ଯାଜପୁର: କଳିଙ୍ଗନଗର ଶିଳ୍ପାଞ୍ଚଳର ଅନ୍ତର୍ଗତ ନୀଳାଚଳ ଇସ୍ପାତ୍ କର୍ତ୍ତୃପକ୍ଷଙ୍କ ଚୁକ୍ତି ଖିଲାପ, ୧୦ମାସର ବକେୟା ଦରମା ଦାବିରେ ଧାରଣା ଦେଇଥିବା ଦେଖିବାକୁ ମିଳିଛି । ନୀଳାଚଳ ଇସ୍ପାତ୍ କାରଖାନା ପରିସରରେ ଦାନଗଦୀ ତହସିଲ୍ ଅନ୍ତର୍ଗତ ନଡିଆଭଙ୍ଗା ମୌଜାରେ ଥିବା ରେଳଲାଇନ୍ ଉପରେ ଧାରଣାରେ ବସି ରହିଛନ୍ତି କାରଖାନାର ଶ୍ରମିକ କର୍ମଚାରୀ । ଶ୍ରମିକ ଓ କର୍ମଚାରୀମାନେ ,ଗତକାଲି ସକାଳ ଠାରୁ ଏଠାରେ ଧାରଣାରେ ବସିରହିଥିଲେ ହେଁ ରାତି ପର୍ଯ୍ୟନ୍ତ ଏହାର ସମାଧାନ ହୋଇପାରିନଥିବା ଦେଖାଯାଇଛି । ଆଜି ମଧ୍ୟ ଧାରଣା ବଳବତ୍ତର ରଖିଛନ୍ତି ଶ୍ରମିକ। ଦରମା ନମିଳିବା ପର୍ଯ୍ୟନ୍ତ ଅହୋରାତ୍ର ଧାରଣା ଜାରି ରହିବ ବୋଲି କର୍ମଚାରୀ ସଂଘ ତରଫରୁ ଚେତାବନୀ ଦିଆଯାଇଛି ।
ସୂଚନା ଅନୁସାରେ କାରଖାନା ଭିତରେ ଗଚ୍ଛିତ ଥିବା ଗୋଟିଏ ରାକ୍ ଉତ୍ପାଦିତ ଦ୍ରବ୍ୟ ବିକ୍ରି କରାଯାଇ ୧୫ ଦିନର ଦରମା ଏବଂ ପିଏଫ ଜମା କରିବାକୁ ଜିଲ୍ଲା ପ୍ରଶାସନ ଉପସ୍ଥିତରେ କମ୍ପାନୀ କର୍ତ୍ତୁପକ୍ଷଙ୍କ ସହ ଚୁକ୍ତି ହୋଇଥିଲା । କମ୍ପାନୀ କର୍ତ୍ତୃପକ୍ଷ ମଧ୍ୟ ସହମତି ପ୍ରକାଶ କରିଥିଲା ।ମାତ୍ର ୨ ରାକ୍ ଯାଇ ୩ ରାକ ପାଇଁ ଲୋଡିଙ୍ଗ ଚାଲିଥିବା ବେଳେ ଏଯାଏ ଶ୍ରମିକ କର୍ମଚାରୀଙ୍କୁ ସେହି ଦରମା ଦିଆଯାଇନଥିବା ଅଭିଯୋଗ ହୋଇଛି । ଏଥିପାଇଁ ସମସ୍ତ ଶ୍ରମିକ ୟୁନିୟନ ଓ ମିଳିତ ମଞ୍ଚ ପକ୍ଷରୁ କର୍ମଚାରୀମାନେ ଅହରାତ୍ର ଧାରଣାରେ ବସିରହିଛନ୍ତି । ସମସ୍ୟାର ସମାଧାନ ନହେବା ଯାଏ ଧାରଣା ପ୍ରତ୍ୟାହୃତ ହେବ ନାହିଁ ବୋଲି ଶ୍ରମିକ ସଂଗଠନ ପକ୍ଷରୁ ସ୍ପଷ୍ଟ କରାଯାଇଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
