ଭବାନୀପାଟଣା: ଜିଲ୍ଲା ମୁଖ୍ୟାଳୟ ଠାରୁ ମୂଷାନଲକୁ ପ୍ରାୟ ୨୫ କିମି ରାସ୍ତାକୁ ୨୦୨୦-୨୧ ମସିହାରେ ପୂର୍ତ୍ତ ବିଭାଗ ସଡକ ଯୋଜନାରେ ପ୍ରାୟ କୋଟିଏ ଟଙ୍କା ବ୍ୟୟ ଅଟକଳରେ ରାସ୍ତା ନିର୍ମାଣ କାର୍ଯ ଆରମ୍ଭ ହୋଇଛି । ହେଲେ ରାସ୍ତା କାମ ନିମ୍ନମାନର ହେଉଥିବା ଅଞ୍ଚଳବାସୀ ଅଭିଯୋଗ କରୁ ଥିବାବେଳେ କାମ ଶେଷ ନହେଉଣୁ ରାସ୍ତାରୁ ପିଚୁ ଉଠିବାକୁ ଲାଗିଲାଣି । ଆଦିବାସୀ ଅଧ୍ୟୁଷିତ ଅଞ୍ଚଳ ହୋଇଥିବାରୁ ନିମ୍ନମାନର ରାସ୍ତା କାମ ହେଉଥିବା ନେଇ ଅଭିଯୋଗ କରିଛନ୍ତି ସ୍ଥାନୀୟବାସୀ ।
ଉପର ଚିକ୍କଣ ଭିତର ଫମ୍ଫା, ଏମିତି ଚାଲିଛି ପୂର୍ତ୍ତ ବିଭାଗର ରାସ୍ତା ନିର୍ମାଣ କଳା ମଚମଚ ପିଚୁ ରାସ୍ତା, ହେଲେ ଭିତର ସମ୍ପୂର୍ଣ୍ଣ ଫମ୍ଫା । ଅଞ୍ଚଳବାସୀ ନିଜର ନିତିଦିନିଆ କାମରେ ଏହି ସଡ଼କ ଉପରେ ନିର୍ଭର କରୁ ଥିବାବେଳେ ଅନେକ ସମୟରେ ରାସ୍ତା ପାଇଁ ସମସ୍ୟାର ସମ୍ମୁଖୀନ ହେଉଥିବା ଅନେକ ବାର ସରକାରୀ ଅଧିକାରୀଙ୍କ ଠାରୁ ଆରମ୍ଭ କରି ଜନ ପ୍ରତିନିଧିଙ୍କୁ ଗୁହାରୀ କଲାପରେ ୨୦୨୦-୨୧ ମସିହାରେ ପୂର୍ତ୍ତ ବିଭାଗ ଯୋଜନାରେ ରାସ୍ତାକାମ ଆରମ୍ଭ ହୋଇଥିଲା । ହେଲେ ଠିକାଦାର ଓ ସରକାରୀ ବାବୁଙ୍କ ମଧୁଚନ୍ଦ୍ରିକା ଯୋଗୁଁ ସରକାରଙ୍କ ଯୋଜନା ଉପରେ ଉଠାଇଛି ପ୍ରଶ୍ନବାଚୀ । ସେପଟେ ରାସ୍ତା ନିର୍ମାଣରେ ଏବେ ଦୁର୍ନୀତିର ଗନ୍ଧ ବାରି ହେଉଛି । ଏହାର ଉଚ୍ଚସ୍ତରୀୟ ତଦନ୍ତ ପାଇଁ ଅଞ୍ଚଳବାସୀ ଦାବି କରିଛନ୍ତି । ତେବେ ଏନେଇ ବିଭାଗୀୟ ଅଧିକାରୀଙ୍କ ପ୍ରତିକ୍ରିୟା ମିଳିପାରି ନାହିଁ ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
