ଯାଜପୁର: ବିନା ସହାୟତାରେ ଉଠୁନି ଗୋଡ । ଭେଣ୍ଡା ପୁଅର ଅଶାବାଡି ଏବେ ବୃଦ୍ଧ ବାପା-ମା। ପୁଅର ଚିକିତ୍ସାରେ ସର୍ବସ୍ବାନ୍ତ ପରିବାର। ଏପରିକି 2 ଓଳି 2 ମୁଠା ଖାଇବାକୁ ଏବେ ଡହଳ ବିକଳ ଏଇ 3 ପ୍ରାଣୀ କୁଟୁମ୍ବ । ସାହାଯ୍ୟ ପାଇଁ ବାରମ୍ବାର ଗୁହାରୀ ପରେ ମିଳିଛି କେବଳ ପ୍ରତିଶ୍ରୁତି । ଏଥିମଧ୍ୟରେ ଅନେକ ବର୍ଷ ବିତି ଯାଇଥିଲେ ସୁଦ୍ଧା ପ୍ରଶାସନ ଚୁପ । କୋହ ଓ ରାଗ ଭରା କଣ୍ଠରେ ଦୁଃଖ ବଖାଣୁଥିବା ବେଳେ ଛଳଛଳ ହୋଇଯାଉଛନ୍ତି ଯାଜପୁର ଜିଲ୍ଲା ସକରଣ ଗାଁର ଲକ୍ଷ୍ମୀପ୍ରିୟା ।
ଭରତ ଓ ଲକ୍ଷ୍ମୀପ୍ରିୟାଙ୍କ ପୁଅ ଦୀପକ । ପିଲାବେଳୁ ଭଲ ପାଠସାଠରେ ବେଶ ପାରଙ୍ଗମ ଥିଲେ । ସବୁକିଛି ଭଲ ଚାଲିଥିଲା । ହେଲେ ହଠାତ ମେରୁଦଣ୍ଡ (ସ୍ପାଇନାଲ କଡ) ରେ ଆଘାତ ଲାଗିବା ଯୋଗୁଁ ସେ ପାଲଟିଯାଇଥିଲେ ପଙ୍ଗୁ। ଚିକିତ୍ସା ପାଇଁ ପରିବାର ଠାରୁ ଆରମ୍ଭ କରି ପରିଜନ ସମସ୍ତେ ସାହାଯ୍ୟ କଲେ । ହେଲେ ଦୀପକଙ୍କ ଏହି ବଡ କ୍ଷତିକୁ ଏହି ସାହାଯ୍ୟ ସମୁଦ୍ରକୁ ସଙ୍ଖେ ସଦୃଶ । ଏତେ ପରେ ବି ବାପା ମା’ ହାର ମାନିନ ଥିଲେ । ଘର , ଜମି ସବୁ ବିକିଦେଲେ । କିନ୍ତୁ ନିଜ ଗୋଡରେ ଠିଆ ହୋଇପାରିଲେନି ଦୀପକ । ଏ ନେଇ ଭଙ୍ଗା ଗୋଡ ଧରି ନିଜେ ଦୀପକ ମଧ୍ୟ ଅଖିଆ , ଅପିଆରେ ରାତି ଅନିଦ୍ରା ରହି ବାରମ୍ବାର ପ୍ରଶାସନର ଦ୍ବାରସ୍ଥ ହୋଇଥିଲେ । ଦେଖୁ ଦେଖୁ 3ଟି ବିଡିଓ ବଦଳିଗଲେ କିନ୍ତୁ ବଦଳିଲାନି ଦୀପକଙ୍କ ସ୍ଥିତି । ଶେଷରେ ସହାନୁଭୂତି ଦେଖାଇ ଭିନ୍ନକ୍ଷମ କାର୍ଡଟିଏ ଦେଇ ଦାୟିତ୍ବ ସାରିଦେଲା ପ୍ରଶାସନ ।
ଦୀପକଙ୍କ ବାପା ଜଣେ ଡ୍ରାଇଭର ଓ ମାଆ ସରକାରୀ ସ୍କୁଲର ରୋଷେୟା । ଆଉ ଦୀପକଙ୍କ ଭତ୍ତା ବାବଦକୁ ମାସକୁ ମାତ୍ର 700 ଟଙ୍କା । ଘର ଭଡା ମଧ୍ୟ ବର୍ଷେ ହେଲା ଦିଆଯାଇପାରୁନି । ଏପରି ସ୍ଥିତିରେ ଚୁଲି ଜଳିବା କଷ୍ଟକର ହୋଇପଡିଥିବା ବେଳେ ଦାମୀ ହସ୍ପିଟାଲରେ ଚିକିତ୍ସା କଥା ଭାବିଲେ ମୁଣ୍ଡ କାମ କରୁନି ।
ତେବେ ଆତ୍ମନିର୍ଭରଶୀଳ ହେବାକୁ ପିଲାଙ୍କୁ ଟ୍ୟୁସନ କରୁଛନ୍ତି ଦୀପକ । ଆଗକୁ ପଢିବାର ମଧ୍ୟ ଲକ୍ଷ୍ୟ ସେ ରଖିଥିବା ଚାରି ସେ ଆଡୁ ନିରାଶ ହୋଇପଡି଼ଛନ୍ତି । ଏପରିକି ସହାୟତା ନ ମିଳିଲେ ସେ ଆତ୍ମହତ୍ୟା କରିବେ ବୋଲି କହିଛନ୍ତି ।
ଏ ସମ୍ପର୍କରେ ଆମେ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିବା ପରେ ସରକାରୀ ଯୋଜନାରେ ସମସ୍ତ ପ୍ରକାର ସାହାଯ୍ୟ ଯୋଗାଇ ଦିଆଯିବ ବୋଲି ପ୍ରତିଶୃତି ଦେଇଛନ୍ତି ଜିଲ୍ଲାପାଳ ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
