ଝାରସୁଗୁଡ଼ା: ଜିଲ୍ଲାର ବ୍ରଜରାଜନଗର ଥାନା ଅନ୍ତର୍ଗତ ରାମପୁର ଫାଣ୍ଡି ବୁନ୍ଦିଆ ଗାଁରେ କାଳୀପୂଜା ସାଂସ୍କୃତିକ କାର୍ଯ୍ୟକ୍ରମରେ 3 ଯୁବକଙ୍କ ଉତ୍ପାତ । ସାଂସ୍କୃତିକ କାର୍ଯ୍ୟକ୍ରମ ଚାଲିଥିବା ବେଳେ ସେମାନେ ଖୋଲାଖୋଲି ଭାବେ ହାତରେ ଖଣ୍ଡା ଓ ବନ୍ଧୁକ ଦେଖାଇ ଲୋକଙ୍କୁ ଭୟଭୀତ କରିଥିଲେ । ଉପସ୍ଥିତ ଲୋକେ ସେମାନଙ୍କୁ କାବୁ କରି ପୋଲିସର ଜିମା ଦେଇଥିଲେ ।
ପ୍ରତ୍ୟେକ୍ଷଦର୍ଶୀଙ୍କ କହିବା ଅନୁସାରେ କାର୍ଯ୍ୟକ୍ରମ ଶାନ୍ତି ଶୃଙ୍ଖଳା ସହ ଚାଲିଥିଲା। ରାତି 2ଟା ବେଳେ ସେହି ଅଞ୍ଚଳର ଦିନେଶ ଖଡ଼ିଆ, ହରବିନନ୍ଦ ସହିସ, ଗଣେଶ ରାଉତ ମାତାଲ ଅବସ୍ଥାରେ ପହଞ୍ଚିଥିଲେ । ଆଉ ହାତରେ ବନ୍ଧୁକ ଓ ଖଣ୍ଡା ଧରି ହୋହଲ୍ଲା କରିଥିଲେ । ଉପସ୍ଥିତ ଲୋକେ ସେମାନଙ୍କୁ ଧରିବାକୁ ଉଦ୍ୟମ କଲା ବେଳେ ଜଣେ ଫେରାର ହୋଇଥିଲା ।
ଲୋକେ 2 ଜଣକୁ କାବୁ କରିଥିଲେ ଓ ପୋଲିସକୁ ସୂଚନା ଦେଇ ବନ୍ଧୁକ ଓ ଖଣ୍ଡା ସହ ଉଭୟଙ୍କୁ ହସ୍ତାନ୍ତର କରିଥିଲେ । ପୋଲିସ 2 ମାତାଲ ଯୁବକଙ୍କୁ ନିଜ ହେପାଜତକୁ ନେବା ସହ ବନ୍ଧୁକ ଓ ଖଣ୍ଡା ଜବତ କରିଛି। ବ୍ରଜରାଜନଗର ପୋଲିସ ପରେ ସମସ୍ତଙ୍କୁ ଗିରଫ କରିବା ସହ ଜବତ ବନ୍ଧୁକ ଏକ ଖେଳନା ବନ୍ଧୁକ ବୋଲି ସ୍ପଷ୍ଟ କରିଛି।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
