ଯାଜପୁର: ଯାଜପୁର ବ୍ୟାସନଗରରେ ଶେଷ ହୋଇଛି ସହରର ଗଣପର୍ବ କାଳୀପୂଜା । ବିଳମ୍ବିତ ରାତିରେ ବିସର୍ଜ୍ଜନ ହୋଇଛି ମାଆଙ୍କ ମୃଣ୍ମୟୀ ମୂର୍ତ୍ତୀ । ଚଳିତ ବର୍ଷ 14ଟି ମଣ୍ଡପରେ ଦୀର୍ଘ 14 ଦିନ ଧରି ପୂଜା ପାଇଥିଲେ ମାଆ ଶ୍ୟାମାକାଳୀ କାଳୀପୂଜା । ଶେଷରେ ଶାନ୍ତିଶୃଙ୍ଖଳାରେ ସମ୍ପନ୍ନ ହୋଇଛି କାଳୀ ମେଲଣ ଓ ଭସାଣି ଉତ୍ସବ । ଦୀର୍ଘ 25 ବର୍ଷରେ ପଦାର୍ପଣ କରିଥିବା ଏହି କାଳୀମେଲଣ ଉତ୍ସବ ବେଶ ଧୁମଧାମରେ ପାଳିତ ହୋଇଥିଲା । ଏହି ଅବସରରେ ମେଲଣ ଉତ୍ସବର ରୌପ୍ୟ ଜୟନ୍ତୀ ସମାରୋହ ମଧ୍ୟ ପାଳିତ ହୋଇଥିଲା ।
ଉତ୍ସବରେ ମୁଖ୍ୟଅତିଥି ରୂପେ ରାଜ୍ୟ ଗ୍ରାମ୍ୟଉନ୍ନୟନ ଓ ଦକ୍ଷତା ବିକାଶ ମନ୍ତ୍ରୀ ଇଂ ପ୍ରୀତିରଞ୍ଜନ ଘଡ଼ାଇ ଯୋଗଦେଇଥିଲେ । ସେହିପରି ସ୍ଥାନୀୟ କୋରେଇ ବିଧାୟକ ଅଶୋକ କୁମାର ବଳ, ପୌରାଧ୍ୟକ୍ଷା ସଙ୍ଗୀତା ପିଙ୍ଗୁଆ, ଉପାଧ୍ୟକ୍ଷ ସୁବାସ ବଳ ପ୍ରମୁଖ ଅନ୍ୟତମ ଅତିଥି ରୂପେ ଯୋଗଦେଇଥିଲେ । ସହରର ସମସ୍ତ ମେଢ଼ ବିରାଟ ପଟୁଆରରେ ଆସି କାଳୀ ମେଲଣ ପଡିଆରେ ଏକତ୍ର ହୋଇଥିଲା । ଭସାଣୀ ଶୋଭାଯାତ୍ରାରେ ରାଜ୍ୟ ଏବଂ ରାଜ୍ୟ ବାହାରର ବିଭିନ୍ନ ଲୋକକଳା ଓ ଲୋକନୃତ୍ୟ ପ୍ରଦର୍ଶିତ ହୋଇଥିଲା । ଏଥିପାଇଁ ସାରା ସହର ଉତ୍ସବ ମୁଖରିତ ହୋଇ ଉଠିଥିଲା । ଏହାକୁ ଉପଭୋଗ କରିଥିଲେ ଲକ୍ଷାଧିକ ଦର୍ଶକ ।
କୋଭିଡ କଟକଣା ଯୋଗୁଁ ଗତ 2ବର୍ଷ ବନ୍ଦ ରହିଥିଲା ମେଲଣ ଉତ୍ସବ । ତେବେ ପୂର୍ବ ବର୍ଷ ମାନଙ୍କ ପରି ଏବର୍ଷ ବ୍ୟାସନଗର ସହରର ଚୋରଦା କାଳୀ ମେଲଣ ପଡିଆରେ ଜାକଜକମରେ ପାଳିତ ହୋଇଛି କାଳୀ ମେଲଣ ଉତ୍ସବ । ରାତି ତମାମ୍ ଖଚାଖଚ୍ ଦର୍ଶକରେ ପୁରିଉଠିଥିଲା ମେଲଣ ପଡିଆ । ରାସ୍ତାଘାଟ ସବୁ ଲୋକାରଣ୍ୟ ହୋଇଉଠିଥିଲା ।
ମେଢ ଗୁଡିକ ମଧ୍ୟରେ ଲାଗି ରହିଥିଲା ପ୍ରତିଯୋଗୀତା । ନାଚଗୀତ ଓ ବାଦ୍ୟଯନ୍ତ୍ର ସହିତ ବିରାଟ ପଟୁଆରରେ ମାଆଙ୍କୁ ନିଆଯାଇଥିଲା ମେଲଣ ପଡିଆକୁ । ମେଲଣ ଉତ୍ସବକୁ ସୁରୁଖୁରୁରେ ଉପଭୋଗ କରିଥିଲେ ଲକ୍ଷାଧିକ ଦର୍ଶକ । ଟ୍ରାଫିକ ଓ ଭିଡ ନିୟନ୍ତ୍ରଣ ପାଇଁ ପୋଲିସ ପ୍ରଶାସନ ପକ୍ଷରୁ ବ୍ୟାପକ ବନ୍ଦବୋସ୍ତ କରାଯାଇଥିଲା । ସୁରକ୍ଷା ଦୃଷ୍ଟିରୁ ବ୍ୟାପକ ପୋଲିସ ମୁତୟନ କରାଯାଇଥିଲା ।
ପ୍ରଥମ ଦିନରେ ୧୮ଟି ମାଆ କାଳୀ ଓ ଲକ୍ଷ୍ମୀନାରାୟଣଙ୍କ ମେଢ଼ ଭସାଣି ହୋଇଥିଲା । ବିଭିନ୍ନ ପୂଜା କମିଟି ପକ୍ଷରୁ ମେଢ ଗୁଡିକୁ ସୁନ୍ଦର ଭାବେ ସଜା ଯାଇଥିଲା । ବାଦ୍ୟ, ଘଣ୍ଟ, ସିଂଘ ବାଜା ତାଳେ ତାଳେ ମାଆଙ୍କୁ ଦେବୀଗଡ଼ାକୁ ବିସର୍ଜନ ନିମନ୍ତେ ନିଆଯାଇଥିଲା । ଏନେଇ ଜିଲ୍ଳା ପ୍ରଶାସନ ଓ ପୋଲିସ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଥିଲା ।
ଇଟିଭି ଭାରତ, ଯାଜପୁର
