ଯାଜପୁର: ଜିଲ୍ଲା ଦଶରଥପୁର ବ୍ଳକ ମଙ୍ଗଳପୁର ପଞ୍ଚାୟତରେ ନିର୍ବାଚନ ପରବର୍ତ୍ତୀ ହିଂସା ଦେଖିବାକୁ ମିଳିଛି । ସରପଞ୍ଚ ନିର୍ବାଚନୀ ଫଳାଫଳକୁ କେନ୍ଦ୍ର କରି ଏହି ହିଂସାକାଣ୍ଡ ଘଟିଛି । ମଙ୍ଗଳପୁର ପଞ୍ଚାୟତ ନିର୍ବାଚନରେ ପ୍ରାର୍ଥୀ ପଙ୍କଜିନୀ ମହାପାତ୍ର ପରାଜିତ ହୋଇଥିଲେ । ଏହାପରେ ବିଜୟୀ ପ୍ରାର୍ଥୀ ସସ୍ମିତା ଧଳଙ୍କ ସମର୍ଥକ ପରାଜିତ ପ୍ରାର୍ଥୀ ପଙ୍କଜିନୀଙ୍କ ସମର୍ଥକ ଶମ୍ଭୁନାଥ ମଲ୍ଲିକଙ୍କ ଘରେ ଆକ୍ରମଣ କରିଥିବା ଅଭିଯୋଗ ହୋଇଛି ।
ବିଜୟୀ ପ୍ରାର୍ଥୀଙ୍କ ସମର୍ଥକମାନେ ଶମ୍ଭୁନାଥଙ୍କ ଘରେ ପଶି ତାଙ୍କୁ ଆକ୍ରମଣ କରିବା ସହ ବ୍ୟାପକ ଭଙ୍ଗାରୁଜା କରିଛନ୍ତି । ଏହି ଆକ୍ରମଣ ବେଳେ ପଙ୍କଜିନୀଙ୍କ ସ୍ବାମୀ ପ୍ରଦୀପ ମହାପାତ୍ର ମଧ୍ୟ ସେଠାରେ ଉପସ୍ଥିତ ରହିଥିଲେ । ସେ ମଧ୍ୟ ଗୁରୁତର ଭାବରେ ଆହତ ହୋଇଛନ୍ତି । ପଙ୍କଜିନୀଙ୍କ ସ୍ଵାମୀ ସମେତ ୬ଜଣ ଗୁରୁତର ହୋଇ ମଙ୍ଗଳପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଥିଲେ । ତେବେ ସେମାନଙ୍କ ମଧ୍ୟରୁ ସୁରେନ୍ଦ୍ର ଜେନା ନାମକ ବ୍ୟକ୍ତିଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଛି ।
ସେପଟେ ଏହାର ପ୍ରତିବାଦ କରି ପଙ୍କଜିନୀଙ୍କ ସମର୍ଥକମାନେ ଥାନା ଘେରାଉ କରିଛନ୍ତି । ତୁରନ୍ତ ଆକ୍ରମଣକାରୀଙ୍କୁ ଗିରଫ କରିବାକୁ ଦାବି କରିଛନ୍ତି । ଏହି ଘଟଣାରେ ଉଭୟ ପକ୍ଷରୁ ଦୁଇଟି ମାମଲା ମଙ୍ଗଳପୁର ଥାନାରେ ରୁଜୁ ହୋଇଛି । ଅଭିଯୋଗ ପରେ ଉଭୟ ଗୋଷ୍ଠୀର ୩ ଅଭିଯୁକ୍ତଙ୍କୁ ଅଟକ ରଖି ପୋଲିସ ତଦନ୍ତ ଆରମ୍ଭ କରିଥିବା ସୂଚନା ଦେଇଛନ୍ତି ଚଳାଇଥିବା ସୂଚନା ଦେଇଛନ୍ତି ଯାଜପୁର SDPO ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
