ଯାଜପୁର: ବିପଦ ସଙ୍କୁଳ ଅବସ୍ଥାରେ ମାନପୁର ଓଭରବ୍ରିଜ୍ । କଳିଙ୍ଗନଗର ଶିଳ୍ପାଞ୍ଚଳକୁ ଯାତାୟାତର ସୁବିଧା ପାଇଁ କେନ୍ଦ୍ରରେଳ ବିଭାଗ ଓ ରାଜ୍ୟ ସରକାରଙ୍କ ମିଳିତ ସହଯୋଗରେ ନିର୍ମାଣ ହୋଇଥିଲା ମାନପୁର ଓଭରବ୍ରିଜ୍ । ମାତ୍ର ଏହି ବ୍ରିଜ୍ ଏବେ ଲୋକଙ୍କ ପାଇଁ ପାଲଟିଛି ବିପଦ । ପ୍ରତ୍ୟେକ ଦିନ ଏହି ବ୍ରିଜ୍ ଉପରେ ହଜାରହଜାର ସଂଖ୍ୟକ ଭାରିଯାନ ଯାଉଥିବାରୁ କେତେବେଳେ ଏହା ଭୁଶୁଡି ପଡିବା ଆଶଙ୍କାରେ ଚିନ୍ତା ପ୍ରକଟ କରିଛନ୍ତି ସ୍ଥାନୀୟବାସୀ ।
ସୂଚନା ଅନୁଯାୟୀ, କଳିଙ୍ଗନଗର ଶିଳ୍ପାଞ୍ଚଳକୁ ସଂଯୋଗ କରୁଥିବା ଯାଜପୁର ରୋଡ୍ ଡ଼ୁବୁରୀ ମୁଖ୍ୟ ରାସ୍ତାରେ ଥିବା ମାନପୁର ଓଭରବ୍ରିଜଟି ଏବେ ବିପଦ ସଙ୍କୁଳ ହୋଇପଡିଛି । ଏହି ଓଭରବ୍ରିଜ୍ ଉପରେ ପ୍ରତ୍ୟେକ ଦିନ ହଜାର ହଜାର ସଂଖ୍ୟକ ଭାରିଯାନ ଚଳାଚଳ କରୁଥିବା ବେଳେ ବ୍ରିଜ୍ର ଅନେକସ୍ଥାନରେ ଲୁହା ଛଡ଼ ବାହାରି ରହିଥିବା ଦେଖିବାକୁ ମିଳିଛି । ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି । ଅନେକ ସମୟରେ ଏହି ବ୍ରିଜ ଉପରେ ଶହ ଶହ ଗାଡି ଜାମ ହେଇବା କାରଣରୁ ଘଣ୍ଟାଘଣ୍ଟା ଟ୍ରାଫିକ ଜାମ ହେଉଥିବା ଦେଖିବାକୁ ମିଳୁଛି । ସେପଟେ ତୁରନ୍ତ ଦ୍ୱିତୀୟ ବ୍ରିଜ କାମ ସାରିବା ସହ ମାନପୁର ବ୍ରିଜର ମରାମତି ତୁରନ୍ତ କରିବା ପାଇଁ ସ୍ଥାନୀୟ ଲୋକେ ଦାବି କରିଛନ୍ତି ।
ଏହି ଓଭରବ୍ରିଜ୍ଟି କଳିଙ୍ଗନଗର ଶିଳ୍ପାଞ୍ଚଳର ଲାଇଫ୍ଲାଇନ୍ କୁହାଯାଉଥିବାବେଳେ ଏହି ଅଞ୍ଚଳରେ ୧୫ରୁ ଉର୍ଦ୍ଧ୍ବ କଳକରଖାନା ଗଢ଼ି ଉଠିଛି । ସେଥିପାଇଁ ପ୍ରତ୍ୟେକ ଦିନ ଯାଜପୁର ରୋଡ଼ ଡୁବୁରୀ ମୁଖ୍ୟ ରାସ୍ତାରେ ଗାଡ଼ି ଚଳାଚଳ ବୃଦ୍ଧି ପାଉଛି । ତେଣୁ ଯଥାଶୀଘ୍ର ମାନପୁର ଓଭରବ୍ରିଜ୍ ଉପରେ ଭାରିଯାନ ଚଳାଚଳ ସମ୍ପୂର୍ଣ୍ଣ ବନ୍ଦ କରିବାକୁ ଦାବି ହୋଇଛି । ଏଥିସହିତ ଅଧାପନ୍ତରିଆ ହୋଇପଡି ରହିଥିବା ବ୍ରିଜର ନିର୍ମାଣ କାର୍ଯ୍ୟ ଯଥାଶୀଘ୍ର ଶେଷ କରିବାକୁ ମଧ୍ୟ ଦାବି କରାଯାଇଛି ।
ଏହାକୁ ନେଇ ଜିଲ୍ଲାପାଳ ଚକ୍ରବର୍ତ୍ତୀ ସିଂ ରାଠୋର କହିଛନ୍ତି, "ଜମିଜମା ମାମଲା ପାଇଁ ଦ୍ବିତୀୟ ବ୍ରିଜ ନିର୍ମାଣ କାର୍ଯ୍ୟରେ ବାଧା ଉପୁଜୁଛି । ତେଣୁ ବ୍ରିଜ୍ ଉପରେ ଭାରିଯାନ ଚଳାଚଳ ବନ୍ଦ କରିବା ସହ ଦ୍ବିତୀୟ ବ୍ରିଜର ନିର୍ମାଣ କାର୍ଯ୍ୟ ଖୁବଶୀଘ୍ର ସାରିବାକୁ ଯୋଜନା ଚାଲିଛି । ପ୍ରଥମେ କୋଭିଡ ଏବଂ ପରେ ଜମି ଅଧିଗ୍ରହଣକୁ ନେଇ ବ୍ରିଜ୍ ନିର୍ମାଣ କାର୍ଯ୍ୟର ବାଧା ସୃଷ୍ଟି ହୋଇଛି । ଏହାର ସମାଧାନ କରାଯାଇ ଦ୍ବିତୀୟ ବ୍ରିଜ୍ ନିର୍ମାଣ କାର୍ଯ୍ୟ ଖୁବଶୀଘ୍ର ଶେଷ କରାଯିବ ।"
ଇଟିଭି ଭାରତ, ଯାଜପୁର
