ଯାଜପୁର: ପ୍ରତିଶୋଧ ପରାୟଣ ପ୍ରେମିକର ନାରକୀୟ କାଣ୍ଡ । ପ୍ରେମିକାର ପ୍ରତାରଣା ପ୍ରେମିକକୁ ସଜେଇଲା ହତ୍ୟାକାରୀ । ଏଭଳି ଏକ ଅମାନବୀୟ ଘଟଣା ଘଟିଛି ଯାଜପୁର ଜିଲ୍ଲା ସୁକିନ୍ଦା ଥାନା ଅନ୍ତର୍ଗତ ଦାମୋଦରପୁର ଗାଁରେ । ଦୁଇ ସାଥୀଙ୍କ ସହଯୋଗରେ ପ୍ରେମିକାର 2ୟ ପ୍ରେମିକକୁ ହତ୍ୟା କରିଛି ପ୍ରଥମ ପ୍ରେମିକ । ଘଟଣାରେ ଅଭିଯୁକ୍ତ ଓ ତାର 2 ସହଯୋଗୀଙ୍କୁ ଗିରଫ କରି କୋର୍ଟଚାଲାଣ କରିଛି ପୋଲିସ ।
ସୂଚନାନୁସାରେ, ଅଭିଯୁକ୍ତ ରଞ୍ଜନ ଦାମୋଦରପୁର ଗାଁର ନିବାସୀ ହୋଇଥିବାବେଳେ ପେସାରେ ଜଣେ ଟ୍ରକ୍ ଡ୍ରାଇଭର । ସେ ସେହି ଗାଁର ଜଣେ ଯୁବତୀଙ୍କୁ ଭଲ ପାଇଥିଲା । ଉକ୍ତ ଯୁବତୀ ଜଣକ ପ୍ରାୟ 3 ମାସରୁ ଊର୍ଦ୍ଧ୍ବ କାଳ ରଞ୍ଜନ ସହିତ ପ୍ରେମ ସମ୍ପର୍କ ରଖିଥିଲା । ପରେ ରଞ୍ଜନକୁ ପ୍ରେମରେ ପ୍ରତାରଣା କରି 2ୟ ପ୍ରେମିକ ଅଶୋକକୁ ଭଲପାଇ ବସିଥିଲା । ଯାହାକୁ ବରଦାସ୍ତ କରିପାରିନଥିଲା ରଞ୍ଜନ । ଏନେଇ ଅଶୋକ ସହ ରଞ୍ଜନ ବାରମ୍ବାର ଝଗଡା ମଧ୍ୟ କରୁଥିଲା । ଧୀରେଧୀରେ ଅଶୋକକୁ ନିଜ ରାସ୍ତାର କଣ୍ଟା ଭାବିନେଇଥିଲା ରଞ୍ଜନ । ଆଉ ଏହି କଣ୍ଟାକୁ ନିଜ ରାସ୍ତାରୁ ହଟାଇବା ପାଇଁ ସେ ଯୋଜନା ପ୍ରସ୍ତୁତ କରିଥିଲା । ନିଜ 2 ସହଯୋଗୀଙ୍କ ସହାୟତାରେ ଅଶୋକ ସମ୍ପର୍କରେ ସମସ୍ତ ତଥ୍ୟ ଏକାଠି କରିଥିଲା ।
ଗତ ବୁଧବାର ଦିନ ଅଶୋକ କୌଣସି କାମରେ ଘରୁ ବାହାରିବା ନେଇ ଖବର ପାଇଥିଲା ରଞ୍ଜନ । ସେ ଗାଁର ଅନତି ଦୂରରେ ଏକ ନିଛାଟିଆ ରାସ୍ତାରେ ଟ୍ରକ୍ ଧରି ଅଶୋକର ଆସିବା ବାଟକୁ ଅପେକ୍ଷା କରିଥିଲା । ଯୋଜନାମୁତାବକ ଅଶୋକ ସେହି ରାସ୍ତା ଦେଇ ଏକ ସ୍କୁଟିରେ ଆସିବା ବେଳେ ରଞ୍ଜନ ଦ୍ରୁତ ଗତିରେ ସାମନା ପଟରୁ ଟ୍ରକ ଚଢାଇ ଦୁର୍ଘଟଣାର ରୂପ ଦେବାକୁ ଚେଷ୍ଟା କରିଥିଲା । ଏହି ଟ୍ରକ ଧକ୍କାରେ ଘଟଣାସ୍ଥଳରେ ଅଶୋକର ମୃତ୍ୟୁ ହୋଇଥିଲା । କିନ୍ତୁ ଏହା ଏକ ଦୁର୍ଘଟଣା ନୁହେଁ ବରଂ ହତ୍ୟା ବୋଲି ସନ୍ଦେହ କରି ପରିବାର ପକ୍ଷରୁ ଥାନାରେ ଅଭିଯୋଗ ହୋଇଥିଲା । ଏଥିସହିତ ଘଟଣା ଦିନ ସ୍ଥାନୀୟ ବାସିନ୍ଦା ରାସ୍ତା ଅବରୋଧ କରିଥିଲେ ।
ସେପଟେ ଅଭିଯୁକ୍ତ ରଞ୍ଜନ ଜଣେ ଟ୍ରକ ଚାଳକ ହୋଇଥିବାରୁ ଦୁର୍ଘଟଣା ଘଟାଇବା ପରେ ଟ୍ରକ୍ ଛାଡି ଫେରାର ହୋଇଯାଇଥିଲେ । ତେବେ ପୋଲିସ ପରିବାରର ଅଭିଯୋଗକୁ ଆଧାର କରି ଘଟଣାର ତଦନ୍ତ ଚଳାଇଥିଲା । ପୋଲିସ ଏହି ଦୁର୍ଘଟଣା ଜନିତ ହତ୍ୟାକାଣ୍ଡର ପର୍ଦ୍ଦାଫାସ କରିବା ସହ ରଞ୍ଜନ ଏବଂ ତାର 2 ସହଯୋଗୀ ଚିନ୍ମୟ ମହାକୁଡ ଓ ପଞ୍ଚୁଆ ନାୟକକୁ ଗିରଫ କରିବାରେ ସଫଳ ହୋଇଛି । ଆଜି ଅପରାହ୍ନରେ ସେମାନଙ୍କୁ କୋର୍ଟ ଚାଲାଣ କରାଯିବ । ଏସମ୍ପୂର୍ଣ୍ଣ ମାମଲା ସମ୍ପର୍କରେ ଗଣମାଧ୍ୟମକୁ କଳିଙ୍ଗନଗର ଅତିରିକ୍ତ ଏସପି ରାଜକିଶୋର ଦୋରା ସୂଚନା ଦେଇଛନ୍ତି ।
ତ୍ରିକୋଣୀୟ ପ୍ରେମର କରୁଣ ପରିଣତି । ପ୍ରେମରେ ଅନ୍ଧ ପାଲଟିଥିବା ପ୍ରେମିକ ପାଇଁ ଜେଲର କାଳ କୋଠରୀ ଏବେ ସାଜିବ ବାସଘର ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
