ଝାରସୁଗୁଡା: ପୋଲିସ ଓ ଲୁଟେରା ଗାଡି ମୁହାଁମୁହିଁ ଧକ୍କା । ଘଟଣାରେ ଜଣେ ଲୁଟେରା ପ୍ରାଣ ହରାଇ ଥିବାବେଳେ ଆଉ ଜଣେ ଗୁରୁତର ଆହତ ହୋଇଥିବା ଜଣାପଡିଛି । ଝାରସୁଗୁଡା ଜିଲ୍ଲା ବନହରପାଲି ଥାନା ଅନ୍ତର୍ଗତ ଖେରୁଆଲବାହାଲ ଗ୍ରାମରେ ଘଟିଛି ଏହି ଦୁର୍ଘଟଣା । ମୃତକ ଜଣକ ଧର୍ମେନ୍ଦ୍ର ଖଡ଼ିଆ ଏବଂ ଗୁରୁତର ଜଣକ ସପନ ରୋହିଦାସ ବୋଲି ଜଣାପଡିଛି | ତେବେ ସପନକୁ ବେଲପାହାଡ ସ୍ଥିତ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି |
ସୂଚନା ଅନୁଯାୟୀ, ଝାରସୁଗୁଡାର ଲଖନପୁର ଥାନ ଅନ୍ତର୍ଗତ ଟାଙ୍ଗରପାଲି ଛକ ନିକଟରେ ବାଇକରେ ଆସୁଥିବା ଏକ ଘରୋଇ ମାଇକ୍ରୋ ଫାଇନାନ୍ସ କମ୍ପାନୀର କର୍ମଚାରୀ ଓ ତାଙ୍କ ସ୍ତ୍ରୀଙ୍କଠାରୁ ପ୍ରଥମେ ଲୁଟ ଉଦ୍ୟମ ଓ ପରେ ଛୁରାମାଡ଼ କରି ଫେରାର୍ ହୋଇଯାଇଥିଲେ ଏହି ଦୁଇ ଲୁଟେରା । ସମ୍ପୃକ୍ତ ବ୍ୟକ୍ତି ଏନେଇ ଲଖନପୁର ପୋଲିସକୁ ତୁରନ୍ତ ସୂଚନା ଦେଇଥିଲେ । ଏହାପରେ ଲଖନପୁର ପୋଲିସ ଓ ସୀମାବର୍ତ୍ତୀ ସମସ୍ତ ଥାନାର ପୋଲିସ ସଜାଗ ହୋଇ ଲୁଟେରାଙ୍କ ପିଛା କରୁଥିଲେ । ତେବେ ପୋଲିସ ଗାଡିକୁ ଦେଖି ଉଭୟ ଦ୍ରୁତ ଗତିରେ ଖସିଯିବାକୁ ଉଦ୍ୟମ କରୁଥିବା ବେଳେ ସେମାନଙ୍କର ପୋଲିସ ଗାଡି ସହ ଧକ୍କା ହେଇଥିଲା |
ଘଟଣାସ୍ଥଳରେ ଜଣକର ମୃତ୍ୟୁ ଘଟିଥିବା ବେଳେ ଅନ୍ୟ ଜଣକୁ ଗୁରୁତର ଅବସ୍ଥାରେ ବେଲପାହଡ଼ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଛି । ସେପଟେ ପୋଲିସ ଘଟଣାସ୍ଥଳରୁ ଏକ 7 ଏମଏମ ଗୁଳି ବିଶିଷ୍ଟ ମାଉଜର ସହ ଭୁଜାଲି ଓ ଲଙ୍କାଗୁଣ୍ଡ ଜବତ କରିଛି । ମୃତକ ଜଣକ ସମ୍ବଲପୁର ଜିଲ୍ଲା ରେଙ୍ଗାଲି ହୋଇଥିବା ବେଳେ ଗୁରୁତର ସପନ ରୋହିଦାସ ବ୍ରଜରାଜନଗର ଥାନା ଲମଟିବାହାଲ ଅଞ୍ଚଳର ବୋଲି ଜଣା ପଡିଛି । ଉଭୟ ପୂର୍ବରୁ ବିଭିନ୍ନ ଅପରାଧିକ ଗତିବିଧିରେ ସାମିଲ ଥିବା ଝାରସୁଗୁଡା ଏସପି ଅଶ୍ବିନୀ ମହାନ୍ତି ସୂଚନା ଦେଇଛନ୍ତି ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
