ଭବାନୀପାଟଣା: ରାଜ୍ୟରେ ମହିଳା ସଶକ୍ତିକରଣ ଉପରେ ଗୁରୁତ୍ବ ଦିଆଯାଉଛି । ମହିଳାଙ୍କ ବିକାଶ ପାଇଁ ଯୋଜନା କରାଯାଇଛି । ଦିନେ ଘରର ଚାରିକାନ୍ଥ ଭିତରେ ଥିବା ମହିଳା ଆଜି ପୁରୁଷଠୁ ଦୁଇ ପାଦ ଆଗରେ ଚାଲୁଛି । ସ୍ବାବଲମ୍ବୀ ହୋଇଛନ୍ତି ଦୁଇ ପଇସା ରୋଜଗାର କରି ପରିବାର ଚଳାଇଛନ୍ତି । ଏ ଦିଗରେ ମହିଳାଙ୍କୁ ବଞ୍ଚିବାର ବାଟ ଦେଖାଇଛି ମିଶନ ଶକ୍ତି । ତେବେ ଭବାନୀପାଟଣା ଠାରେ ଥିବା ନବ ନିର୍ମିତ ବସ ଟର୍ମିନାଲରେ ଜିଲ୍ଲା ପ୍ରଶାସନ ପକ୍ଷରୁ ମିଶନ ଶକ୍ତି କାଫେ ନିର୍ମାଣ କରାଯାଇଥିଲା । ଯାହାର ଗତକାଲି ଉଦଘାଟନ ହୋଇଯାଇଛି ।
ତେବେ ସହରରେ ଥିବା ବସୁନ୍ଧରା ମହାସଂଘର ୪୦ ଜଣ ମହିଳାଙ୍କୁ ନେଇ ଏକ ମିଶନ ଶକ୍ତି କାଫେ ପରିଚାଳନା କରିବା ପାଇଁ ପ୍ରଦାନ କରାଯାଇଛି । ଗତକାଲି ଏହି ନବ ନିର୍ମିତ ମିଶନ ଶକ୍ତି କାଫେକୁ ଜିଲ୍ଲାପାଳ ପି ଅନ୍ୱେଷା ରେଡ୍ଡି ଓ ପୌର ଅଧ୍ୟକ୍ଷା ସଂଯୁକ୍ତା ବେହେରା ଯୋଗ ଦେଇ ଉଦଘାଟନ କରିଛନ୍ତି । ଏଥିସହ କାଫେ ପରିଦର୍ଶନ କରି ମହିଳାମାନଙ୍କ ସହ ଆଲୋଚନା କରିଥିଲେ । ମହିଳା ଉଦ୍ୟୋଗୀଙ୍କ ଉଦ୍ୟମକୁ ପ୍ରଶଂସା କରିବା ସହ ସେମାନଙ୍କୁ ସଫଳତା କରାଇବା ପାଇଁ ଉତ୍ସାହିତ କରିଥିଲେ । ମହିଳାମାନଙ୍କୁ ସେମାନଙ୍କର ନିଜର ବ୍ୟବସାୟ ଆରମ୍ଭ କରିବା ଏବଂ ରୋଜଗାର କରିବାର ସୁଯୋଗ ଯୋଗାଇ ମହିଳାମାନଙ୍କୁ ସଶକ୍ତ କରିବାକୁ ଲକ୍ଷ୍ୟ ରଖାଯାଇଛି ।
ଏହା ମଧ୍ୟ ପଢନ୍ତୁ-ମହିଳା ସଶକ୍ତିକରଣ ପାଇଁ ଆସୁଥିବା ପାଣ୍ଠିରେ ମହାଘୋଟାଲା ହୋଇଛି: ବିଜେପି ମହିଳା ମୋର୍ଚ୍ଚା
ଏନେଇ ଜିଲ୍ଲାପାଳ ପି ଅନ୍ୱେଷା ରେଡ୍ଡି କହିଛନ୍ତି ଯେ, "ବସ ଟର୍ମିନାଲରେ ଯେଉଁ କାଫେ ଥିଲା ତାକୁ ମିଶନ ଶକ୍ତି କାଫେ କରିବାକୁ ଯୋଜନା କରିଥିଲୁ । ଏହା ଦ୍ବାରା ବସୁନ୍ଧରା ମହାସଂଘର ୪୦ ଜଣ ମହିଳା ଏଥିରେ ରୋଜଗାର ପାଇପାରିବେ । ସ୍ବାବଲମ୍ବୀ ହୋଇପାରିବେ ଦୁଇ ପଇସା ରୋଜଗାର କରି ମହିଳାମାନେ । ଏଥିପାଇଁ ମୁଁ ତାଙ୍କୁ ଉତ୍ସାହିତ କରୁଛି । ଆଶା କରୁଛି ଆମ ମିଶନ ଶକ୍ତି କାଫେ ଆଗକୁ ଭଲ ଚାଲିବ । "
ଇଟିଭି ଭାରତ, କଳାହାଣ୍ଡି
