କଳାହାଣ୍ଡି: ଗ୍ରାମାଞ୍ଚଳର ବିକାଶରେ ଦେଶର ବିକାଶ। ଏନେଇ ସରକାର ଆରମ୍ଭ କରିଛନ୍ତି ମାଳମାଳ ଯୋଜନା ଓ ଖର୍ଚ୍ଚ ହେଉଛି ପୁଳାପୁଳା ଟଙ୍କା। ତଥାପି ଅବହେଳିତ ଅବସ୍ଥାରେ ରହିଯାଇଛି ଅନେକ ଗାଁ । ସେଥିମଧ୍ୟରେ ଆଦିବାସୀ ଅଧ୍ୟୁଷିତ ପୋଇଗୁଡା ଗାଁକୁ ଦେଖିଲେ ବାରି ହୋଇପଡେ ବିକାଶର ଅପରିବର୍ତ୍ତିତ ନଗ୍ନ ଚିତ୍ର। ସ୍ବାଧୀନତା ପୂର୍ବରୁ ଗାଁର ଅବସ୍ଥା ଯାହା ଥିଲା, ଏବେବି ସେମିତି ରହିଛି। ନାଁ ଅଛି ଖଣ୍ଡେ ପକ୍କା ରାସ୍ତା ନାଁ ଅଛି ପାନୀୟ ଜଳ ବ୍ୟବସ୍ଥା। ଆଉ ଏଭଳି ଅବ୍ୟବସ୍ଥା ମଧ୍ୟରେ ଶିକ୍ଷା ଓ ସ୍ବାସ୍ଥସେବା କଥା ତ ନକହିବା ଭଲ।
କଳାହାଣ୍ଡି ଜିଲ୍ଲାର, ଥୁଆମୂଳ ରାମପୁର ବ୍ଲକ ଅଧୀନରେ ଥିବା ଏହି ଗାଁ ପିଡିଏସ ପାଇଁ ପଞ୍ଚାୟତ ଉପରେ ସମ୍ପୂର୍ଣ୍ଣ ନିର୍ଭରଶୀଳ । ବ୍ଲକଠାରୁ ଗାଁ ମାତ୍ର 3କିଲୋମିଟର, ହେଲେ ପୋଲ ନଥିବାରୁ ଯାତାୟତ ପାଇଁ ଆଣ୍ଠୁଏ ଆଣ୍ଠୁଏ ପାଣିରେ ଯିବାଆସିବା କରି ହନ୍ତସନ୍ତ ହେଉଛନ୍ତି ଗ୍ରାମବାସୀ।
ଆଉ ବର୍ଷା ତ ସତେ ଯେମିତି ଏମାନଙ୍କ ବଇରୀ । ଅସରାଏ ବର୍ଷା ଲୋକଙ୍କ ପାଇଁ ନେଇଆସେ ଅସରନ୍ତି ଦୁଃଖ। ପୋଇଗୁଡାବାସୀ କଳାହାଣ୍ଡି ଜିଲ୍ଲାର ବାସିନ୍ଦା ସତ ହେଲେ ସରକାରୀ ଯୋଜନା ସତେ ଯେପରି ଏମାନଙ୍କ ପାଇଁ ସାତ ସପନ । ନେତାଙ୍କୁ ବି ଏ ଗାଁ କଥା ମନେ ପଡେ ହେଲେ କେବଳ ଭୋଟ ବେଳେ। ସେପଟେ ଗାଁର ବିକାଶ ଓ ପୋଲ ନିର୍ମାଣ ଦିଗରେ ଯଥାସମ୍ଭବ ଉଚିତ ପଦକ୍ଷେପ ନିଆଯିବ ବୋଲି କହିଛନ୍ତି ଲାଞ୍ଜିଗଡ ବିଧାୟକ।
କଳାହାଣ୍ଡିରୁ ଅଜିତ୍ ସିଂ, ଇଟିଭି ଭାରତ
