ଭବାନୀପାଟଣା: ତ୍ରିସ୍ତରୀୟ ପଞ୍ଚାୟତିରାଜ ନିର୍ବାଚନରେ ଜାତିଭିତ୍ତିକ ସଂରକ୍ଷଣକୁ ନେଇ ଚିଠା ତାଲିକା ପ୍ରକାଶ ପାଇସାରିଛି । ତେବେ କଳାହାଣ୍ଡି ଜିଲ୍ଲା ପାଇଁ ପ୍ରସ୍ତୁତ ତାଲିକାରେ ବ୍ୟାପକ ଅସଙ୍ଗତି ଥିବାବେଳେ ଏହାକୁ ଦୂର କରିବା ଦାବିରେ ପୂର୍ବରୁ ବିଭିନ୍ନ ସଂଗଠନ ଦାବି କରିଆସୁଛନ୍ତି । ଜିଲ୍ଲାର କେସିଙ୍ଗା ବ୍ଳକର ସମସ୍ତ ୨୬ଟି ଗ୍ରାମ ପଞ୍ଚାୟତରେ ସରପଞ୍ଚ ପଦବୀ ପାଇଁ ଅଣସଂରକ୍ଷଣ ଥିବାରୁ ଏହାକୁ ବିରୋଧ କରି କେସିଙ୍ଗା ଆଦିବାସୀ ସଂଘ ଆଜି(ବୁଧବାର) ଜିଲ୍ଲା ପଞ୍ଚାୟତ ଅଧିକାରୀଙ୍କ ଦ୍ୱାରସ୍ଥ ହୋଇଛନ୍ତି ।
ଅଭିଯୋଗ ଅନୁଯାୟୀ ବ୍ଲକର ୬୦ ପ୍ରତିଶତ ଜନସଂଖ୍ୟା ଆଦିବାସୀ ଥିବା ବେଳେ ଜିଲ୍ଲା ପ୍ରଶାସନର ନିଷ୍ପତ୍ତି ନେଇ ଆଦିବାସୀ ସଂଘ ବିରୋଧ କରିଛି । ତେବେ ସମସ୍ତ ସରପଞ୍ଚ ପଦବୀକୁ ଜାତିଭିତ୍ତିକ ଜନଗଣନା ଅନୁଯାୟୀ ଚୟନ କରିବା ପାଇଁ ଦାବି କରିଛି ଆଦିବାସୀ ସଂଘ । ଏନେଇ ଜିଲ୍ଲାପାଳଙ୍କ ଉଦ୍ଦେଶ୍ୟରେ ଜିଲ୍ଲା ପଞ୍ଚାୟତ ଅଧିକାରୀଙ୍କ ଜରିଆରେ ଦାବିପତ୍ର ପ୍ରଦାନ କରିବା ସହ ଏହାର ପୁନଃବିଚାର କରାନଗଲେ ଆଗାମୀ ଦିନରେ ଆନ୍ଦୋଲନକୁ ଓହ୍ଲାଇବା ନେଇ ଚେତାବନୀ ଦେଇଛି ଜିଲ୍ଲା ଆଦିବାସୀ ସଂଘ ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ