ଝାରସୁଗୁଡା: କୋଭିଡ-19 ସଂକ୍ରମଣକୁ ଦୃଷ୍ଟିରେ ରଖି 21 ଦିନ ପର୍ଯ୍ୟନ୍ତ ରାଷ୍ଟ୍ରବ୍ୟାପୀ କରାଯାଇଛି ତାଲା ବନ୍ଦ । ଏହି ସମୟରେ ବିଭିନ୍ନ ରାଜ୍ୟରେ ଫସି ରହିଥିବା ପ୍ରବାସୀ କୃଷି ଓ ଶିଳ୍ପ ଶ୍ରମିକ ଏବଂ ଅଣସଂଗଠିତ କ୍ଷେତ୍ରର କାର୍ଯ୍ୟରତ ଅନ୍ୟ ଶ୍ରମିକମାନଙ୍କୁ ପର୍ଯ୍ୟାପ୍ତ ସହାୟତା ଯୋଗାଇ ଦେବା ପାଇଁ ତତ୍ପର ହୋଇଛନ୍ତି କେନ୍ଦ୍ର ସରକାର । ଏନେଇ ତୁରନ୍ତ ପଦକ୍ଷେପ ଗ୍ରହଣ କରିବା ପାଇଁ ବିଭିନ୍ନ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳ ଗୁଡ଼ିକୁ କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି।
ଅନ୍ୟପଟେ କୋରୋନା କଟକଣା କଡାକଡି ହେବା ପରେ ବିଭିନ୍ନ କଳ କାରଖାନାରେ କାମ କରୁଥିବା ଶ୍ରମିକ ଓ ଠିକା ଶ୍ରମିକମାନେ ରୋଜଗାର ହରାଇ ନିଜ ଘରକୁ ଫେରିବା ପାଇଁ ଭିନ୍ନ ପନ୍ଥା ଅବଲମ୍ବନ କରୁଥିବା ଦେଖିବାକୁ ମିଳିଛି । ଫଳରେ ସମ୍ବଲପୁର ଜିଲ୍ଲାର ରେଙ୍ଗାଲିରେ ଥିବା ଶ୍ୟାମ ମେଟାଲିକ୍ସ କାରଖାନାରେ କାମ କରୁଥିବା 44ରୁ ଉର୍ଦ୍ଧ୍ବ ଶ୍ରମିକ ଛତିଶଗଡ଼କୁ ଯିବା ପାଇଁ ମୁଖ୍ୟ ରାସ୍ତା ଛାଡି ରେଳ ଲାଇନର ସାହାରା ନେଇଛନ୍ତି ।
କାରଣ ରାଜ୍ୟର ବିଭିନ୍ନ ଜାତୀୟ ରାଜପଥ କିମ୍ବା ରାଜ୍ୟ ରାଜପଥରେ ପୋଲିସର ନାକାବନ୍ଦୀ ଲାଗିଥିବାରୁ ପୋଲିସ ଅଟକାଇବା ଭୟରେ ରେଳ ଲାଇନରେ ଚାଲି ଚାଲି ଛତିଶଗଡ଼ର ବିଳାସପୁର ଓ ଚମ୍ପା ଯାଉଥିଲେ ଏହି ଶ୍ରମିକ । ରବିବାର ସନ୍ଧ୍ୟାରେ ସରବାହଲ ନିକଟରେ କିଛି ସ୍ବେଚ୍ଛାସେବୀ ସେମାନଙ୍କୁ ଅଟକାଇ ପ୍ରଶାସନକୁ ଖବର ଦେଇଥିଲେ। ପରେ ଘଟଣାସ୍ଥଳକୁ ଝାରସୁଗୁଡା ଉପଜିଲ୍ଲାପାଳ, ମାଜିଷ୍ଟ୍ରେଟ ସମେତ ଝାରସୁଗୁଡା ଥାନା ଅଧିକାରୀ ପହଞ୍ଚି ସମସ୍ତ ଶ୍ରମିକମାନଙ୍କ ଖାଇବା ପିଇବା ବ୍ୟବସ୍ଥା କରିଥିଲେ । ଏଥିସହ ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ସମସ୍ତ ଶ୍ରମିକଙ୍କୁ ଅସ୍ଥାୟୀ କ୍ୟାମ୍ପରେ ରଖାଯାଇଥିବା ସୂଚନା ଦେଇଛନ୍ତି ଝାରସୁଗୁଡା ଉପଜିଲ୍ଲାପାଳ ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
