ଭବାନୀପାଟଣା: ଗ୍ରୀଷ୍ମରେ ସାରା ଜଗତ ତ୍ରାହି ତ୍ରାହି ଡାକୁ ଥିବାବେଳେ ପ୍ରଚଣ୍ଡ ରୌଦ୍ରତାପକୁ ଅଟ୍ଟହାସ୍ୟ କରୁଛି କୃଷ୍ଣଚୂଡା । ସମସ୍ତଙ୍କୁ ଅସହ୍ୟ ଗରମ କଲବଲ କରିଥିବାବେଳେ ନିଜର ସୌନ୍ଦର୍ଯ୍ୟରେ ବିମୋହିତ କରୁଛି କୃଷ୍ଣଚୂଡା । କଳାହାଣ୍ଡିର ରାଜରାସ୍ତାରେ ନୂଆବୋହୂ ସାଜି ନାଲି ଓଢଣୀ ଢାଙ୍କି ଦେଉଛି କୃଷ୍ଣଚୂଡା ।
କୃଷ୍ଣଚୂଡା ଶିଖାଉଛି ପ୍ରତିକୂଳ ପରିସ୍ଥିତିରେ, ଦୁଃଖ ବିଷାଦରେ ସ୍ଥିତପ୍ରଜ୍ଞ ରହି ଜୀବନ ଜିଇଁବାର ମନ୍ତ୍ର । କଠିନ ଖରାରେ ପଥଚାରୀଙ୍କ ମନରେ ଭରି ଦେଉଛି ଆନନ୍ଦ ଉଲ୍ଲାସ । ଗାଢ଼ ଲାଲ ରଙ୍ଗର ସୌନ୍ଦର୍ଯ୍ୟରେ ଜଗତକୁ ବିମୋହିତ କରୁଛି ଏହି କୃଷ୍ଣଚୂଡା । ଜୀବନର ଝଡଝଞ୍ଜାରେ କିପରି ଖୁସିରେ ବଞ୍ଚିହୁଏ, ଆଧୁନିକ ସମାଜକୁ ପ୍ରେରଣାର ବାର୍ତ୍ତା ଦେଉଛି ଏହି କୃଷ୍ଣଚୂଡା ।
ଏହି କୃଷ୍ଣଚୂଡାକୁ ନେଇ କିଏ କେତେ କଣ ଭାବୁଛନ୍ତି । କିଏ ପ୍ରେମିକାର ଓଢଣୀ ରଙ୍ଗସହ ବର୍ଣ୍ଣନା କରୁଛି ତ ଆଉ କିଏ ପ୍ରେରଣାର ଉତ୍ସ । ରାସ୍ତାଘାଟ ସବୁଠି ବିଛେଇ ଦେଇଛି ତାର ସୌନ୍ଦର୍ଯ୍ୟ । ରୂପରେ ବିମୋହିତ କରୁଛି, ଧୈର୍ଯ୍ୟଭରା ତା' ଜୀବନକୁ ପ୍ରେଣରାଦାୟୀ ସଜେଇଛି । ଯାହାକୁ ଦେଖି କବି, ଭାବୁକ ବିମୋହିତ ହେଉଛି ତ ସାଧାରଣ ପଥିକ ଟିଏ ପ୍ରେରଣା ପାଉଛି । ବାସ୍ତବରେ କୃଷ୍ଣଚୂଡାର ମାନବ ସମାଜ ପାଇଁ ପ୍ରେରଣାଦାୟୀ ନିଶ୍ଚୟ ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
