ଝାରସୁଗୁଡା: ଆମରଣ ଅନଶନରେ ବିସ୍ଥାପିତ । ହୀରକୁଦ ନଦୀବନ୍ଧ ଯୋଜନାରେ ବିସ୍ଥାପିତଙ୍କୁ 10 ଡେସମିଲ ଜମି ପ୍ରଦାନ ଦାବିରେ ସୋମବାର ଲଖନପୁର ବ୍ଲକ ତହସିଲ କାର୍ଯ୍ୟାଳୟ ସମ୍ମୁଖରେ ବିସ୍ଥାପିତଙ୍କ ଅନଶନ ।
ପୂର୍ବରୁ କରାଯାଇଥିବା ଅନଶନରେ ହୀରାକୁଦ ବିସ୍ଥାପିତଙ୍କ ସମସ୍ୟା ସମାଧାନ କରି 10 ଡେସମିଲ ଜାଗା ପ୍ରଦାନ କରିବା ପାଇଁ ପ୍ରତିଶୃତି ଦେଇଥିଲେ ଜିଲ୍ଲାପାଳ । ହେଲେ ତାଙ୍କ ପ୍ରତିଶୃତିକୁ ଅନେକ ଦିନ ବିତି ଯାଇଥିଲେ ହେଁ ପ୍ରଶାସନପକ୍ଷରୁ କୌଣସି ପଦକ୍ଷେପ ନିଆଯାଇନଥିବାରୁ ସୋମବାର ଏହି ବିସ୍ଥାପିତ ପୁନଶ୍ଚ ଅନଶନ ଆରମ୍ଭ କରିଛନ୍ତି ।
ତେବେ 26 ହଜାରରୁ ଅଧିକ ହୀରାକୁଦ ନଦୀବନ୍ଧ ଦ୍ବାରା ବିସ୍ଥାପିତ ପରିବାରର ଏପର୍ଯ୍ୟନ୍ତ ବକେୟା ପ୍ରାପ୍ତ ଓ ଥଇଥାନ ପାଇପାରିନାହିଁ । ଏହି ପ୍ରସଙ୍ଗଟି ସରକାରୀ, ମାନବଧିକାର କମିଶନ ଓ ନ୍ୟାୟାଳୟରେ ବିଚାରାଧୀନ ରହିଛି । ଦୀର୍ଘ 62 ବର୍ଷ ହେଲାଣି ବିସ୍ଥାପିତଙ୍କ ସମସ୍ୟାର ସମାଧାନ ହୋଇପାରୁନାହିଁ ।
17 ବର୍ଷ ପୂର୍ବେ ରାଜ୍ୟ ସରକାର ଏହି ଏମାନଙ୍କୁ 10 ଡେସମିଲ ଜମି ଯୋଗାଇ ଦେବା ପାଇଁ ରାଜସ୍ବ ବିଭାଗକୁ ନିଦ୍ଦେର୍ଶନାମା ଜାରି କରିଥିଲେ ମଧ୍ୟ ବିଭାଗୀୟ ଅବହେଳା ଯୋଗୁଁ ଏମାନଙ୍କୁ ଏପର୍ଯ୍ୟନ୍ତ ଜମି ମିଳିପାରି ନାହିଁ । ତେଣୁ ଲୋକଙ୍କୁ ଜମି ନମିଳିଲା ଯାଏଁ ଏହି ଆମରଣ ଅନଶନ ଚାଲୁରହିବ ବୋଲି ଚେତାବନୀ ଦିଆଯାଇଛି ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
