ଯାଜପୁର: ଟଙ୍କା ନେଣ ଦେଣକୁ କେନ୍ଦ୍ର କରି ମହିଳାଙ୍କୁ ଗଛରେ ବାନ୍ଧି ମାଡ । ଏପରି ଅଭାବନୀୟ ଘଟଣା ଦେଖିବାକୁ ମିଳିଛି ,ଧର୍ମଶାଳା ଥାନା ଅଧୀନ ବନ୍ଧଡିହ ପଞ୍ଚାୟତରେ । ଜୟସଙ୍ଗଡ଼ା ଗ୍ରାମର ଜଣେ ବିବାହିତ ମହିଳାଙ୍କୁ ଗଛରେ ବାନ୍ଧି ମାଡ଼ ମାରିବା ଘଟଣାର ଭିଡିଓ ଏବେ ଭାଇରାଲ ହେବା ପରେ ସ୍ଥାନୀୟ ଅଞ୍ଚଳରେ ଆଲୋଡନ ସୃଷ୍ଟି କରିଛି । ଘଟଣା ସମ୍ପର୍କରେ ଅଭିଯୋଗ ହୋଇନଥିବା ବେଳେ ଭାଇରାଲ ଭିଡିଓ ଆଧାରରେ ନିଜ ଆଡୁ ତଦନ୍ତ ଆରମ୍ଭ କରିଛି ପୋଲିସ ।
ଘଟଣାକୁ ନେଇ ମିଳିଥିବା ସୂଚନା ଅନୁସାରେ ଜୟସଙ୍ଗଡ଼ା ଗ୍ରାମର ବିକାଶ କୁମାର ରାଉତଙ୍କ ସ୍ତ୍ରୀ ବିଶ୍ଵାମିତ୍ରା ରାଉତ ଗ୍ରାମର ଅନ୍ୟଜଣେ ମହିଳାଙ୍କୁ କିଛି ଟଙ୍କା ଧାର ସୂତ୍ରରେ ଦେଇଥିଲେ । ଦୁଇ ମାସ ପରେ ଧାର ଟଙ୍କା ମାଗିବାରୁ ମହିଳାଙ୍କୁ ଟଙ୍କା ନେଇଥିବା ପରିବାର ଲୋକେ ସଂଘବଧ ଭାବେ ଆକ୍ରମଣ କରିବା ସହ ମହିଳାଙ୍କୁ ଗଛରେ ବାନ୍ଧି ମାଡ଼ ମାରିଥିଲେ । ଯାହାର ଏକ ଭିଡ଼ିଓ ଭାଇରାଲ ହୋଇଛି । ସ୍ଥାନୀୟ କିଛି ଲୋକ ଘଟଣାସ୍ଥଳରେ ପହଞ୍ଚି ମହିଳାଙ୍କୁ ଉଦ୍ଧାର କରିଥିଲେ । ତେବେ ଏ ନେଇ ଥାନାରେ କୌଣସି ଲିଖିତ ଅଭିଯୋଗ ହୋଇ ନଥିବାବେଳେ ପୋଲିସ ନିଜ ଆଡୁ ପ୍ରାଥମିକ ତଦନ୍ତ ଚଳାଇଛି । ଏଭଳି ଘଟଣାକୁ ବିଭିନ୍ନ ମହଲରେ ନିନ୍ଦା କରାଯାଇଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
