ଝାରସୁଗୁଡା: ଓପିଜିସିରେ କୋଇଲା ସଙ୍କଟ ଯୋଗୁଁ ୨୧୦ ମେଗାୱାଟ ଗୋଟିଏ ୟୁନିଟ ବନ୍ଦ କରିଦିଆୟାଇଛି । ୨୪ ହଜାର ବଦଳରେ ଏମସିଏଲ ୧୪ ହଜାର ମେଟ୍ରିକ ଟନ୍ କୋଇଲା ଦେଉଛି । ଫଳରେ ଝାରସୁଗୁଡା ବନହରପାଲିସ୍ଥିତ ଓପିଜିସିରେ ସୋମବାରଠାରୁ 2 ନମ୍ବର ୟୁନିଟକୁ ବନ୍ଦ କରାଯାଇଥିବା ଓପିଜିସିର ବରିଷ୍ଠ ଅଧିକାରୀ ଦିଲୀପ କୁମାର ପଣ୍ଡା କହିଛନ୍ତି |
ଏହିଭଳି ଧାରା ବଜାୟ ରହିଲେ ଆଗକୁ ଆହୁରି ଅଧିକ ୟୁନିଟକୁ ବନ୍ଦ କରାଯାଇପାରେ ବୋଲି ଓପିଜିସି କର୍ତ୍ତୃପକ୍ଷ ନିଷ୍ପତ୍ତି ନେଇଥିବା ଜଣାପଡିଛି | ଏହିପରି ସମସ୍ୟା ଲାଗି ରହିଲେ ରାଜ୍ୟରେ ବିଜୁଳି ସମସ୍ୟା ସୃଷ୍ଟି ହେବା ଆଶଙ୍କା ବଢିବାରେ ଲାଗିଛି |
ଝାରସୁଗୁଡା ଜିଲ୍ଲା ବନହରପାଲି ଠାରେ ରହିଥିବା ଓପିଜିସିର 4ଟି ୟୁନିଟରୁ 1740 ମେଗାୱ୍ଟାଟ ବିଜୁଳି ଶକ୍ତି ଉତ୍ପାଦନ ହେଉଥିବା ବେଳେ ଏହା କମିବା ଆଶଙ୍କା ପ୍ରକାଶ ପାଇଛି | ଓପିଜିସିର ପ୍ରଥମ ଓ ଦ୍ବିତୀୟ ୟୁନିଟରୁ 420 ମେଗାୱାଟ ବିଜୁଳି ଶକ୍ତି ଉତ୍ପାଦନ କ୍ଷମତା ଥିବାବେଳେ ଦୈନିକ ଆବଶ୍ୟକ 8 ହଜାର ମେଟ୍ରିକ୍ ଟନ କୋଇଲା | ଗତ ଜାନୁଆରୀ ମାସରେ ଲୋକାର୍ପିତ 3ୟ ଓ 4ର୍ଥ ୟୁନିଟରୁ 1320 ମେଗାୱାଟ ବିଜୁଳି ଶକ୍ତି ଉତ୍ପାଦନ ପାଇଁ ଦୈନିକ ଆବଶ୍ୟକ 16 ହଜାର ମେଟ୍ରିକ୍ ଟନ କୋଇଲା | ଏହିପରି ଦୈନିକ 24 ହଜାର ମେଟ୍ରିକ୍ ଟନ କୋଇଲାର ଆବଶ୍ୟକତା ରହିଥିବା ବେଳେ ଏମସିଏଲ 14 ହଜାର ମେଟ୍ରିକ ଟନ କୋଇଲା ଯୋଗାଉଛି ଫଳରେ ଓପିଜିସିର 4ଟି ଯାକ ୟୁନିଟ ଚଳାଇବା ଅସମ୍ଭବ ହୋଇପଡିଛି |
ଅନ୍ୟପଟେ କୋଇଲା ଯୋଗାଣକୁ ନେଇ ପ୍ରତିକ୍ରିୟା ରଖିଛି ଏମସିଏଲ । ଓପିଜିସିକୁ ଦୈନିକ ୮ ହଜାର ମେଟ୍ରିକ ଟନ ଦେବା ପାଇଁ ଚୁକ୍ତିବଦ୍ଧ ଥିବାବେଳେ ୧୪ ହଜାର ଟନ କୋଇଲା ଯୋଗାଇ ଦିଆଯାଉଛି । କୋଇଲା ସଙ୍କଟ ଦୂର ପାଇଁ ଲଖନପୁର ଖୋଲାମୁଁହ କୋଇଲା ଖଣି ବଦଳରେ ଏମସିଏଲର ଯେକୌଣସି ଅନ୍ୟ ଖଣିରୁ କୋଇଲା ନେବା ପାଇଁ ଓପିଜିସିକୁ କୁହାଯାଇଥିବା ସୂଚନା ଦେଲେ ଲୋକ ସମ୍ପର୍କ ଅଧିକାରୀ ବିନାୟକ ଜାମୱାଲ ।
ଝାରସୁଗୁଡାରୁ ରବିନାରାୟଣ ସାହୁ, ଇଟିଭି ଭାରତ
