ଯାଜପୁର: କଳିଙ୍ଗନଗର ମୈଥାନ ଇସ୍ପାତ କାରଖାନାରେ ଲାଗି ରହିଥିବା ଅଚଳାବସ୍ଥା ଦୁର ହେବାକୁ ଯାଉଛି । ବିଗତ କିଛି ମାସ ଧରି କାରଖାନାର ଶ୍ରମିକ ଓ କର୍ମଚାରୀ ଦରମା ନପାଇ ଆନ୍ଦୋଳନ କରିବା ଫଳରେ କାରଖାନା ସମ୍ପୁର୍ଣ୍ଣ ବନ୍ଦ ହୋଇପଡିଥିଲା । ଜିଲା ପ୍ରଶାସନର ହସ୍ତକ୍ଷେପ ଫଳରେ ଏଭଳି ଅଚଳାବସ୍ଥା ଦୂର ହେବାକୁ ଯାଉଛି ।
ମଙ୍ଗଳବାର ଜିଲ୍ଲାପାଳ ରଞ୍ଜନ କୁମାର ଦାସଙ୍କ କାର୍ଯ୍ୟାଳୟ ପରିସରରେ କାରଖାନା କର୍ତ୍ତୃପକ୍ଷ, ଶ୍ରମିକ ସଂଗଠନ କଳିଙ୍ଗନଗର ମଜଦୁର ୟୁନିଅନ ଏବଂ ପ୍ରଶାସନ ମଧ୍ୟରେ ଆଲୋଚନା ହୋଇଥିଲା । ଏଥିରେ ମୁଖ୍ୟତଃ ଶ୍ରମିକ ମାନଙ୍କ ବକେୟା ପାଉଣା ଏବଂ ବୋନସ ସମ୍ପରକରେ ଉଚ୍ଚସ୍ତରୀୟ ଆଲୋଚନା କରାଯାଇଥିଲା । ଶ୍ରମିକ ୟୁନିଅନ ପକ୍ଷରୁ ପୂର୍ବତନ ମନ୍ତ୍ରୀ ପ୍ରଫୁଲ୍ଲ ଚନ୍ଦ୍ର ଘଡେଇ ଶ୍ରମିକ ମାନଙ୍କ ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରିଥିଲେ । ତୁରନ୍ତ ଶ୍ରମିକ ମାନଙ୍କର ବକେୟା ପାଉଣା ପ୍ରଦାନ ପାଇଁ ଦାବି ମଧ୍ୟ କରିଥିଲେ ।
କାରଖାନା ପକ୍ଷରୁ ନିର୍ଦ୍ଦେଶକ ସିପ୍ରା ସିଂ ଶ୍ରମିକ ମାନଙ୍କ ବକେୟା ପାଉଣା କିସ୍ତି ଆକାରରେ ପ୍ରଦାନ କରାଯିବ ବୋଲି ପ୍ରତିଶୃତି ଦେଇଥିଲେ । କାରଖାନା ଭଲ ସ୍ଥିତିକୁ ଆସିବା ପରେ ଶ୍ରମିକ ମାନଙ୍କର ସମସ୍ତ ଦାବି ପୁରଣ କରାଯିବ ବୋଲି ନିର୍ଦ୍ଦେଶକ କହିଥିଲେ । ଏହି ଆଲୋଚନାରେ କଳିଙ୍ଗନଗର ଅତିରିକ୍ତ ଜିଲାପାଳ ସନ୍ତୋଷ ମିଶ୍ର ସାମିଲ ହୋଇଥିଲେ । ପୂର୍ବରୁ ଶ୍ରମିକ ମାନଙ୍କର ସମସ୍ୟା ନେଇ ମଜଦୁର ୟୁନିଅନ କାରଖାନା ନିକଟରେ ରାସ୍ତାରୋକ କରିଥିଲା ଓ ପ୍ରଶାସନ ପକ୍ଷରୁ ଶ୍ରମିକ ମାନଙ୍କର ସମସ୍ୟା ସମାଧାନ ନେଇ ପ୍ରତିଶୃତି ଦିଆଯାଇଥିଲା ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
