ନିମ୍ନମାନର ବିଜୁ ଏକ୍ସପ୍ରେସୱେ ନିର୍ମାଣ କାମ, ଉଦଘାଟନ ପୂର୍ବରୁ ଫାଟି ଆଁ

କଳାହାଣ୍ଡି ବିଜୁ ଏକ୍ସପ୍ରେସୱେ ନିର୍ମାଣ କାମ ନିମ୍ନମାନର ହୋଇଥିବା ଅଭିଯୋଗ ହୋଇଛି । ୧୮୨ କୋଟି ଵ୍ୟୟ ଅଟକଳରେ ନିର୍ମିତ ୪ ଲେନ ବିଶିଷ୍ଟ ବିଜୁ ଏକ୍ସପ୍ରେସ ସଡକର ଏପରି କାର୍ଯ୍ୟକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଜିଲ୍ଲାବାସୀ । ଅଧିକ ପଢନ୍ତୁ

ଭବାନୀପାଟଣା: ଆସନ୍ତା ମାର୍ଚ୍ଚ ୫ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଳାହାଣ୍ଡି ଗସ୍ତରେ ଆସି ବିଜୁ ଏକ୍ସପ୍ରେସୱେ ଉଦଘାଟନ କରିବେ । ୧୮୨ କୋଟି ଵ୍ୟୟ ଅଟକଳରେ ନିର୍ମିତ ୪ ଲେନ ବିଶିଷ୍ଟ ବିଜୁ ଏକ୍ସପ୍ରେସ ସଡକ ଜିଲ୍ଲାବାସୀଙ୍କୁ ଭେଟି ଦେବେ ମୁଖ୍ୟମନ୍ତ୍ରୀ । ଦିନକ ପରେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଜନ୍ମ ଜୟନ୍ତୀ । ଏହି ଅବସରରେ ବିଜୁ ଏକ୍ସପ୍ରେସ ସଡକର ଉଦଘାଟନ ହେବ । ମାତ୍ର ଉଦଘାଟନ ପୂର୍ବରୁ ରାସ୍ତା ଫାଟି ଆଁ । ନିମ୍ନମାନର ନିର୍ମାଣକାମ ହୋଇଥିବା ଅଭିଯୋଗ ହୋଇଛି ।

ରାସ୍ତା ନିର୍ମାଣର ଦାୟିତ୍ୱ ନେଇଥିବା ଠିକାଦାର, ରାଜନେତା ଓ ପ୍ରଶାସନିକ ଅଧିକାରୀ ମାନେ ରାତିଦିନ ଏକ କରି ଦେଇଛନ୍ତି । ରାସ୍ତା ନିର୍ମାଣ କାମକୁ ୫ ତାରିଖ ପୂର୍ବରୁ ଶେଷ କରିବା ପାଇଁ ପ୍ରାଣମୂର୍ଚ୍ଛା ଉଦ୍ୟମ ଚାଲିଛି । ତେଣୁ ଯେମିତି ସେମିତି କାମ ହୋଇଥିବା ଅଭିଯୋଗ ଆଣିଛନ୍ତି ସ୍ଥାନୀୟବାସିନ୍ଦା । ପୂର୍ତ୍ତ ବିଭାଗ ଦିନ ରାତି ଏକ କରି ଯୁଦ୍ଧକାଳୀନ ଭିତ୍ତିରେ ରାସ୍ତା ନିର୍ମାଣ ଚାଲିଥିବା ବେଳେ ରାସ୍ତା କାମର ସ୍ଥାୟୀତ୍ୱ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି ।

ରାଉରକେଲା ଠାରୁ ଆମପାଣି ପର୍ଯ୍ୟନ୍ତ ୫୪୬ କିଲୋମିଟର ପର୍ଯ୍ୟନ୍ତ ୪ ଲେନ ବିଶିଷ୍ଟ ବିଜୁ ଏକ୍ସପ୍ରେସ ରାସ୍ତା ନିର୍ମାଣ କରାଯାଉଛି । ଏଥିରେ କୋରାପୁଟ, ନବରଙ୍ଗପୁର, କଳାହାଣ୍ଡି, ନୂଆପଡା, ବରଗଡ଼, ସୁନ୍ଦରଗଡ଼, ସମ୍ବଲପୁର ଝାରସୁଗୁଡା ସମେତ ୮ଟି ଜିଲ୍ଲାକୁ ସଂଯୋଗ କରାଯାଇଛି । ସେଥି ମଧ୍ୟରେ କଳାହାଣ୍ଡି ଜିଲ୍ଲାରେ ୭୧ କିଲୋମିଟର ବିଜୁ ଏକ୍ସପ୍ରେସ ରାସ୍ତା ନିର୍ମାଣ କରାଯାଇଥିବା ବେଳେ ଏଥିରେ ୧୮୨ କୋଟି ଟଙ୍କା ବ୍ୟୟ ବରାଦ କରାଯାଇଛି । ଏହା ଜିଲ୍ଲାର ଆମପାଣି ଠାରୁ ଆରମ୍ଭ କରି ସିନାପାଲି ଭାୟା ଧର୍ମଗଡ଼, ଗୋଲାମୁଣ୍ଡା ରହିଛି । ଏହି ରାସ୍ତା ମଧ୍ୟରେ ୧୧ଟି ଛୋଟ ପୋଲ ଥିବା ବେଳେ ୨ଟି ବଡ଼ ପୋଲ ମଧ୍ୟ ନିର୍ମାଣ କରାଯାଇଛି ।

ରାସ୍ତା ନିର୍ମାଣ ଦିନ ଠାରୁ ଆଜି ପର୍ଯ୍ୟନ୍ତ କୌଣସି ଅଧିକାରୀ କିମ୍ବା ରାଜନେତା କେହି ମଧ୍ୟ ଦିନେ ହେଲେ ତଦାରଖ କରିନାହାନ୍ତି ତେଣୁ ଠିକାଦାର ମନଇଚ୍ଛା କାମ କରୁଛନ୍ତି । ରାଜ୍ୟ ମୁଖିଆ ଆସିବା ଜାଣି ପୂର୍ତ୍ତ ବିଭାଗ ଅଧିକାରୀ ଓ ଯନ୍ତ୍ରୀ ଠାରୁ ଆରମ୍ଭ କରି ନେତା ପର୍ଯ୍ୟନ୍ତ ସମସ୍ତେ ତଦାରଖ କରିବା ପାଇଁ ବାହାରିଛନ୍ତି । ଉଦଘାଟନକୁ ଆଉ ଗୋଟିଏ ଦିନ ବାକି ଥିବା ବେଳେ ରାତିଦିନ ପ୍ରାଣମୂର୍ଚ୍ଛା ଉଦ୍ୟମ କରି ରାସ୍ତା ନିର୍ମାଣ କାମ ଚାଲିଛି । ହେଲେ ଏହି ରାସ୍ତା ନିର୍ମାଣ ଅତି ନିମ୍ନମାନର ହୋଉଥିବା ଅଭିଯୋଗ ହୋଇଛି । ରାସ୍ତାରେ ମଝିରେ ଥିବା ବର୍ଡର ଫାଟି ଆଁ କରିଛି । ସଠିକ ସମୟ ପାଣି ଦିଆଯାଉନାହିଁ । ସଙ୍ଗେ ସଙ୍ଗେ ତିଆରି ତାହା ଉପରେ ରଙ୍ଗ ମରାଯାଉଛି । ନିମ୍ନମାନର କାମ ଯୋଗୁଁ ଏହାର ସ୍ଥାୟୀତ୍ୱ ନେଇ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି । ଯେଉଁମାନେ ଏହି ରାସ୍ତାରେ ନିର୍ଭରଶୀଳ ହେବେ ସେମାନେ ଉଦବେଗ ପ୍ରକାଶ କରିଛନ୍ତି ।

୧୮୨ କୋଟି ଵ୍ୟୟ ଅଟକଳରେ ନିର୍ମିତ ୪ ଲେନ ବିଶିଷ୍ଟ ବିଜୁ ଏକ୍ସପ୍ରେସ ରାସ୍ତାର ଉଦଘାଟନ କରିବେ ମୁଖ୍ୟମନ୍ତ୍ରୀ । ଏହାସହ ପ୍ରାୟ ତିନି କୋଟିରୁ ଉର୍ଦ୍ଧ୍ବ ଟଙ୍କାରେ ନିର୍ମିତ ଧର୍ମଗଡ଼ ସରକାରୀ ବସଷ୍ଟାଣ୍ଡ ଓ ୭ କୋଟି ୮୪ ଲକ୍ଷ ବ୍ୟୟରେ ନିର୍ମିତ ବିଜୁ ପଟ୍ଟନାୟକ ଇଣ୍ଡୋର ଷ୍ଟାଡିୟମ ଲୋକାର୍ପଣ କରିବେ । ଗୋଲାମୁଣ୍ଡାର ବୃନ୍ଦାବହାଲ ଠାରୁ ଆମପାଣି ପର୍ଯ୍ୟନ୍ତ ରୋଡ଼ ସୋ କରିବାର କାର୍ଯ୍ୟକ୍ରମ ଅଛି ।

ଇଟିଭି ଭାରତ, କଳାହାଣ୍ଡି