କଳାହାଣ୍ଡି: 10ଟି ଶ୍ରେଣୀ ପିଲାଙ୍କୁ ପଢାଇବାକୁ 4 ଜଣ ଶିକ୍ଷକ। ଏ ସମସ୍ୟା ଆଜି ବା କାଲିର ନୁହେଁ ଦୀର୍ଘଦିନ ହେବ ଲାଗି ରହିଛି କଳାହାଣ୍ଡି ଜିଲ୍ଲା ଜୟପାଟଣା ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟରେ। ଘନଘନ ଅଭିଯୋଗ ପରେ ବି ଜିଲ୍ଲା ଶିକ୍ଷା ବିଭାଗର କୌଣସି କାର୍ଯ୍ୟାନୁଷ୍ଠାନ ନାହିଁ। ଯାହାଫଳରେ ଅଧିକ ଶିକ୍ଷକ ନିଯୁକ୍ତି ଦାବିକରି ସ୍କୁଲରେ ଗେଟରେ ତାଲା ପକାଇଛନ୍ତି ଅଭିଭାବକ ଓ ଗ୍ରାମବାସୀ।
ସୂଚନା ଅନୁସାରେ, ସାସ୍ତୁଗୁଡା ସ୍କୁଲରେ ମାତ୍ର ୪ ଜଣ ଶିକ୍ଷକ କାର୍ଯ୍ୟରତ ଥିବା ବେଳେ ପ୍ରଥମରୁ ଦଶମ ଶ୍ରେଣୀରେ ୨୭୦ ଜଣ ଛାତ୍ରଛାତ୍ରୀ ଶିକ୍ଷାଲାଭ କରୁଛନ୍ତି। ତେବେ ଅଷ୍ଟମରୁ ଦଶମ ଶ୍ରେଣୀକୁ ପଢ଼ାଇବା ପାଇଁ ଆବଶ୍ୟକ ଶିକ୍ଷକ ନଥିବା ବେଳେ ଜଣେ ମାତ୍ର ବିଜ୍ଞାନ ଶିକ୍ଷକଙ୍କ ଭରସାରେ ପାଠପଢ଼ା ଚାଲିଥିବା ଅଭିଯୋଗ ହୋଇଛି।
ତେବେ ଆଗକୁ ଦଶମ ବୋର୍ଡ଼ ପରୀକ୍ଷା ଥିବାବେଳେ ବିନା ଶିକ୍ଷକରେ କେମିତି ପାଠପଢା ହେବ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହେବା ସହ ପିଲାଙ୍କ ଭବିଷ୍ୟତ ଅନ୍ଧକାରକୁ ଠେଲି ହୋଇଯାଇଛି। ଏବେ ସୁଦ୍ଧା ଆନ୍ଦୋଳନ ସ୍ଥାନରେ କୌଣସି ଅଧିକାରୀ ପହଞ୍ଚି ନାହାଁନ୍ତି।
ତେବେ ଜୟପାଟଣା ଅତିରିକ୍ତ ଶିକ୍ଷା ଅଧିକାରୀ ଆଉ ୨ ଜଣ ଶିକ୍ଷକଙ୍କୁ ଡେପୁଟେସନ କରାଯିବ ବୋଲି ପ୍ରତିଶୃତି ଦେବା ପରେ ବି ଅଭିଭାବକ ଓ ଗ୍ରାମବାସୀ ମାନେ ନିଜ ଜିଦରେ ଅଡ଼ି ବସିଛନ୍ତି।
କଳାହାଣ୍ଡିରୁ ଅଜିତ୍ ସିଂ, ଇଟିଭି ଭାରତ
