ଯାଜପୁର: ଜିଲ୍ଲାରେ ଲକଡାଉନ କଟକଣାକୁ କଡାକଡି କରିଛି ଜିଲ୍ଲା ପ୍ରଶାସନ । କେବଳ ଦିନରେ ନୁହେଁ ରାତିରେ ବି ହେଉଛି ଲକ ଡାଉନ ଚେକିଂ । ଜିଲାରେ କୋରୋନା ସ୍ଥିତିକୁ ନିୟନ୍ତ୍ରଣ କରିବା ଲାଗି ପ୍ରଶାସନ ଅଣ୍ଟା ଭିଡିଛି । ଦିନ ରାତି ଏକ କରିଦେଇଛନ୍ତି ପ୍ରଶାସନିକ ଅଧିକାରୀ ।
ଯାଜପୁର ସହରର ବିଭିନ୍ନ ସ୍ଥାନରେ ସରକାରୀ ଅଧିକାରୀ ମାନେ ଉପସ୍ଥିତ ରହି ଗାଡି ଗୁଡିକର ଯାଞ୍ଚ କରୁଛନ୍ତି । ରାତ୍ରି ସମୟରେ କେବଳ ଡାକ୍ତରୀ ସେବା ବ୍ୟତୀତ ଅନ୍ୟ ସମସ୍ତ ପ୍ରକାର ଦୋକାନ ବଜାର ଓ ଗାଡିମଟର ଚଳାଚଳକୁ ବାରଣ କରାଯାଇଛି ।
ତେବେ କିଛି ଅମାନିଆ ରାତ୍ରି ସମୟରେ ଲକଡାଉନ ନିୟମର ଉଂଲଘନ କରୁଥିବା ଦେଖାଯାଉଛି । ସେମାନଙ୍କ ପ୍ରତି ପ୍ରଶାସନ କଠୋର ମନୋଭାବ ଗ୍ରହଣ କରୁଛି । ନିୟମ ଉଂଲଘନକାରୀଙ୍କୁ ଜରିମାନା ଆଦାୟ ସହ ଆବଶ୍ୟକ ପଡିଲେ କୋଭିଡ ଆଇନରେ ମଧ୍ୟ ଦଣ୍ଡିତ କରାଯିବ ବୋଲି ଚେତାବନୀ ଦିଆଯାଇଛି । ପ୍ରଶାସନ ପକ୍ଷରୁ ଅଧିକ ସଂକ୍ରମଣକୁ ରୋକିବା ଲାଗି ସମସ୍ତ ପ୍ରକାର ପ୍ରୟାସ କରାଯାଉଥିବା, ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ଇନ୍ଦ୍ରମଣି ନାୟକ କହିଛନ୍ତି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
