ଭବାନୀପାଟଣା: ହଜି ଯାଉଛି ମାନବିକତା । ମରିଯାଇଛି ମଣିଷ ପାଣିଆ । ପୁଣି ଅଲୋଡା ହୋଇଛି ନବଜାତ ଶିଶୁ । ସେ ଅବାଞ୍ଛିତ ପ୍ରେମ ସମ୍ପର୍କ ହେଉ କିମ୍ବା କୁଆଁରୀ ମାତୃତ୍ବ । ଲୋକଲଜ୍ଜା ଭୟରେ ଆଲୋଡ଼ା ହେଉଛି ଅଲିଅଳି, ଆଉ ଶେଷରେ ମାଛ ଜାଲରେ ପଡ଼ିଛି ମୃତଦେହ । ଏମିତି ଏକ ହୃଦୟ ବିଦାରକ ଦୃଶ୍ୟ କଳାହାଣ୍ଡି ଜିଲ୍ଲା କୋକସରା ଥାନା ଅନ୍ତର୍ଗତ କୁସୁମଖୁଣ୍ଟି ଅଞ୍ଚଳରେ ଦେଖିବାକୁ ମିଳିଛି ।
ସୂଚନା ଅନୁଯାୟୀ ଇନ୍ଦ୍ରାବତୀ ବାମ କେନାଲ କୁସୁମଖୁଣ୍ଟି ନିକଟରେ କିଛି ଲୋକ ମାଛ ମାରିବାକୁ ଜାଲ ପକାଇଥିବା ବେଳେ ଜାଲରୁ ଏକ ନବ ଜାତକ ଶିଶୁର ମୃତଦେହ ଉଦ୍ଧାର ହୋଇଛି । ମାଛ ମାରିବାକୁ ଯାଇଥିବା ଲୋକେ ଜାଲରେ ନବଜାତ ଶିଶୁକୁ ଦେଖି ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ କୋକସରା ପୋଲିସ ଘଟଣା ସ୍ଥଳରେ ପହଞ୍ଚି ନବଜାତ ଶିଶୁଟିର ମୃତଦେହକୁ ଉଦ୍ଧାର କରିଥିବା ବେଳେ ତଦନ୍ତ ଆରମ୍ଭ କରିଛି ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
