ଭବାନୀପାଟଣା: କଳାହାଣ୍ଡି ଜିଲ୍ଲାର ଅନ୍ୟତମ ସୁଯୋଗ୍ୟ ସନ୍ତାନ ପୂର୍ବତନ ବାୟୁସେନାର ଅପ୍ରତିଦ୍ବନ୍ଦୀ ଯୋଦ୍ଧା ତଥା ପୂର୍ବତନ ବିଧାୟକ ଅଜିତ ଦାସଙ୍କ ଦେହାନ୍ତ । ଆଜି(ଶୁକ୍ରବାର) ଅପରାହ୍ନ ୪ଟା ୫୦ ମିନିଟରେ ଅଜିତଙ୍କ ବିୟୋଗ ଘଟିଛି । ବିଳାସିନୀ ଦାସ ଓ ଦିବାକର ଦାସଙ୍କ ପ୍ରଥମ ସନ୍ତାନ ଅଜିତ ଦାସ । 1944 ଜାନୁଆରୀ 3 ତାରିଖରେ ସେ ଜନ୍ମଗ୍ରହଣ କରିଥିଲେ ।
ବ୍ରଜମୋହନ ହାଇସ୍କୁଲରୁ ଶିକ୍ଷା ସମାପ୍ତ ପରେ 1967 ରେ ଭାରତୀୟ ବାୟୁସେନାରେ ଯୋଗଦେଇ 12 ବର୍ଷ ଦେଶ ମାତୃକାର ସେବା କରିଥିଲେ । ବାୟୁସେନାରୁ ଅବସର ଗ୍ରହଣ ପରେ ସେ ସମାଜସେବାରେ ନିୟୋଜିତ ହୋଇଥିଲେ । 1990 ମସିହାରେ ଭବାନୀପାଟଣା ସଦର ନିର୍ବାଚନ ମଣ୍ଡଳୀରୁ ବିଧାୟକ ଭାବେ ନିର୍ବାଚିତ ହୋଇଥିଲେ । ଜଣେ ଲୋକପ୍ରିୟ, ସ୍ପଷ୍ଟବାଦୀ ଓ ନିର୍ଭୀକ ବ୍ୟକ୍ତିତ୍ୱ ଅଜିତ ଦାସ ପୂର୍ବତନ କେନ୍ଦ୍ର ମନ୍ତ୍ରୀ ଭକ୍ତଚରଣ ଦାସଙ୍କ ବଡ଼ଭାଇ ମଧ୍ୟ । ତାଙ୍କ ବିୟୋଗରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।
ସେହିପରି ଓଡିଶା ଜର୍ଣ୍ଣାଲିଷ୍ଟ ୟୁନିୟନ କଳାହାଣ୍ଡି ଶାଖା, ଜିଲ୍ଲା ପେଶାଦାର ସାମ୍ବାଦିକ ସଙ୍ଘ, କଳାହାଣ୍ଡି ଜର୍ଣ୍ଣାଲିଷ୍ଟ ୟୁନିୟନ ସମେତ ପୂର୍ବତନ ମନ୍ତ୍ରୀ ରାସ ବିହାରୀ ବେହେରା, ଜଗନ୍ନାଥ ପଟ୍ଟନାୟକ, ପିସିସି ସଭାପତି ନିରଞ୍ଜନ ପଟନାୟକ, ଜୟଦେବ ଜେନା , ଜିଲ୍ଲା କଂଗ୍ରେସ ସଭାପତି ଭାରତ ଭୂଷଣ ବେମାଲ, ଜୟଦେବ ନାଏକ, ରବି ପଟ୍ଟଯୋଶୀ, ମହମ୍ମଦ ଅଲ୍ଲୀ ଖାଁ, ବରିଷ୍ଠ ଆଇନଜୀବୀ ତଥା ସହପାଠୀ ଗିରିଷ ପୁରୋହିତ ପ୍ରମୁଖ ଗଭୀର ଶୋକ ପ୍ରକାଶ କରିଛନ୍ତି ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
