ଝାରସୁଗୁଡା: ଅଦିନିଆ ଝଡ ତୋଫାନରେ ଜିଲ୍ଲାରେ ବିଭିନ୍ନ ସ୍ଥାନରେ ବ୍ୟାପକ କ୍ଷୟକ୍ଷତି କରିଛି ବର୍ଷା। ସହରର ଅନେକ ସ୍ଥାନରେ ବଡବଡ ଗଛ ଉପୁଡି ପଡିବା ସହିତ ରାସ୍ତା ଅବରୋଧ ହୋଇଥିଲା । ସେପଟେ ଗ୍ରାମାଞ୍ଚଳରେ ମଧ୍ୟ ଦେଖିବାକୁ ମିଳିଛି ସମାନ ସ୍ଥିତି। ଝଡ଼ ତୋଫାନ ଯୋଗୁଁ ରାସ୍ତା ଉପରେ ବଡ଼ବଡ଼ ଗଛ ସହ ବିଜୁଳି ଖୁଣ୍ଟ ପଡ଼ିଥିବାରୁ ଜିଲ୍ଲାର କିଛି ଅଞ୍ଚଳରେ ଲୋକେ ପ୍ରଭାବିତ ହୋଇଛନ୍ତି ।
ଅନ୍ୟପଟେ ଝାରସୁଗୁଡା ସହରକୁ ସଂଯୋଗ କରୁଥିବା ବିଭିନ୍ନ ରାସ୍ତାରେ ବିଶାଳ ଗଛ ଉପୁଡି ପଡ଼ିବାରୁ ଦୀର୍ଘ ସମୟ ପର୍ଯ୍ୟନ୍ତ ରାସ୍ତା ଅବରୋଧ ହୋଇ ରହିଥିଲା । ଅଗ୍ନିଶମ ବିଭାଗ ଏବଂ ପୌର କର୍ମଚାରୀ ଗଛ କାଟି ରାସ୍ତା ସଫା କରିବା ପରେ ପରିସ୍ଥିତି ସାମାନ୍ୟ ସୁଧୁରିଥିଲା ।
ତେବେ ବ୍ରଜରାଜନଗର ଓ ବେଲପାହାଡ଼ ସମେତ ଜିଲ୍ଲାର ଲଖନପୁର ତହସିଲ ଅନ୍ତର୍ଗତ କେତେକ ସ୍ଥାନରେ କୁଆପଥର ମାଡ଼ ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇଛି । ଅନେକ ଲୋକ ନିଜ ନିଜ କାମରେ ବ୍ୟସ୍ତ ଥିବାବେଳେ ଅଚାନକ କୁଆପଥର ମାଡ଼ ହୋଇଥିଲା । ଝଡ଼ ସହ କୁଆପଥର ମାଡ଼ ପରେ ପ୍ରବଳ ବର୍ଷା ଯୋଗୁଁ ବ୍ୟାପକ କ୍ଷୟକ୍ଷତି ହୋଇଥିବା ଅନୁମାନ କରାଯାଉଛି ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
