ଭବାନୀପାଟଣା: କେନାଲ ପାଣି ମାଡିଯିବାରୁ ବ୍ୟାପକ ଫସଲ ନଷ୍ଟ । ଧର୍ମଗଡ ବ୍ଳକ ଅନ୍ତର୍ଗତ ତରଂଜା ଗାଁ ଓ ଆଖପାଖ ଅଞ୍ଚଳରେ ଇନ୍ଦ୍ରାବତୀ କେନାଲ ପାଣି ମାଡି ଯାଇ ବ୍ୟାପକ ଫସଲ ନଷ୍ଟ ହୋଇଥିବା ଅଭିଯୋଗ ହୋଇଛି ।
ଏହାକୁ ନେଇ ଚାଷୀଙ୍କ ଚିନ୍ତା ବଢ଼ିଯାଇଛି । ଇନ୍ଦ୍ରାବତୀ କର୍ତ୍ତୃପକ୍ଷଙ୍କ ସୂଚନା ଅନୁଯାୟୀ ଏସବୁ ଅଞ୍ଚଳରେ କେନାଲ ପାଣି ଛଡା ଯିବାର ନିୟମ ନାହିଁ । ତେବେ ଗତକାଲି ହଠାତ ପାଣି ଛଡା ଯିବାରୁ ଚାଷୀ ଫସଲ କରିଥିବା ମୁଗ, ଚଣା, ସମେତ ଟମାଟୋ, ବାଇଗଣ,ତରଭୁଜ ଭଳି ଚାଷ ଜମିରେ ଆଣ୍ଠୁଏ ଲେଖାଏଁ ପାଣି ଜମି ରହିଛି ।
ଏହା ଫଳରେ ଚାଷ ସମ୍ପୂର୍ଣ୍ଣ ନଷ୍ଟ ହେବାର ଆଶଙ୍କା ଦେଖା ଦେଇଛି । ଏ ସମ୍ପର୍କରେ କ୍ଷତିଗ୍ରସ୍ତ ଚାଷୀ ମାନେ ତହସିଲଦାରଙ୍କ ଦ୍ବାରସ୍ଥ ମଧ୍ୟ ହୋଇଛନ୍ତି । ତରଂଜା ଗାଁ ର ପ୍ରାୟ ୩୫ ଜଣ ଚାଷୀଙ୍କ ପ୍ରାୟ ୧୦୦ ଏକରରୁ ଅଧିକ ଚାଷ ନଷ୍ଟ ହୋଇଥିବା ଅଭିଯୋଗ ହୋଇଛି ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ