ଝାରସୁଗୁଡା: ଓପିଜିସିରେ ଦେଖାଦେଇଛି କୋଇଲା ସଙ୍କଟ | ପୁର୍ବରୁ ଓପିଜିସିରେ ଗଚ୍ଛିତ ଥିବା କୋଇଲାରୁ 4ଟି ଯାକ ୟୁନିଟ ଚାଲୁଥିଲା । ତେବେ ଓପିଜିସିର ଗଚ୍ଛିତ କୋଇଲା ଶେଷ ହେଲାଣି | ତେବେ ଏମସିଏଲ କୋଇଲା ଯୋଗାଣ ବୃଦ୍ଧି ନକଲେ ଆଜି ମଧ୍ୟରାତ୍ରିଠାରୁ 2 ନମ୍ବର ୟୁନିଟ ବନ୍ଦ କରିବାକୁ ନିଷ୍ପତ୍ତି ନେଇଛି ଓପିଜିସି କର୍ତ୍ତୃପକ୍ଷ | ଏହିଭଳି ଧାରା ବଜାୟ ରହିଲେ ଆଗକୁ ଆହୁରି ଅଧିକ ୟୁନିଟକୁ ବନ୍ଦ କରାଯାଇପାରେ ବୋଲି ଓପିଜିସି କର୍ତ୍ତୃପକ୍ଷ ନିଷ୍ପତ୍ତି ନେଇଥିବା ଜଣାପଡିଛି |
ଝାରସୁଗୁଡା ଜିଲ୍ଲା ବନହରପାଲିଠାରେ ରହିଥିବା ଓପିଜିସିର 4ଟି ୟୁନିଟରୁ 1740 ମେଗାୱାଟ ବିଜୁଳି ଶକ୍ତି ଉତ୍ପାଦନ ହେଉଥିବା ବେଳେ ଏହା କମିବା ଆଶଙ୍କା ପ୍ରକାଶ ପାଇଛି | ଓପିଜିସିର ପ୍ରଥମ ଓ ଦ୍ବିତୀୟ ୟୁନିଟରୁ 420 ମେଗାୱାଟ ବିଜୁଳି ଶକ୍ତି ଉତ୍ପାଦନ କ୍ଷମତା ଥିବାବେଳେ ଦୈନିକ ଆବଶ୍ୟକ 8 ହଜାର ମେଟ୍ରିକ୍ ଟନ କୋଇଲା |
ସେହିପରି ଗତ ଜାନୁଆରୀ ମାସରେ ମୁଖ୍ୟମନ୍ତ୍ରୀଙ୍କ ଦ୍ବାରା ଲୋକାର୍ପିତ 3ୟ ଓ 4ର୍ଥ ୟୁନିଟରୁ 1320 ମେଗାୱାଟ ବିଜୁଳି ଶକ୍ତି ଉତ୍ପାଦନ ପାଇଁ ଦୈନିକ ଆବଶ୍ୟକ 16 ହଜାର ମେଟ୍ରିକ୍ ଟନ କୋଇଲା | ତେବେ ଦୈନିକ 24 ହଜାର ମେଟ୍ରିକ୍ ଟନ କୋଇଲାର ଆବଶ୍ୟକତା ରହିଥିବା ବେଳେ ଏମସିଏଲ ଯୋଗାଉଛି 14 ହଜାର ମେଟ୍ରିକ ଟନ କୋଇଲା | ଫଳରେ ଓପିଜିସିର 4ଟି ଯାକ ୟୁନିଟ ଚଳାଇବା ଅସମ୍ଭବ ହୋଇ ପଡୁଛି |
ଏହିପରି ସମସ୍ୟା ଲାଗି ରହିଲେ ରାଜ୍ୟରେ ବିଜୁଳି ସମସ୍ୟା ସୃଷ୍ଟି ହେବା ଆଶଙ୍କା ବଢିବାରେ ଲାଗିଛି | ଓପିଜିସି ର ଗୋଟିଏ ୟୁନିଟ ବନ୍ଦ ହେଲେ 210 ମେଗାୱାଟ ବିଜୁଳି ଶକ୍ତି ଉତ୍ପାଦନ ବାଧାପ୍ରାପ୍ତ ହେବ | ଗତ ଜାନୁଆରୀ ମାସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓପିଜିସିର 3ୟ ଓ 4ର୍ଥ ୟୁନିଟ ସହ ମନୋହରପୁର କୋଲ ବ୍ଲକକୁ ମଧ୍ୟ ଉଦଘାଟନ କରିଥିଲେ | କିନ୍ତୁ ମନୋହରପୁରରୁ ଓପିଜିସି ପର୍ଯ୍ୟନ୍ତ ରେଳ ଲାଇନ୍ ନିର୍ମାଣ ପାଇଁ ଆହୁରି 4 କିଲୋମିଟର ରାସ୍ତା ନିର୍ମାଣ ସରି ନଥିବା ଓ ଏଥିପାଇଁ ଏମସିଏଲ ଜମି ହସ୍ତାନ୍ତର କରୁ ନଥିବାରୁ କୋଇଲା ଉତ୍ତୋଳନ କରାଯାଇ ପାରୁ ନଥିବା ଓପିଜିସି ପକ୍ଷରୁ ସୂଚନା ଦିଆଯାଇଛି |
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
