ଝାରସୁଗୁଡ଼ା: ଆଜି ପୋଲିସ ହାବିଲଦାର ଓ କନେଷ୍ଟବଳ ସଂଘର ନିର୍ବାଚନ ଫଳାଫଳ ପ୍ରକାଶ ପାଇଛି । ଜିଲ୍ଲା ଆରକ୍ଷୀ ଅଧିକ୍ଷକଙ୍କ କାର୍ଯ୍ୟାଳୟ ପରିସରରେ ଶୁକ୍ରବାର ହୋଇଥିଲା ପୋଲିସ ହାବିଲଦାର ଓ କନେଷ୍ଟବଳ ସଂଘର ନିର୍ବାଚନ । ଯାହାର ଫଳାଫଳ ପ୍ରକାଶ ପାଇବା ପରେ ନବ ନିଯୁକ୍ତ ପ୍ରାର୍ଥୀଙ୍କ ମଧ୍ୟରେ ଖୁସିର ଲହରୀ ଖେଳି ଯାଇଛି। ଏଥିରେ ସଭାପତି ଭାବରେ ନିର୍ବାଚିତ ହୋଇଛନ୍ତି ହାବିଲଦାର ସୁଶାନ୍ତ ପ୍ରଧାନ । ତେବେ ସୁଶାନ୍ତ ମୋଟ୍ ୨୮୬ ଭୋଟ ପାଇ ବିଜୟ ଲାଭ କରିଥିବା ଜଣାପଡିଛି । ଏହି ନିର୍ବାଚନ ଶାନ୍ତି ଶୃଙ୍ଖଳାର ସହ ଆୟୋଜିତ ହୋଇଥିବା ବେଳେ ଫଳାଫଳ ମଧ୍ୟ ପ୍ରକାଶ ପାଇଛି।
ତେବେ ଜିଲ୍ଲାର ସମସ୍ତ ପୋଲିସ ଷ୍ଟେସନ, ଫାଣ୍ଡି, ରିଜର୍ଭଠାରେ ଭୋଟ ଗ୍ରହଣ କରାଯାଇଥିଲା । ସକାଳ ୮ଟାରୁ ଦିନ ୨ଟା ଯାଏଁ ଚାଲିଥିଲା ଏହି ନିର୍ବାଚନର ମତଦାନ ପ୍ରକ୍ରିୟା । ସମୁଦାୟ ଭୋଟ ସଂଖ୍ୟା ୪୪୦ ରହିଥିବାବେଳେ ୪୧୬ ଜଣ ଭୋଟର ନିଜର ମତଦାନ ସାବ୍ୟସ୍ତ କରିଥିଲେ । ଏହି ନିର୍ବାଚନରେ ହାବିଲଦାର ସୁଶାନ୍ତ ୨୮୬ ଭୋଟ ପାଇ ନିଜ ପ୍ରତିଦ୍ବନ୍ଦୀ ଏମ.ଡି ଅଫଜଲଙ୍କୁ ପରାସ୍ତ କରିଥିଲେ । ଏହାପରେ ଅରବିନ୍ଦ ଭୋଇ ସାଧାରଣ ସମ୍ପାଦକ ଭାବେ ନିର୍ବାଚିତ ହୋଇଥିଲେ ।
ତେବେ ଖରା , ବର୍ଷା , ଶୀତ ତଥା ଅଦିନିଆ ଝଡ଼ ଆଦି ସବୁ ସମୟରେ ହାବିଲଦାର ଏବଂ କନେଷ୍ଟବଳ ମାନେ ନିସ୍ବାର୍ଥପର ଭାବେ ନିଜ ଦାୟିତ୍ୱ ସମ୍ପାଦନ କରିଥାନ୍ତି । ହୋଲି, ଦଶହରା, ଇଦ, ଦୀପାବଳି ଆଦି ପର୍ବ ମଧ୍ୟ ସେମାନଙ୍କ ପାଇଁ ସମାନ। କୌଣସି ସାଧାରଣ ସଭା ବା ଛୋଟ ବଡ଼ ପର୍ବପର୍ବାଣି ସବୁ ସମୟରେ ପୋଲିସ, ହାବିଲଦାର ଓ କନେଷ୍ଟବଳମାନେ ନିଜ ଶତ ପ୍ରତିଶତ କାର୍ଯ୍ୟ ଦକ୍ଷତା ଦର୍ଶାଉଛନ୍ତି । ହେଲେ ତାଙ୍କର ଅସୁବିଧା ସରକାରଙ୍କ ପାଖକୁ ପହଞ୍ଚି ପାରୁନଥିବା କହିଛନ୍ତି। ତେବେ ଏ ସମସ୍ତ ସମସ୍ୟା ଦିଗରେ ଦୃଷ୍ଟି ଆକର୍ଷଣ କରିବା ପାଇଁ ଚେଷ୍ଟିତ ରହିବେ ବୋଲି ପ୍ରତିଶୃତି ନବନିର୍ବାଚିତ ସଭାପତି ସୁଶାନ୍ତ ପ୍ରଧାନ । ତେବେ ଏହି ନିର୍ବାଚନ ସୁରୁଖୁରୁରେ ଆୟୋଜିତ ହୋଇ ଫଳାଫଳ ମଧ୍ୟ ପ୍ରକାଶ ପାଇଛି।
ଇଟିଭି ଭାରତ, ଝାରସୁଗୁଡ଼ା
