ଭବାନୀପାଟଣା: ପୁଣି ଅଶାନ୍ତ ଅସ୍ଥାୟୀ ସ୍ବାସ୍ଥ୍ୟ କେନ୍ଦ୍ର । ସରପଞ୍ଚଙ୍କ ଉପସ୍ଥିତିରେ ଜଣେ ସୁଇପର ପ୍ରବାସୀଙ୍କୁ ମାଡ ମାରୁଥିବାର ଏକ ଭିଡିଓ ଏବେ ଭାଇରାଲ ହୋଇଛି । କଳାହାଣ୍ଡି ଜିଲ୍ଲା କେସିଙ୍ଗା ବ୍ଲକ କସୃପଡା ଟିଏମସିର ଏହି ଘଟଣା । ଭାଇରାଲ ଭିଡିଓ ଦେଖିବା ପରେ ଘଟଣାସ୍ଥଳରେ ବିଡିଓ ପହଞ୍ଚି ସୁଇପରକୁ ତାଗିଦ କରିବା ସହ ଆପୋଷ ସମାଧାନ କରିଛନ୍ତି ।
ସୂଚନାନୁସାରେ, ଏହି ଟିଏମସି କେନ୍ଦ୍ରରେ ତୁର୍ଲାଖମନ ଅଞ୍ଚଳର ଜଣେ ପ୍ରବାସୀ ଶ୍ରମିକ ରହିଥିଲେ । କୌଣସି କଥାକୁ ନେଇ ହଠାତ ଏହି ଅନ୍ତେବାସୀଙ୍କ ଉପରେ ସୁଇପର ଜଣକ ଆକ୍ରମଣ କରିଥିଲେ । ଅନ୍ୟ ଅନ୍ତେବାସୀ ଓ ପଞ୍ଚାୟତ କର୍ତ୍ତୃପକ୍ଷଙ୍କ ସାମ୍ନାରେ ଘଟିଥିଲା ଏହି ଘଟଣା ।
ଭବିଷ୍ୟତରେ ଏଭଳି ଘଟଣାର ଯେପରି ପୁନରାବୃତ୍ତି ନହୁଏ ସେ ନେଇ ସୁଇପର ଓ ପଞ୍ଚାୟତ କର୍ତ୍ତୃପକ୍ଷଙ୍କୁ ତାଗିଦ କରିଥିଲେ ବିଡିଓ । ଏଥିସହ ସୁଇପରକୁ ଗାଁକୁ ନଛାଡି ସଙ୍ଗରୋଧରେ ରଖିବାକୁ ନିର୍ଦ୍ଦେଶ ଦେଇଥିଲେ । ତେବେ କର୍ତ୍ତୃପକ୍ଷ ଓ ସରପଞ୍ଚଙ୍କ ଉପସ୍ଥିତିରେ ଏଭଳି ଘଟଣା ଅନ୍ତେବାସୀଙ୍କ ସୁରକ୍ଷାକୁ ନେଇ ସାଧାରଣରେ ଅନେକ ପ୍ରଶ୍ନ ସୃଷ୍ଟି କରିଛି ।
ପ୍ରକାଶ ଥାଉ କି, କୋରୋନା ପାଇଁ ରାଜ୍ୟର ପ୍ରତ୍ୟେକ ଜିଲ୍ଲାରେ କ୍ବାରେନଣ୍ଟାଇନ ସେଣ୍ଟରମାନ ତିଆରି କରାଯାଇଛି । ବାହାର ରାଜ୍ୟରୁ ଆସୁଥିବା ପ୍ରବାସୀଙ୍କ ପାଇଁ ଏହି ସବୁ ସେଣ୍ଟର ପ୍ରସ୍ତୁତ କରାଯାଇଛି । କୋରୋନା ଯେପରି ସର୍ବସାଧାରଣ ସ୍ଥାନରେ ନ ବ୍ୟାପିବ ସେ ନେଇ ଏଭଳି ନିଷ୍ପତ୍ତି ନେଇଛନ୍ତି ରାଜ୍ୟ ସରକାର । ହେଲେ କିଛି ଅମାନିଆ ଓ ବେପରୁଆ ଯୋଗୁଁ ବାରମ୍ବାର ବଦନାମ ହେଉଛି ସରକାରୀ କ୍ବାରେନଣ୍ଟାଇନ ସେଣ୍ଟର । ଅନେକ ସମୟରେ ନିୟମ ଖିଲାପକାରୀଙ୍କ ଭିଡିଓ ମଧ୍ୟ ଭାଇରାଲ ହେଉଛି ।
କଳାହାଣ୍ଡିରୁ ଅଜିତ୍ ସିଂ, ଇଟିଭି ଭାରତ
