ଚଳନ୍ତା ଟ୍ରକରେ ଲାଗିଲା ନିଆଁ, ଜଳିଗଲା 30 ଟନ୍‌ ଡାଲି - truck catches fire

ନିଆଳି: ଚଳନ୍ତା ଟ୍ରକରେ ଅଗ୍ନିକାଣ୍ଡ । ହୁତୁହୁତୁ ହୋଇ ଜଳିଗଲା ଡାଲି ବୋଝେଇ ଟ୍ରକ । ଜଳି ପୋଡି ପାଉଁଶ ହୋଇଗଲା ପ୍ରାୟ 30 ଟନ୍‌ ଡାଲି । ଆଜି ଭୋର ସମୟରେ ଫୁଲନଖରା ଓ ନିଆଳି ରାସ୍ତାର ଆମଣାକୁଦ ଛକ ନିକଟରେ ଏହି ଅଘଟଣ ଘଟିଥିବା ସୂଚନା ମିଳିଛି । ଖବର ପାଇ ନିଆଳି ଓ ଅଡଶପୁର ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛନ୍ତି । ଅଗ୍ନିକାଣ୍ଡରେ ଟ୍ରକଟି ସମ୍ପୂର୍ଣ୍ଣ ନଷ୍ଟ ହୋଇଯାଇଛି । 

ଟ୍ରକର ଡ୍ରାଇଭର କହିଛନ୍ତି," ଛତିଶଗଡର ରାୟପୁରରୁ ଡାଲି ବୋଝେଇ ଟ୍ରକଟି ପୁରୀ ଜିଲ୍ଲା କୋଣାର୍କ ଅଞ୍ଚଳକୁ ଆସୁଥିଲା । ଗାଡିରେ ନିଆଁ ଲାଗିଥିବା ମୁଁ ମିରରେ ଦେଖିଥିଲି । ପାଖାପାଖି ୩୦ ଟନର ଡାଲି ଗାଡିରେ ଅଛି । '' ଅଡଶପୁର ଅଗ୍ନିଶମ ବିଭାଗ ଅଧିକାରୀ କହିଛନ୍ତି," ରାତି ୪.୪୦ ମିନିଟ ସମୟରେ ଜଣେ ବ୍ୟକ୍ତି ଅଗ୍ନିକାଣ୍ଡ ସମ୍ପର୍କରେ ସୂଚନା ଦେଇଥିଲେ । ପରେ ଆମେ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲୁ । ଏହି ଅଗ୍ନିକାଣ୍ଡ ଫୁଲନଖରା ଓ ନିଆଳି ରାସ୍ତାର ଆମଣାକୁଦ ଛକ ନିକଟରେ ହୋଇଛି । ଏକ ୧୬ଚକିଆ ଟ୍ରକ ଯୋଗେ ଡାଲି ଯାଉଥିବା ସମୟରେ ଯାନ୍ତ୍ରିକ ତ୍ରୁଟି ଯୋଗୁଁ ଟ୍ରକରେ ନିଆଁ ଲାଗିଥିବା ପ୍ରାଥମିକ ତଦନ୍ତରୁ ଜଣାପଡିଛି ।'' ଏହି ଘଟଣାରେ ଖୋର୍ଦ୍ଧା ଜିଲ୍ଲା ବନମାଳିପୁର ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।  

ଇଟିଭି ଭାରତ, ନିଆଳି