କଳାହାଣ୍ଡି: ଜିଲ୍ଲାର ଥୁଆମୂଳ ରାମପୁର ବ୍ଲକ ଅନ୍ତର୍ଗତ କାଣିଗୁମା ଠାରେ ଦୀର୍ଘବର୍ଷ ଧରି ଏକ ସ୍ବେଚ୍ଛାସେବୀ ଅନୁଷ୍ଠାନ ସ୍ବାସ୍ଥ୍ୟ ସେବା ଯୋଗାଇ ଆସୁଥିଲା। ହେଲେ ଗତ ୧୬ ତାରିଖରେ ଏହି ଡାକ୍ତରଖାନାରେ ଜଣେ ଚିକିତ୍ସାଧୀନ ରୋଗୀ ଙ୍କ ମୃତ୍ୟୁ ପରେ ତାଙ୍କୁ ପରିବାର ଲୋକେ ମୃତଦେହ କୁ ଭାରାରେ ବୋହି ନେଇ ଯାଇଥିଲେ ।
କାରଣ ଏହି ଘରୋଇ ଡାକ୍ତରଖାନାରେ ମୃତଦେହ ନେବାର କୌଣସି ବ୍ୟବସ୍ଥା ନାହିଁ ବୋଲି ପରବର୍ତ୍ତୀ ସମୟରେ ଡାକ୍ତରଖାନା କର୍ତ୍ତୃପକ୍ଷ ସୂଚନା ଦେଇଥିଲେ । ଏହି ଭାରାରେ ମୃତଦେହ ବୁହା ଘଟଣା ସୋସିଆଲ ମିଡିଆ ତଥା ଗଣମାଧ୍ୟମ ରେ ଭାଇରାଲ ହେବା ପରେ ଜିଲ୍ଲା ପ୍ରଶାସନ ଅଞ୍ଚଳବାସୀଙ୍କ ଚିକିତ୍ସା ସୁବିଧା ନିମନ୍ତେ କୌଣସି ବିକଳ୍ପ ବ୍ୟବସ୍ଥା ନକରି ଡାକ୍ତରଖାନା କୁ ୨୩ ତାରିଖରେ ସିଲ କରିଦେଲେ ।
ଡାକ୍ତରଖାନା ବନ୍ଦ ହେବାର ଆଜକୁ ୫ ଦିନ ବିତିଯାଇଛି ଆଉ ଚିକିତ୍ସା ସେବାରୁ ବଞ୍ଚିତ ଅଛନ୍ତି ଅଞ୍ଚଳର ଶତାଧିକ ଆଦିବାସୀ । ଏନେଇ ଅଞ୍ଚଳବାସୀ ତୁରନ୍ତ ଚିକିତ୍ସା ସେବା ଯୋଗାଇଦେବା ପାଇଁ ସିଡିଏମଓ ଓ ଜିଲ୍ଲାପାଳଙ୍କ ଦ୍ବାରସ୍ଥ ହୋଇଥିଲେ ଏବଂ ଆସନ୍ତା ୭ ଦିନ ମଧ୍ୟରେ ସମସ୍ୟାର ସମାଧାନ ନହେଲେ ଲୋକେ ରାଜରାସ୍ତାକୁ ଓହ୍ଲାଇବା ପାଇଁ ଚେତାବନୀ ଦେଇଛନ୍ତି ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
