ଭବାନୀପାଟଣା: ରାଜ୍ୟରେ ମହାମାରୀର ପ୍ରକୋପ ବଢୁଥିବାବେଳେ କଳହାଣ୍ଡି ଜିଲ୍ଲାରେ କାୟା ବିସ୍ତାର କରିବାରେ ଲାଗିଛି କୋରୋନା । ଜିଲ୍ଲାରେ ଶନିବାର ଆଉ ୧୬ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ତେବେ ଗୋଟିଏ ଦିନରେ ୧୬ ଜଣ ପଜିଟିଭ ଚିହ୍ନଟ ହେବା ପ୍ରଶାସନର ଚିନ୍ତା ବଢାଇ ଦେଇଛି ।
ଚିହ୍ନଟ ନୂଆ ୧୬ ଜଣ ଆକ୍ରାନ୍ତଙ୍କ ମଧ୍ୟରୁ ୧୪ ଜଣ ପୁରୁଷ ଓ ୨ ଜଣ ମହିଳା ଅଛନ୍ତି । ପଜିଟିଭଙ୍କ ମଧ୍ୟର ଜଣେ କୋରୋନା ଯୋଦ୍ଧା ଥିବା ଜଣାପଡିଛି । କୋରୋନା ଯୋଦ୍ଧା ଲାଞ୍ଜିଗଡ଼ ଟିଏମସିରେ ଡିୟୁଟିରେ ଥିବାବେଳେ ଅନ୍ୟ ଆକ୍ରାନ୍ତ ପ୍ରବାସୀ ସେହି ଟିଏମସିରେ ରହୁଥିଲେ।
ସେହିପରି ଜିଲ୍ଲାର ଜୟପାଟଣା ବ୍ଲକରେ ପ୍ରଥମଥର ପାଦ ଥାପିଛି କୋରୋନା । ଆକ୍ରାନ୍ତ ବ୍ୟକ୍ତି ଜଣକ ଜୟପାଟଣା ଟିଏମସିରେ ରହୁଥିବାବେଳେ ସେ ରୁଷିଆରୁ ଫେରିଥିବା ସୂଚନା ମିଳିଛି । ସମସ୍ତ ଆକ୍ରାନ୍ତଙ୍କୁ ଜିଲ୍ଲା କୋଭିଡ ହସ୍ପିଟାଲରେ ଭର୍ତ୍ତି କରାଯାଇଛି । ନୂଆ ଆକ୍ରାନ୍ତଙ୍କୁ ମିଶାଇ ବର୍ତ୍ତମାନସୁଦ୍ଧା ଜିଲ୍ଲାରେ କୋରୋନା ପଜିଟିଭ ମାମଲା ୫୭ରେ ପହଞ୍ଚିଛି । ଏମାନଙ୍କ ମଧ୍ୟରୁ ୨୧ ଜଣ ସୁସ୍ଥ ହୋଇସାରିଥିବାବେଳେ ୩୬ ଜଣ ଏବେ ବି ଜିଲ୍ଲା କୋଭିଡ ହସ୍ପିଟାଲରେ ଚିକିତ୍ସାଧୀନ ଅଛନ୍ତି ।
ରକଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
