ଭବାନୀପାଟଣା: କଳାହାଣ୍ଡି ଜିଲ୍ଲା ମୁଖ୍ୟ ଚିକିତ୍ସାଳୟରେ କିଡନୀ ରୋଗରେ ଜଣେ ମହିଳାଙ୍କ ମୃତ୍ୟୁ ହୋଇଥିଲା । ମୃତ ମହିଳା ଜଣକ ହେଲେ ଛତିଶଗଡର ସେନମୁଡା ଗାଁର ବିଳାସ ମାଝି । ମୃତ ମହିଳାଙ୍କ ସ୍ବାମୀ ବୈଶାଖ ମାଝି ଅନ୍ୟ ଜାତିର ବିବାହ କରିଥିବାରୁ ତାଙ୍କ ସମ୍ପର୍କୀୟ କେହି ଆସି ନ ଥିଲେ ।
ଫଳରେ ସେ ଗାଁକୁ ମୃତଦେହ ନେଇ ନ ପାରି ଡାକ୍ତରଖାନାରେ ୨ ଛୋଟ ଝିଅ ପୁଅକୁ ଧରି ଚିନ୍ତାରେ ବସିଥିଲେ । ଏହି ଘଟଣା ସମ୍ପର୍କରେ ଖବର ପାଇ ଯୁବ କଂଗ୍ରେସ ଟିମ ଡାକ୍ତରଖାନା ପହଞ୍ଚି ସହାୟତାର ହାତ ବଢ଼ାଇଥିଲେ । ଅନ୍ୟ ଜାତିର ବିବାହ କରିଥିବାରୁ ଗାଁକୁ ସ୍ତ୍ରୀର ମୃତଦେହ ନେଲେ ମଧ୍ୟ ପାଖକୁ କେହି ଆସିବେ ନାହିଁ ବୋଲି ବୈଶାଖ ଦୁଃଖ ପ୍ରକାଶ କରିଥିଲେ ।
ଫଳରେ ବୈଶାଖଙ୍କ ଇଚ୍ଛା ଅନୁସାରେ ଜିଲ୍ଲା ଯୁବ କଂଗ୍ରେସ ଟିମ ସ୍ଥାନୀୟ ସାଗରପଡା ସ୍ଥିତ ଶ୍ମସାନରେ ତାଙ୍କ ସ୍ତ୍ରୀଙ୍କ ମୃତଦେହକୁ ଅନ୍ତିମସଂସ୍କାର ସହ ଅନ୍ତେଷ୍ଟ୍ରି କ୍ରିୟା ସମାପନ କରାଯାଇଥିଲା । ବୈଶାଖଙ୍କ ଏବେ ୫ ବର୍ଷର ଏକ ପୁଅ ଓ ୭ ବର୍ଷର ଜଣେ ଦିବ୍ୟାଙ୍ଗ ଝିଅ ଅଛନ୍ତି । ଅନ୍ୟପଟେ ବୈଶାଖ ଓ ତାଙ୍କ ୨ ଝିଅପୁଅକୁ ମଧ୍ୟ ଗାଁକୁ ପଠାଇବା ପାଇଁ ଯୁବ କଂଗ୍ରେସ ପକ୍ଷରୁ ଅର୍ଥ ସହ ଗାଡିର ବ୍ୟବସ୍ଥା କରାଯାଇଥିଲା ।
କଳାହାଣ୍ତିରୁ ଅଜିତ ସିଂ, ଇଟିଭି ଭାରତ
