ଭବାନୀପାଟଣା: କୂଅରୁ ଯୁବକଙ୍କ ମୃତଦେହ ଉଦ୍ଧାର । କଳାହାଣ୍ଡି ଜିଲ୍ଲା କେଗାଁ ଥାନା ଅନ୍ତର୍ଗତ ପଦ୍ମପୁର ଗାଁର ଏକ କୂଅରୁ ଯୁବକଙ୍କ କ୍ଷତ ବିକ୍ଷତ ମୃତଦେହ ଉଦ୍ଧାର କରାଯାଇଛି । ଏହା ଏକ ହତ୍ୟାକାଣ୍ଡ ବୋଲି ସନ୍ଦେହ କରାଯାଉଛି ।
କୁଅରୁ ଯୁବକଙ୍କ ମୃତଦେହ ଉଦ୍ଧାର, ହତ୍ୟା ସନ୍ଦେହ
ସୂଚନାଥାଉକି କଳାହାଣ୍ଡି ଜିଲ୍ଲା କେଗାଁ ଥାନା ଅନ୍ତର୍ଗତ ପଦ୍ମପୁର ଗାଁର ଜଗବନ୍ଧୁ ଶବର ଗତକାଲି ନିଜ ପରିବାର ବର୍ଗଙ୍କୁ ବ୍ୟାଙ୍କକୁ ଟଙ୍କା ଉଠାଣ ପାଇଁ ଯାଉଥିବା କହି ଆଉ ଘରକୁ ଫେରି ନ ଥିଲେ । ବୁଧବାର ପରିବାର ବର୍ଗ ଓ ଗାଁ ଲୋକଙ୍କ ବହୁ ଖୋଜା ଖୋଜି ପରେ ଗାଁର ନିର୍ଜନ ସ୍ଥାନରେ ଥିବା ଏକ କୂଅରୁ ତାଙ୍କର ମୃତଦେହ ଠାବ ହୋଇଥିଲା ।
ଘଟଣା ସ୍ଥଳରେ କେଗାଁ ପୋଲିସ ଓ ଅଗ୍ନିଶମ ବିଭାଗ ସହ ସାଇଣ୍ଟିଫିକ ଟିମ ପହଞ୍ଚି ମୃତଦେହ ଉଦ୍ଧାର ସହ ତଦନ୍ତ ଆରମ୍ଭ କରିଛନ୍ତି । ସେପଟେ ପରିବାର ପକ୍ଷରୁ ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ଅଭିଯୋଗ କରିଛନ୍ତି । ମୃତଦେହ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟର କାରଣ ସ୍ପଷ୍ଟ ହେବ ।
କଳାହାଣ୍ଡିର ଅଜିତ ସିଂ, ଇଟିଭି ଭାରତ
