ ନୀତି ଆୟୋଗ ରିପୋର୍ଟ ଜାରୀ କରିବା ପରେ ସୋସିଆଲ ମିଡ଼ିଆରେ ସନ୍ତୋଷବ୍ୟକ୍ତ କରିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେପଟେ ଏହି ସଫଳତା ନବୀନଙ୍କ ସୁଶାସନର ପ୍ରତିଫଳନ ବୋଲି କହିଛି ବିଜେଡି । ରାଜ୍ୟର ଋଣଭାର ହ୍ରାସ ଏବଂ ଶିକ୍ଷା ଓ ସ୍ୱାସ୍ଥ୍ୟର ବିକାଶ ପାଇଁ ରାଜସ୍ୱ ବ୍ୟୟରେ 33.8 ପ୍ରତିଶତ ହାରରେ ବୃଦ୍ଧି ନବୀନଙ୍କ ସଫଳତା ବୋଲି କହିଛନ୍ତି ବିଜେଡି ନେତା ସଂତୃପ୍ତ ମିଶ୍ର । ତେଣୁ ରାଜ୍ୟ ବିଜେପିର ଚବିଶ ବର୍ଷରେ କିଛି ହୋଇନାହିଁ ଉକ୍ତି ଭୁଲ ପ୍ରମାଣିତ ବୋଲି ସେ କହିଛନ୍ତି ।

ଓଡିଶାର ଗର୍ବ ଓ ପ୍ରତିଷ୍ଠାକୁ ବଢ଼େଇଛି ରିପୋର୍ଟ :

ବିଜେଡି ସଭାପତି ନବୀନ ପଟ୍ଟନାୟକଙ୍କ ରାଜନୈତିକ ସଚିବ ସଂତୃପ୍ତ ମିଶ୍ର କହିଛନ୍ତି, "ଆର୍ଥିକ ସୂଚକାଙ୍କ 2025 ସଂକ୍ରାନ୍ତ ନୀତି ଆୟୋଗ ରିପୋର୍ଟ ଓଡିଶାର ଗର୍ବ ଓ ପ୍ରତିଷ୍ଠାକୁ ବଢ଼େଇ ଦେଇଛି । ଦେଶର ବିଭିନ୍ନ ରାଜ୍ୟର 2022/23 ଅର୍ଥନୈତିକ ପରିସ୍ଥିତିର ଅଧ୍ୟୟନ ପରେ ନୀତି ଆୟୋଗ ଏହି ସୂଚୀ ଜାରୀ କରିଛି । ନୀତି ଆୟୋଗଙ୍କ ରିପୋର୍ଟ ଅନୁଯାୟୀ ଓଡ଼ିଶା ଅନ୍ୟ ରାଜ୍ୟମାନଙ୍କୁ ପଛକୁ ଛାଡି ସମଗ୍ର ଦେଶରେ ବିତ୍ତୀୟ ସ୍ୱାସ୍ଥ୍ୟ ସୂଚୀରେ ପ୍ରଥମ ସ୍ଥାନ ଅଧିକାର କରିଛି । ଅନ୍ୟାନ୍ୟ ବିକଶିତ ରାଜ୍ୟ ଓଡିଶା ପଛରେ ରହିଛନ୍ତି । ଏହି ସୂଚୀ ଅନୁଯାୟୀ ଯେଉଁ ରାଜ୍ୟ 50 ପଏଣ୍ଟରୁ ଅଧିକ ରଖିଛନ୍ତି, ସେମାନଙ୍କୁ ନୀତି ଆୟୋଗଙ୍କ ଦ୍ଵାରା ଆଚିଭର ଶ୍ରେଣୀରେ ରଖାଯାଇଛି । ଭାରତବର୍ଷର ମାତ୍ର 6ଟି ରାଜ୍ୟ ଆଚିଭର ଶ୍ରେଣୀରେ ଅଛନ୍ତି । ଓଡିଶା ସେହି 6 ରାଜ୍ୟ ମଧ୍ୟରୁ ଗୋଟେ । ଓଡିଶା ସବୁଠାରୁ ଆଗରେ ରହିଛି ।

ବିତ୍ତୀୟ ଶୃଙ୍ଖଳା ପ୍ରଦର୍ଶନରେ ଓଡିଶା ଉଦାହରଣ:

ନୀତି ଆୟୋଗର ରିପୋର୍ଟ ଅନୁଯାୟୀ, 2014-15ରୁ 2021-22 ପର୍ଯ୍ୟନ୍ତ ଲଗାତର ଭାବେ ଓଡିଶା ପ୍ରଥମ ସ୍ଥାନ ହାସଲ କରିଆସୁଛି । ତେଣୁ ଦୀର୍ଘ ସମୟ ଧରି ବିତ୍ତୀୟ ଶୃଙ୍ଖଳା ପ୍ରଦର୍ଶନ କରିବାରେ ଓଡିଶା ଉଦାହରଣ ସୃଷ୍ଟି କରିଛି । ନୀତି ଆୟୋଗର ମୂଲ୍ୟାଙ୍କନ ଅନୁଯାୟୀ ଓଡିଶା 67.08 ପଏଣ୍ଟ ପାଇ ସବୁଠାରୁ ଆଗରେ ରହିଛି । ଓଡିଶା ପରେ 55.02 ପଏଣ୍ଟରେ ଛତିଶଗଡ଼ ଦ୍ଵିତୀୟ ଓ 53.06 ପଏଣ୍ଟ ପାଇ ଗୋଆ ତୃତୀୟ ସ୍ଥାନରେ ରହିଛି । ଓଡିଶା ଓ ଛତିଶଗଡ଼ ମଧ୍ୟରେ 12 ପଏଣ୍ଟ ବ୍ୟବଧାନ ରହିଛି । ଆର୍ଥିକବର୍ଷ 2022/23 ଅନୁସାରେ ଓଡିଶା ଅନ୍ୟ ରାଜ୍ୟମାନଙ୍କୁ ପଛରେ ଛାଡି ବହୁତ ଆଗକୁ ଯାଇଥିଲେ । ବିକାଶ ମାନଚିତ୍ରରେ ଓଡିଶାଠୁ ଆଗରେ ଥିବା ତାମିଲନାଡୁ, କର୍ଣ୍ଣାଟକ ଓ ହରିୟାଣା ବିତ୍ତୀୟ ଶୃଙ୍ଖଳା କ୍ଷେତ୍ରରେ ଓଡିଶାଠୁ ଢେର ପଛରେ ରହିଛନ୍ତି । ପଞ୍ଜାବ, ପଶ୍ଚିମବଙ୍ଗ ଓ ଆନ୍ଧ୍ରପ୍ରଦେଶ ଏହି କ୍ଷେତ୍ରରେ ସବୁଠାରୁ ପଛରେ ରହିଛନ୍ତି ।

Glad to share that #Odisha has emerged the No-1 state in fiscal management across the country with highest overall fiscal health score of 67.8% in 2022-23, as per the @NITIAayog Fiscal Health Index Report-2025. From financial bankruptcy to number one state in financial health is… pic.twitter.com/45325XQBF6

— Naveen Patnaik (@Naveen_Odisha) January 25, 2025

ଲଗାତାର ଭାବେ ହ୍ରାସ ପାଇଛି ବିତ୍ତୀୟ ନିଅଣ୍ଟ:

ନୀତି ଆୟୋଗଙ୍କ ରିପୋର୍ଟ ଅନୁଯାୟୀ, ଓଡିଶା ଋଣ ସୂଚକାଙ୍କରେ 99 ପଏଣ୍ଟ ରହିଛି । ନିୟମିତ ଋଣ ପୈଠ ଓ ଉନ୍ନତ ଋଣ ସ୍ଥିତିରେ 64 ପଏଣ୍ଟ ସହିତ ପ୍ରଥମ ସ୍ଥାନରେ ରହିଛି । ସେହିପରି ଆର୍ଥିକ ଶୃଙ୍ଖଳା କ୍ଷେତ୍ରରେ ଓଡିଶା 54, ବ୍ୟୟର ଗୁଣାତ୍ମକ ମାନରେ 52 ଓ ରାଜସ୍ୱ ସଂଗ୍ରହରେ 69.9 ରହିଛି । ବିତ୍ତୀୟ ନିଅଣ୍ଟରେ ଓଡିଶା ସବୁଠାରୁ ଭଲ ପ୍ରଦର୍ଶନ କରିଛି । ଓଡ଼ିଶାର ବିତ୍ତୀୟ ନିଅଣ୍ଟ ଦେଶର ଅନ୍ୟ ରାଜ୍ୟଙ୍କ ତୁଳନାରେ ସର୍ବନିମ୍ନ ରହିଛି । 2000/01ରେ ଯେତେବେଳେ ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ହୋଇଥିଲେ ସେତେବେଳେ ବିତ୍ତୀୟ ନିଅଣ୍ଟ ରାଜ୍ୟର ମୋଟ ଘରୋଇ ଉତ୍ପାଦର 6.9 ପ୍ରତିଶତ ଥିଲା । ଯାହା ବର୍ଷ 2022/23ରେ 2 ପ୍ରତିଶତରେ ଖସି ଆସିଛି । 2019/20 ଆର୍ଥିକ ବର୍ଷ ପରଠୁ ଲଗାତାର ଭାବେ ଓଡିଶାର ବିତ୍ତୀୟ ନିଅଣ୍ଟ ହ୍ରାସ ପାଇବାରେ ଲାଗିଛି ।

ଓଡ଼ିଶାର ଖଣି ରାଜସ୍ୱ ଚମକପ୍ରଦ ଭାବେ ବୃଦ୍ଧି :
ସେହିପରି ରାଜ୍ୟର ରାଜସ୍ୱ ସଂଗ୍ରହରେ ପ୍ରଗତି ଘଟିଛି । 2018/19ରୁ 2022/23 ମଧ୍ୟରେ ଓଡ଼ିଶାର ଖଣି ରାଜସ୍ୱ ଚମକପ୍ରଦ ଭାବେ ବୃଦ୍ଧି ପାଇଛି । 4 ବର୍ଷ ତଳେ ରାଜ୍ୟର ମୋଟ ଘରୋଇ ଉତ୍ପାଦନର ଏହି ଆୟ 2.9 ପ୍ରତିଶତ ଥିଲା । ଯାହା 2022-23 ବେଳକୁ 5.6 ପ୍ରତିଶତକୁ ବୃଦ୍ଧି ପାଇଛି । ସେହିପରି ବଜେଟର ଅର୍ଥ ଖର୍ଚ୍ଚ ମାନରେ ଓଡିଶା 52 ପଏଣ୍ଟ ସହ ପ୍ରଥମ 4ଟି ରାଜ୍ୟ ମଧ୍ୟରେ ରହିଛି । 2018/19ରୁ 2022/23 ମଧ୍ୟରେ ଓଡ଼ିଶାର ରାଜସ୍ୱ ବ୍ୟୟ 53.5 ପ୍ରତିଶତ ଓ ପୁଞ୍ଜି ବ୍ୟୟ 42 ପ୍ରତିଶତ ବୃଦ୍ଧି ପାଇଛି । ରାଜ୍ୟର ରାଜସ୍ୱ ବ୍ୟୟ ହାରାହାରି 9.2 ପ୍ରତିଶତ ହାରରେ ବୃଦ୍ଧି ପାଇଛି । 2020/22 ମଧ୍ୟରେ ରାଜ୍ୟରେ ସ୍ୱାସ୍ଥ୍ୟ ଓ ଶିକ୍ଷା କ୍ଷେତ୍ରରେ ରାଜସ୍ୱ ବ୍ୟୟ 33.8 ପ୍ରତିଶତ ହାରରେ ବୃଦ୍ଧି ପାଇଛି । ଯାହା ଅନ୍ୟ ରାଜ୍ୟମାନଙ୍କ ତୁଳନାରେ ଢେର ଅଧିକ ।

ବିଜେପି ନେତାଙ୍କ ମନ୍ତବ୍ୟକୁ ଭୁଲ ପ୍ରମାଣିତ କରିଛି ରିପୋର୍ଟ:
ଏଫଆରବିଏମ ଆକ୍ଟ ଗାଇଡଲାଇନ ଅନୁଯାୟୀ, ରାଜ୍ୟର ଋଣ ପରିମାଣ ରାଜ୍ୟର ଜିଏସଡିପିର 25 ପ୍ରତିଶତ ଭିତରେ ରହିବା କଥା । ଯାହା 2018/19ରୁ 2022/23 ଭିତରେ ଓଡ଼ିଶାର 15ରୁ 24 ପ୍ରତିଶତ ଭିତରେ ରହିଛି । ନୀତି ଆୟୋଗଙ୍କ ଦ୍ୱାରା ପ୍ରକାଶିତ ଏହି ରିପୋର୍ଟକୁ ନେଇ ବିଜେଡି, ବିଜେପିକୁ ଟାର୍ଗେଟ କରିଛି । ବିଜେପିର ନେତା ଓ ମନ୍ତ୍ରୀଙ୍କ ଦ୍ୱାରା ବାରମ୍ୱାର ନବୀନଙ୍କ ଶାସନ କାଳରେ କିଛି ହୋଇନାହିଁ ବୋଲି ହେଉଥିବା ପ୍ରଚାର, କେନ୍ଦ୍ର ସରକାରଙ୍କ ସଂସ୍ଥା ନୀତି ଆୟୋଗ ରିପୋର୍ଟ ଭୁଲ ପ୍ରମାଣିତ କରିଛି ବୋଲି ସଂତୃପ୍ତ କହିଛନ୍ତି ।

ନବୀନଙ୍କ ନେତୃତ୍ୱରେ ବଦଳିଛି ଓଡ଼ିଶା ଅର୍ଥନୀତି :
ସଂତୃପ୍ତ ଆହୁରି ମଧ୍ୟ କହିଛନ୍ତି, "ନବୀନ ପଟ୍ଟନାୟକ ରାଜ୍ୟର ଶାସନ ଭାର ଗ୍ରହଣ କରିବା ସମୟରେ ରାଜ୍ୟର ଆର୍ଥିକ ସ୍ଥିତି ଦୟନୀୟ ଥିଲା । ସରକାରୀ କର୍ମଚାରୀଙ୍କୁ ଦରମା ଦେବାକୁ ଓଭରଡ୍ରାଫ୍ଟର ସହାୟତା ନେବାକୁ ପଡୁଥିଲା । ପରେ ରିଜର୍ଭ ବ୍ୟାଙ୍କ ଓଭରଡ୍ରାଫ୍ଟ ଦେବାକୁ ମନା କରି ଦେଇଥିଲା । ନବୀନଙ୍କ ଦୂରଦର୍ଶୀ ନେତୃତ୍ୱ ଯୋଗୁଁ ଓଡିଶାକୁ ନୀତି ଆୟୋଗ ଭଳି କେନ୍ଦ୍ରୀୟ ସଂସ୍ଥାରୁ ପ୍ରଶଂସା ମିଳୁଛି । ନବୀନ ସରକାରଙ୍କ 24 ବର୍ଷର ଶାସନ କାଳରେ ଓଡ଼ିଶାର କିଛି ବିକାଶ ହୋଇନାହିଁ ବୋଲି ଦାବି କରୁଛି ବିଜେପି । ନବୀନ ସରକାରଙ୍କ କାମକୁ ନାମ ଓ ରଙ୍ଗ ପରିବର୍ତ୍ତନ କରୁଥିବା ବିଜେପି ସରକାର ଆଜିର ଏହି ଉପଲବ୍ଧିକୁ ଓଡିଶାବାସୀଙ୍କ ସମ୍ମୁଖରେ ସ୍ୱୀକାର କରିବାର ଆବଶ୍ୟକତା ଅଛି ।"

ଏହାମଧ୍ୟ ପଢନ୍ତୁ...

ନବୀନଙ୍କ ସଫଳତାକୁ ଗୌଣ କରିବାକୁ ଉଦ୍ୟମକୁ ଗ୍ରହଣ କରିବେନି ଲୋକେ :
ସେ ଆହୁରି ମଧ୍ୟ କହିଛନ୍ତି, "ନବୀନ ସରକାର ଦ୍ୱାରା ଆରମ୍ଭ ହୋଇଥିବା 'ମେକ ଇନ ଓଡିଶା' କାର୍ଯ୍ୟକ୍ରମ ମାଧ୍ୟମରେ ଓଡିଶା ବିଶ୍ୱର ପ୍ରତିଷ୍ଠିତ ଶିଳ୍ପ ସଂସ୍ଥାମାନଙ୍କର ଆକର୍ଷଣର କେନ୍ଦ୍ର ପାଲଟିଛି । ନବୀନଙ୍କ ଏହି ଦୂରଦର୍ଶୀ ଉଦ୍ୟମ ପାଇଁ ପୁଞ୍ଜି ନିବେଶ ହାସଲ କରିବା କ୍ଷେତ୍ରରେ ଓଡିଶା 2022ରେ ଦେଶର ତୃତୀୟ, 2023ରେ ଦ୍ୱିତୀୟ ଓ 2024ରେ ଦେଶର ଶ୍ରେଷ୍ଠ ରାଜ୍ୟର ସ୍ଥାନ ହାସଲ କରିଥିଲା । 'ମେକ ଇନ ଓଡିଶା' ନାଁ ପରିବର୍ତ୍ତନ ହୋଇ 'ଉତ୍କର୍ଷ ଓଡିଶା' ହୋଇଛି । ନବୀନଙ୍କ ସମୟରେ ଓଡିଶା ହାସଲ କରିଥିବା ସଫଳତାକୁ ରାଜନୀତି ଉଦ୍ଦେଶ୍ୟରେ ଗୌଣ କରିବା ପାଇଁ ବିଜେପିର ଉଦ୍ୟମକୁ ଓଡିଶାବାସୀ ଗ୍ରହଣ କରିବେ ନାହିଁ ।"

ଇଟିଭି ଭାରତ, ଭୁବନେଶ୍ୱର