କଳାହାଣ୍ଡି: ରଦ୍ଦ ହୋଇଥିବା ଟୋକନ ପ୍ରଦାନ ଓ ଧାନ ଉଠାଣ ଦାବିରେ ଚାଷୀଙ୍କ ରାସ୍ତାରୋକ । ଧର୍ମଗଡ ବୋଡେନଠାରେ ଏନେଇ ଗୁରୁବାର ଶତାଧିକ ଚାଷୀ କୋକସରା- ଧର୍ମଗଡ ରାସ୍ତା ଅବରୋଧ କରିଥିଲେ । ଫଳରେ ଦୀର୍ଘ ସମୟ ପର୍ଯ୍ୟନ୍ତ ରାସ୍ତାରେ ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା। ଏଥିସହ ଲୋକେ ନାହିଁ ନଥିବା ଅସୁବିଧାର ସମ୍ମୁଖିନ ହୋଇଥିବା ଦେଖିବାକୁ ମିଳିଥିଲା ।
ଚାଷୀମାନଙ୍କ କହିବା ଅନୁସାରେ ନନ୍ଦିଗାଁ ପ୍ୟାକ୍ସ ଉପମଣ୍ଡି ବୋଡେନଠାରେ ସପ୍ତାହକୁ 2 ଦିନ ଧାନ କିଣା ଯାଉଥିବା ବେଳେ ଅନେକ ଚାଷୀଙ୍କ ଧାନ ବିକ୍ରି ହୋଇ ନପାରି ଦାର୍ଘ 15ରୁ 20 ଦିନ ହେବ ଶୀତ କାକରରେ ପଡିରହିଛି । ଯାହାକୁ ଦିନ ରାତି ଜଗି ବସିଛନ୍ତି ଚାଷୀ ।
ଏନେଇ ବିଭାଗୀୟ ଅଧିକାରୀ ତଥା ସିଏସ୍ଓଙ୍କୁ ଜଣାଇଥିବା ବେଳେ ସମସ୍ୟାର ସମାଧାନ ହୋଇନଥିଲା । ଫଳରେ ଚାଷୀକୂଳ ବାଧ୍ୟ ହୋଇ ରାଜରାସ୍ତାକୁ ଓହ୍ଲାଇଥିବା ପ୍ରକାଶ କରିଛନ୍ତି । ତେବେ ବର୍ତ୍ତମାନ ସୁଦ୍ଧା କୌଣସି ଅଧିକାରୀ ପହଞ୍ଚି ନଥିବା ବେଳେ ଆନ୍ଦୋଳନ ଜାରି ରହିଥିବା ଜଣାପଡିଛି ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
