ଭବାନୀପାଟଣା: ପୁଣି କଳାହାଣ୍ଡିରେ ହାତୀ ଉପଦ୍ରବ ଦେଖିବାକୁ ମିଳିଛି । କଳାହାଣ୍ଡି ଲାଞ୍ଜିଗଡ଼ ବ୍ଲକ କିଡିଙ୍ଗ ଅଞ୍ଚଳରେ ହାତୀ ପଶି ଫସଲ ନଷ୍ଟ କରିବା ସହ ୨ଟି ଘର ଭାଙ୍ଗିଥିବା ଦେଖିବାକୁ ମିଳିଛି ।
ସୂଚନା ଅନୁଯାୟୀ, ଶନିବାର ବିଳମ୍ବିତ ରାତିରେ ଲାଞ୍ଜିଗଡ଼ ରୋଡ଼ କାଚିଲି ଗାଁର ବାହାଦୂର ଶବର ଓ ତାଙ୍କ ସ୍ତ୍ରୀ ଶୋଇଥିଲେ । ସେହି ସମୟରେ ହାତୀ ତାଙ୍କ ଘରର କାନ୍ଥ ଭାଙ୍ଗି ଦେଇଥିଲା। ଫଳରେ ଦୁହେଁ ପଡୋଶୀ ଘରକୁ ଯାଇ ଆଶ୍ରୟ ନେଇଥିଲେ ।
ସେହିପରି ଲାଞ୍ଜିଗଡ଼ ପଞ୍ଚାୟତ ଦୁର୍ଭଟା, କଦମଗୁଡା ପଞ୍ଚାୟତ ପୋଡାପଦର ଅଞ୍ଚଳରେ ମଧ୍ୟ ୨୫ ରୁ ଉର୍ଦ୍ଧ ହାତୀପଲ ୩ ଗୋଟି ଦଳରେ ଭାଗ ହୋଇ ବ୍ୟାପକ କ୍ଷୟକ୍ଷତି କରିଥିବା ଅଭିଯୋଗ ହୋଇଛି। ଏନେଇ ବିଶ୍ୱନାଥପୁର ରେଞ୍ଜର କର୍ମଚାରୀ ହାତୀ ପଲଙ୍କ ଉପରେ ନଜର ରଖିଥିବା ବେଳେ ଘଟଣା ସ୍ଥଳକୁ ଯାଇ କ୍ଷୟକ୍ଷତିର ଆକଳନ କରିଛନ୍ତି ।
କଳାହାଣ୍ଡିରୁ ଅଜିତ୍ ସିଂ, ଇଟିଭି ଭାରତ
