ଯାଜପୁର: ବର୍ତ୍ତମାନ ନିର୍ବାଚନ ମାହୋଲ ଚାଲିଥିବା ବେଳେ ପ୍ରାୟ ସମସ୍ତ ଦଳ, ଦଳୀୟ ଶୃଙ୍ଖଳା ରକ୍ଷା କରିବା ଉପରେ ଜୋର ଦେଉଛନ୍ତି । ମାତ୍ର ରାଜ୍ୟରେ ସରକାର ଗଢିବାକୁ ସ୍ବପ୍ନ ଦେଖୁଥିବା କଂଗ୍ରେସର ଏହାର ବ୍ୟତିକ୍ରମ ଦେଖିବାକୁ ମିଳିଛି । ଦଳୀୟ ଟିକେଟ ବଣ୍ଟନକୁ କେନ୍ଦ୍ର କରି ଦଳରେ ଚାଲିଥିବା ଅନ୍ତର୍ବିବାଦ ଏବେ ଗୁରୁତର ଅବସ୍ଥା ଆଡକୁ ଗତି କଲାଣି । କହିବାକୁ ଗଲେ ଘରୋଇ କଳି ଏବେ ଦାଣ୍ଡରେ ପଡି ହାଟରେ ଗଡିବା ଭଳି ଅବସ୍ଥାକୁ ଚାଲି ଗଲାଣି ଦଳ ।
ଏହାର ପ୍ରଭାବରେ ଆଗାମୀ ଦିନରେ ଦଳ ଯେ ବଡ ଧରଣର ବିପର୍ଯ୍ୟୟକୁ ସାମ୍ନା କରିବ ସେ ସମ୍ଭାବନା ବର୍ତ୍ତମାନ ଠାରୁ ଜଳ ଜଳ ହୋଇ ଦିଶିଲାଣି । ଦଳୀୟ ଟିକେଟ ପାଇବାକୁ ନେଇ ଚାଲିଥିବା ବିଦ୍ରୋହ ପ୍ରଶମିତ ହେବାର ନାଁ ଧରୁନାହିଁ। ସ୍ଥିତି ଏପରି ଯେ ଟିକେଟ ପାଇବା ପରେ ମଧ୍ୟ ନିର୍ବାଚନ ଲଢିବାକୁ ସଫା ସଫା ମନା କରି ଦେଉଛନ୍ତି ଦଳୀୟ ପ୍ରାର୍ଥୀ ।
ଗତ 6 ତାରିଖରେ ସ୍ମୃତିରେଖା ପହି ନାମକ ଜଣେ ମହିଳା କଂଗ୍ରେସ ପ୍ରାର୍ଥୀ ଭାବେ ଧର୍ମଶାଳା ଆସନ ପାଇଁ ନାମାଙ୍କନ ପତ୍ର ଦାଖଲ କରିଥିଲେ । ତାଙ୍କ ପରେ କଂଗ୍ରେସରୁ ପୂର୍ବତନ ଧର୍ମଶାଳା ବ୍ଲକ ଅଧକ୍ଷ କିଶାନ ପଣ୍ଡା ମଧ୍ୟ ଦଳୀୟ ଆଶାୟୀ ଭାବେ ପ୍ରାର୍ଥିପତ୍ର ଦାଖଲ କରିଛନ୍ତି । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି ଏ ପର୍ଯ୍ୟନ୍ତ ଔପଚାରିକ ଭାବେ କାହାକୁ ଦଳୀୟ ଟିକେଟ ମିଳିନାହିଁ ।
ପ୍ରାର୍ଥୀ ହେବା ସମ୍ପର୍କରେ ପ୍ରତିକ୍ରିୟା ରଖି କିଶାନ ପଣ୍ଡା କହିଛନ୍ତି ଯେ, ଦଳୀୟ ହାଇକମାଣ୍ଡଙ୍କ ପ୍ରସ୍ତାବ ଓ ପ୍ରତିଶ୍ରୃତିକୁ ଆଧାର କରି ନାମାଙ୍କନ ପତ୍ର ଦାଖଲ କରିଛି । ମାତ୍ର ଶେଷ ମୂହୁର୍ତ୍ତ ଯାଏ ମଧ୍ୟ ସେ ଦଳୀୟ ଟିକେଟ ହାତେଇ ନଥିବା ଜଣାପଡିଛି । ପ୍ରାର୍ଥୀପାତ୍ର ଯାଞ୍ଚ ପୂର୍ବରୁ ତାଙ୍କୁ ଟିକେଟ ମିଳିବ ବୋଲି ଆଶାବାଦୀ ଅଛନ୍ତି ସେ ।
ସେପଟେ ସ୍ମୃତିରେଖା ପହି ଦଳୀୟ ଆଶାୟୀ ଭାବେ ନାମାଙ୍କନ ପତ୍ର ଦାଖଲ କରିବା ପରେ ଏ ଘଟଣା ଚର୍ଚ୍ଚାର ବିଷୟ ପାଲଟିଥିଲା । ଏନେଇ ନିଜର ପ୍ରତିକ୍ରିୟା ରଖି ସ୍ମୃତିରେଖା କହିଛନ୍ତି ଯେ, ତାଙ୍କୁ ହିଁ ଟିକେଟ ମିଳିଛି । ଅନ୍ୟ କାହାକୁ ଟିକେଟ ମିଳିବା କଥା ତାଙ୍କୁ ଜଣାନାହିଁ । ପ୍ରାର୍ଥୀପତ୍ର ଦାଖଲ କରିବା ପୂର୍ବରୁ ତାଙ୍କୁ ଦଳୀୟ ଟିକେଟ ମିଳିନଥିବା ଜଣପଡିଛି।
ସେହିପରି ଜିଲ୍ଲାର ଅନ୍ୟତମ ବିଧାନସଭା ଆସନ ବଡଚଣା ମଧ୍ୟ ଟିକେଟ ବଣ୍ଟନକୁ ନେଇ ଆରମ୍ଭ ହୋଇଯାଇଛି ହାଇଭୋଲଟଜ ଡ୍ରାମା । ଏହି ଆସନ ପାଇଁ କଂଗ୍ରେସର ବରିଷ୍ଠ ନେତା ସୀତାକାନ୍ତ ମହାପାତ୍ରଙ୍କୁ ମିଳିଥିବା ଦଳୀୟ ଟିକେଟ । ମାତ୍ର ସେ ଏହାକୁ ପ୍ରତ୍ୟାଖ୍ୟାନ କରିବା ସହ ନିର୍ବାଚନ ଲଢିବାକୁ ମନା କରି ଦେଇଥିଲେ । ଶେଷ ମୂହୁର୍ତ୍ତରେ ପୂର୍ବତନ ଜିଲ୍ଲାପରିଷଦ ସଭ୍ୟ ଅଜୟ କୁମାର ସାମଲ ଏଠାକାର କଂଗ୍ରେସ ପ୍ରାର୍ଥୀ ଭାବେ ନାମାଙ୍କନ ପତ୍ର ଦାଖଲକରିଛନ୍ତି । ଦଳୀୟ ନିଷ୍ପତ୍ତିକୁ ସମ୍ମାନ ଜଣାଇ ନିଜର ପ୍ରାର୍ଥୀପତ୍ର ଦାଖଲ କରିଛନ୍ତି ବୋଲି ନିଜ ପ୍ରତିକ୍ରିୟାରେ କହିଛନ୍ତି ଅଜୟ । ନିର୍ବାଚନରେ ତାଙ୍କର ବିଜୟ ହେବ ବୋଲି ସେ ଆଶାବ୍ୟକ୍ତ କରିଛନ୍ତି ।
ଉଭୟ ଧର୍ମଶାଳା ଓ ବଡଚଣା ସମେତ ସମଗ୍ର ଜିଲ୍ଲାରେ କଂଗ୍ରେସର ଏଭଳି ସ୍ଥିତି ପାଇଁ ଦଳୀୟ କର୍ମୀଙ୍କ ସମେତ ନେତା ପ୍ରଦେଶ କଂଗ୍ରେସ କମିଟିର ସଭାପତି ନିରଞ୍ଜନ ପଟ୍ଟନାୟକଙ୍କୁ ହିଁ ଦାୟୀ କରିଛନ୍ତି । ଏହା ବିଜେଡି ଓ ବିଜେପିକୁ ସୁହାଇବ ବୋଲି ସେମାନେ କହିଛନ୍ତି । ଏହି ଦୁଇ ଆସନରେ କଂଗ୍ରେସର ପ୍ରାର୍ଥିତ୍ବକୁ ନେଇ ବିବାଦ ଘନେଇବାରେ ଲାଗିଛି। ଶେଷ ମୂହୁର୍ତ୍ତରେ ପ୍ରାର୍ଥୀ ଚୟନ କରିବା ଦଳ ପାଇଁ ଏବେ ମହଙ୍ଗା ପଡିବ ବୋଲି ସାଧାରଣରେ ଚର୍ଚ୍ଚା ହେଉଛି।
ଯାଜପୁରରୁ ଜ୍ଞାନରଞ୍ଜନ ଓଝା, ଈଟିଭି ଭାରତ
