ଭବାନୀପାଟଣା: ଲାଞ୍ଚ ନେଇ ଭିଜିଲାନ୍ସ ହାବୁଡ଼ାରେ ପଡ଼ିଲେ ସରକାରୀ ବାବୁ। ନିଜ କାର୍ଯ୍ୟାଳୟର ଅନ୍ୟ ଅଧିକାରୀଙ୍କଠାରୁ ୬୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ମାଡି ବସିଲା ଭିଜିଲାନ୍ସ ବିଭାଗ। କଳାହାଣ୍ଡି ଜିଲ୍ଲା ମୃତ୍ତିକା ସଂରକ୍ଷଣ ଓ ଜଳ ବିଭାଜିକା ଉନ୍ନୟନ ବିଭାଗର ସହକାରୀ ନିର୍ଦ୍ଦେଶକ ଶ୍ୟାମ ସୁନ୍ଦର ବଳ ଜନୈକ ବ୍ୟକ୍ତଙ୍କଠାରୁ ଲାଞ୍ଚ ନେଉଥିଲେ । ଏହି ସମୟରେ ତାଙ୍କୁ ଧରିଛି ଭିଜିଲାନ୍ସ ବିଭାଗ । ଏହାପରେ ତାଙ୍କ କାର୍ଯ୍ୟାଳୟରେ ଚଢ଼ାଉ ଜାରି ରହିଛି ।
ଭିଜିଲାନ୍ସ ବିଭାର ସୂଚନା ଅନୁଯାୟୀ ଲାଞ୍ଚ ନେଇ ଧରା ପଡ଼ିବା ପରେ ସହକାରୀ ନିର୍ଦ୍ଦେଶକ ଶ୍ୟାମ ସୁନ୍ଦର ବଳ ତାଙ୍କର ବେହରାଗୁଡାରେ ଥିବା କାର୍ଯ୍ୟାଳୟରେ ଚଢ଼ାଉ କରିଛି ଭିଜିଲାନ୍ସ । କାର୍ଯ୍ୟରତ ସହକର୍ମୀଙ୍କଠାରୁ ଗତ ସେପ୍ଟେମ୍ବର ଓ ଅକ୍ଟୋବର ମାସରେ ଦରମା ପ୍ରାୟ ୩ ଲକ୍ଷ ଟଙ୍କାର ବିଲ୍ କରାଇ ଦେବା ପାଇଁ ୬୦ ହଜାର ଟଙ୍କା ଲାଞ୍ଚ ମାଗିଥିଲେ ସରକାରୀ ବାବୁ । ସହକର୍ମୀ ଜଣକ ଏହାକୁ ଭିଜିଲାନ୍ସ ବିଭାଗକୁ ଜଣାଇବା ସହ ଅତିରିକ୍ତ ସହକାରୀ ନିର୍ଦ୍ଦେଶକ ଶ୍ୟାମ ସୁନ୍ଦର ବଳଙ୍କ ଦାବି ମୁତାବକ ଟଙ୍କା ଦେଇଥିଲେ । ଭିଜିଲାନ୍ସ ବିଭାଗ ଅଧିକାରୀ ପୂର୍ବ ଯୋଜନା ଅନୁଯାୟୀ ସରକାରୀ ବାବୁ ଟଙ୍କା ନେବା ବେଳେ ମାଡ଼ି ବସିଥିଲେ ।
ଭିଜିଲାନ୍ସ ବିଭାଗ ହାତରେ ଧରା ପଡ଼଼ିବା ପରେ ସହକାରୀ ନିର୍ଦ୍ଦେଶକ ଶ୍ୟାମ ସୁନ୍ଦର ବଳଙ୍କ କାର୍ଯ୍ୟାଳୟରେ ଚଢ଼ାଉ କରି କାଗଜପତ୍ର ଯାଞ୍ଚ ପ୍ରକ୍ରିୟାକୁ ଜାରି ରଖିଥିଲା ଭିଜିଲାନ୍ସ । ଅନ୍ୟପଟେ ସରକାରୀ ବାବୁଙ୍କୁ ଗିରଫ କରି ଭିଜିଲାନ୍ସ କାର୍ଯ୍ୟାଳୟ ରଖି ପଚରାଉଚରା କରୁଛି ଭିଜିଲାନ୍ସ ବିଭାଗ ।
ଇଟିଭି ଭାରତ,କଳାହାଣ୍ଡି
