କଳାହାଣ୍ଡି: ଜାତୀୟ ସ୍ତରରେ ଜୁନାଗଡ ଏନଏସି ପୁରସ୍କୃତ । 'ସ୍ୱଚ୍ଛ ପରିମଳ ଆମ ସହର' ଏହି ସ୍ଲୋଗାନକୁ କଥାରେ ନୁହେଁ କାମରେ କରି ଦେଖାଇଛି ଜୁନାଗଡ ବିଜ୍ଞାପିତ ଅଞ୍ଚଳ ପରିଷଦ । ଯାହାର ଫଳ ସ୍ୱରୂପ ଆଜି ଜାତୀୟ ସ୍ତରରେ ପୁରସ୍କୃତ ହୋଇଛି ଜୁନାଗଡ ସହର । ଏହାକୁ ନେଇ ସହରରେ ଏକ ଭବ୍ୟ ଶୋଭାଯାତ୍ରା ଆୟୋଜିତ ହୋଇଛି ।
୧୪ଟି ଓ୍ବାର୍ଡ ବିଶିଷ୍ଟ ଜୁନାଗଡ଼ରେ ପ୍ରତ୍ୟେକ ୱାର୍ଡରେ ସଫେଇ କର୍ମଚାରୀ ତଥା ସ୍ୱଚ୍ଛ ସାଥି ପ୍ରତ୍ୟେକ ଦିନ ଘରକୁ ଘର ବୁଲି ଅଳିଆ ଆବର୍ଜନା ସଂଗ୍ରହ କରିବା ସହ ଲୋକଙ୍କୁ ସଚେତନ ମଧ୍ୟ କରି ଆସୁଛନ୍ତି । ଜନସାଧାରଣ ମଧ୍ୟ ସଫେଇ କର୍ମଚାରୀଙ୍କ କଥା ମାନି ଅଳିଆ ଆବର୍ଜନାକୁ ଏଣେତେଣେ ନ ଫିଙ୍ଗି ଆବର୍ଜନା ସଂଗ୍ରହ ଗାଡ଼ିରେ ହିଁ ଅଳିଆ ଦେଇଥାନ୍ତି । ଯାହାଦ୍ୱାରା ଜୁନାଗଡ଼ ସହର ଜାତୀୟ ସ୍ତରରେ ପୁରସ୍କୃତ ହୋଇଛି ।
ଦିଲ୍ଲୀର ତାଲକଟୋରା ଷ୍ଟାଡିୟମରେ ସ୍ଵଚ୍ଛ ସର୍ବେକ୍ଷଣ 2022 କାର୍ଯ୍ୟକ୍ରମରେ ପୂର୍ବ ଭାରତର 15ରୁ 25 ହଜାର ଜନସଂଖ୍ୟା ବିଶିଷ୍ଟ ଦୃତ ସଫେଇ ସହର ଭାବେ କଳାହାଣ୍ଡି ଜିଲ୍ଲାର ଜୁନାଗଡ଼ NACକୁ ପୁରସ୍କୃତ କରାଯାଇଛି । ଏହାକୁ ନେଇ ଜୁନାଗଡ଼ବାସୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି । ଏହି ପରିପ୍ରେକ୍ଷୀରେ ଆଜି ଜୁନାଗଡ଼ ଏନଏସି ପକ୍ଷରୁ ସ୍ଥାନୀୟ ସଂସ୍କୃତି ଭବନରୁ NAC କାର୍ଯ୍ୟାଳୟ ପର୍ଯ୍ୟନ୍ତ ଏକ ଭବ୍ୟ ଶୋଭାଯାତ୍ରା ଅନୁଷ୍ଠିତ ହୋଇଛି । ଏଥିରେ ଜୁନାଗଡ଼ ବିଧାୟକ ଦିବ୍ୟ ଶଙ୍କର ମିଶ୍ର, ନଗରପାଳ ମୁକେଶ ଅଗ୍ରୱାଲ, ଉପାଧ୍ୟକ୍ଷା ହିମାଦ୍ରୀ ନାଏକ ସମେତ NACର ସମସ୍ତ କର୍ମଚାରୀ, ସଫେଇ କର୍ମଚାରୀ, ସ୍ୱଚ୍ଛ ସାଥି ସାମିଲ ହୋଇଥିଲେ ।
ଏହା ମଧ୍ୟ ପଢନ୍ତୁ- ଦଶହରାରେ ପାଳିତ ହେଲା ମା' ଭଣ୍ଡାର ଘରେନଙ୍କ ଛତର ଯାତ୍ରା
ଏନେଇ ଜୁନାଗଡ ନଗରପାଳ ମୁକେଶ ଅଗ୍ରୱାଲ କହିଛନ୍ତି, "୨୦୨୨ ସ୍ୱଚ୍ଛ ସର୍ବକ୍ଷେଣ ସର୍ବ ଭାରତୀୟ ସ୍ତରରେ ଜୁନାଗଡ NACକୁ ୧ନମ୍ବର ସହର ଭାବରେ ପୁରସ୍କୃତ କରାଯାଇଛି । ଏଥିପାଇଁ ସମସ୍ତ ସ୍ୱଚ୍ଛ କର୍ମଚାରୀ ଓ ଜୁନାଗଡବାସୀଙ୍କୁ ଏହି ଶ୍ରେୟ ଦେଉଛି ।"
ଇଟିଭି ଭାରତ, କଳାହାଣ୍ଡି
