ଭୁବନେଶ୍ବର: ବିଜେପି ବିଧାୟକ ଜୟନାରାୟଣ ମିଶ୍ରଙ୍କ ଟାର୍ଗେଟରେ ମୁଖ୍ୟମନ୍ତ୍ରୀ । କଳାହାଣ୍ଡିରେ ମୁୁଖ୍ୟମନ୍ତ୍ରୀଙ୍କ ବିଭିନ୍ନ ପ୍ରକଳ୍ପ ଉଦଘାଟନ ଓ ଶିଳାନ୍ୟାସକୁ ବିଜେପି ବିଧାୟକ କଟାକ୍ଷ କରିଛନ୍ତି । ଏହା ଏକ ରାଜନୈତିକ ଚାଲ୍, ଲୋକଙ୍କ ଅର୍ଥରେ ଏକ ହରିଲୁଟ୍ ବୋଲି ସେ କହିଛନ୍ତି ।
ସୂଚନା ଅନୁଯାୟୀ ଆଜି(ଗୁରୁବାର) ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଳାହାଣ୍ଡିରେ ୨ ହଜାର ୮୫ କୋଟି ଟଙ୍କାର ବିଭିନ୍ନ ପ୍ରକଳ୍ପର ଉଦ୍ଘାଟନ ଓ ଶିଳାନ୍ୟାସ କରିଛନ୍ତି । ଯାହାକୁ ବିଜେପି ବିଧାୟକ ଜୟନାରାୟଣ ମିଶ୍ର ସମାଲୋଚନା କରି କହିଛନ୍ତି ଯେ, 'ଯେଉଁ ପ୍ରକଳ୍ପ ଉଦଘାଟିତ ହୋଇଛି ତାହା କେନ୍ଦ୍ରର, ମୁଖ୍ୟମନ୍ତ୍ରୀ ଯାହା କରୁଛନ୍ତି ଏସବୁ ରାଜନୈତିକ ଚାଲ । ଲୋକଙ୍କ ଅର୍ଥରେ ହେଉଛି ହରିଲୁଟ । ଗତ କିଛିବର୍ଷ ଧରି ସରକାର ଏହି ଅଞ୍ଚଳର ଉନ୍ନତି ପାଇଁ ଗୁରୁତ୍ୱ ଦେଇନାହାନ୍ତି । କିନ୍ତୁ ଭାଷଣରେ ଅନେକ କଥା କହୁଛନ୍ତି ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀ ଥରେ ହେଲେ ବାସ୍ତବତା ପରଖି ନାହାନ୍ତି । ସେଠାରେ ଚାଷୀମାନେ ଉଚିତ ନ୍ୟାୟ ପାଉନାହାଁନ୍ତି ।'
ସେହିଭଳି ମୁଖ୍ୟମନ୍ତ୍ରୀଙ୍କ କଳାହାଣ୍ଡି ଗସ୍ତ ଏକ ରାଜନୈତିକ ଧୂଆଁ ବାଣ, ଏଭଳି ଧୂଆଁ ବାଣର ଉଦାହରଣ ହେଲା କାଳିଆ ଯୋଜନା ବୋଲି ଜୟନାରାୟଣ କହିଛନ୍ତି । ଏଭଳି ଅନେକ ଯୋଜନା କରି ପରବର୍ତ୍ତୀ ସମୟରେ ମୁଖ୍ୟମନ୍ତ୍ରୀ ଭୁଲି ଯିବାର ନଜିର ରହିଛି । ଏହା ବାସ୍ତବରେ ଲୋକଙ୍କୁ ଠକିବା ଉଦ୍ୟମ । କେନ୍ଦ୍ର ସରକାରଙ୍କ ଉଦ୍ୟମକୁ ହରିଲୁଟ କରୁଛନ୍ତି ଏଠାକାର ସରକାର । ବିରୋଧ କଲେ ଆସୁଛି ରାଜନୈତିକ ଆକ୍ରୋଶ । କଳାହାଣ୍ଡିର ବାସ୍ତବତା ସେଠାରେ ଥିବା ଲୋକେ ଜାଣନ୍ତି । ଲୋକଙ୍କୁ କାହିଁକି ମୁଖ୍ୟମନ୍ତ୍ରୀ ଠକୁଛନ୍ତି ଉତ୍ତର ରଖନ୍ତୁ ବୋଲି ବିଧାୟକ ଜୟନାରାଣ ମିଶ୍ର କହିଛନ୍ତି ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
