ଯାଜପୁର: ଅଟୋ ଋଣ ଶୁଝିନପାରି ଯୁବକଙ୍କ ଆତ୍ମହତ୍ୟା ଉଦ୍ୟମ । କୋରୋନା କଟକଣା ଯୋଗୁଁ ଘରୁ ବାହାରିପାରୁନି ଅଟୋ । ବାରମ୍ବାର ଋଣପ୍ରଦାନକାରୀ ସଂସ୍ଥା ତାଗିଦର ଡର ଏବଂ ଗାଡି ନେଇଯିବା ଭୟରେ ନିଜ ଦେହରେ କିରୋସିନ ଢ଼ାଳି ଆତ୍ମହତ୍ୟା ଉଦ୍ୟମ କରିଛନ୍ତି ଯୁବକ ।
ଯାଜପୁର ଜିଲ୍ଲା ଦଶରଥପୁର ଗାଁର ଶଙ୍କର୍ଷଣ ସାହୁ ନିଜ ଦେହରେ କିରୋସିନ ଢ଼ାଳି ଆତ୍ମହତ୍ୟା ଉଦ୍ୟମ କରିଛନ୍ତି । ତାଙ୍କୁ ଗୁରୁତର ଅବସ୍ଥାରେ ଯାଜପୁର ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଛି । ସେ ପ୍ରାୟ ବର୍ଷକ ତଳେ ଋଣ କରି ଏକ ଅଟୋ ଚଳାଉଥିଲେ । କିନ୍ତୁ ଗତ ୪/୫ ମାସ ହେଲା କୋରୋନାର ଲକଡାଉନ ଏବଂ ସଟଡାଉନ ଯୋଗୁଁ ନିଜର କିସ୍ତି ଦେବାକୁ ଅସମର୍ଥ ହୋଇଥିଲେ ।
ସେପଟେ ଋଣ ପ୍ରଦାନକାରୀ ସଂସ୍ଥା ବାରମ୍ବାର ଶଙ୍କର୍ଷଣଙ୍କ ଉପରେ ଋଣ ପଇଠ କରିବା ପାଇଁ ଚାପ ପ୍ରୟୋଗ କରୁଥିଲେ । ଋଣ କରି ଅଟୋ କରିଥିବା ଯୁବକଙ୍କ ପାଇଁ ଶୁଝିବା କଷ୍ଟକର ହୋଇପଡିଥିଲା । ଏପରିକି ଗାଡି ଫେରସ୍ତ ନେଇଯିବାକୁ ମଧ୍ୟ ଧମକ ଦେଉଥିଲେ । ଏଥିରେ ଭୟଭୀତ ହୋଇ ଶଙ୍କର୍ଷଣ ଆତ୍ମହତ୍ୟା ଉଦ୍ୟମ କରିଛନ୍ତି । ବର୍ତ୍ତମାନ ତାଙ୍କ ଅବସ୍ଥା ଗୁରୁତର ରହିଛି ।
ଯାଜପୁରରୁ ଜ୍ଞାନରଞ୍ଜନ ଓଝା,ଇଟିଭି ଭାରତ
