ଯାଜପୁର: କାଳୀପୂଜା ପାଇଁ ଚଳଚଞ୍ଚଳ ହୋଇଉଠିଛି ବ୍ୟାସନଗର ସହର । ସହରରେ 13ଟି ମଣ୍ଡପରେ ପାଳିତ ହେଉଛି ମା’ କାଳୀଙ୍କ ପୂଜାର୍ଚ୍ଚନା । ମଣ୍ଡପରେ ସୁନ୍ଦର ସୁନ୍ଦର ତୋରଣ ନିର୍ମାଣ କରାଯାଇଥିବା ବେଳେ ରଙ୍ଗୀନ ଆଲୋକ ମାଳାରେ ଝଲସୁଛି ସାରା ସହର। ତେବେ ଆସନ୍ତା 6 ତାରିଖରେ ଅନୁଷ୍ଠିତ ହେବ ମା’ଙ୍କ ମେଲଣ ଯାତ୍ରା। ଯାହା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ହୋଇଛି ଯାଜପୁର ଜିଲ୍ଲା।
ବିଭିନ୍ନ ମଣ୍ଡପରେ ମା’ କାଳୀଙ୍କ ମୃଣ୍ମୟୀ ମୂର୍ତ୍ତୀ ପୂଜା ପାଇବା ସହ ଆଧୁନିକ ଓ ପୌରାଣିକ ଘଟଣାବଳୀକୁ ନେଇ ଗଢାଯାଇଛି ବାରୁଆଳି । ଏଥିସହ କେତେକ ମଣ୍ଡପରେ ମୀନାବଜାର ଓ ଦୋଳି ମଧ୍ୟ ସ୍ଥାନ ପାଇଛି । ଦର୍ଶକଙ୍କୁ ଆକୃଷ୍ଟ କରିବା ପାଇଁ ସନ୍ଧ୍ୟାରେ ଆୟୋଜିତ ହେଉଛି ମେଲୋଡି ଓ ଭଜନ ସଂନ୍ଧ୍ୟା ଭଳି ନାନା ପ୍ରକାର ସାଂସ୍କୃତିକ କାର୍ଯ୍ୟକ୍ରମ । ମେଳା ପରିସରରୁ ମା’ଙ୍କ ଦର୍ଶନ ସହିତ ଘରକରଣା ଜିନିଷ କ୍ରୟ କରୁଛନ୍ତି ଗୃହିଣୀ । ଚାଟ, ଗୁପଚୁପ ଭଳି ମଜାଦାର ଖାଦ୍ୟ ଖାଇ ମଜା ଉଠାଉଛନ୍ତି ଦର୍ଶକ। ମଣ୍ଡପ ନିକଟରେ ବିଳମ୍ବିତ ରାତ୍ରି ଯାଏ ମେଲୋଡି ନାଚଗୀତ ଭଳି ସାଂସ୍କୃତିକ କାର୍ଯ୍ୟକ୍ରମ ଉପଭୋଗ କରୁଛନ୍ତି । ମେଳାକୁ ଭଲ କରିବା ପାଇଁ କମିଟି ମଧ୍ୟରେ ପ୍ରତିଦ୍ବନ୍ଦିତା ଦେଖାଦେଇଛି ।
ଗତ ଅକ୍ଟୋବର 27 ତାରିଖ ରାତିରୁ କଳସ ବୁଡା ଯାଇ ଆରମ୍ଭ ହୋଇଥିଲା ମା’ କାଳୀଙ୍କ ପୂଜାର୍ଚ୍ଚନା । ସେଥିଲାଗି ପୋଲିସ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଛି। ସହରରେ ଟ୍ରାଫିକ ଓ ଭିଡ ନିୟନ୍ତ୍ରଣ ପାଇଁ ପୋଲିସ ପକ୍ଷରୁ ବ୍ୟାପକ ବନ୍ଦବୋସ୍ତ କରାଯାଇଛି । ସୁରକ୍ଷା ଦୃଷ୍ଟିରୁ ବିଭିନ୍ନ ସ୍ଥାନରେ ଅଧିକ ପୋଲିସ ମୁତୟନ କରାଯାଇଛି । ଦର୍ଶକ ମାନେ ସୁରୁଖୁରୁରେ ଦର୍ଶନ କରିବା ଓ ଯାତାୟାତ ପାଇଁ ରୁଟଚାଟ ମଧ୍ୟ ପ୍ରସ୍ତୁତ ହୋଇଛି । ପାନୀୟ ଜଳ, ସ୍ବାସ୍ଥ୍ୟ, ପରିମଳ ବ୍ୟବସ୍ଥା ଉପରେ ପ୍ରଶାସନ ପକ୍ଷରୁ ଗୁରୁତ୍ବ ଆରୋପ କରାଯାଇଛି । 5 ତାରିଖ ରାତିରେ ଶେଷ ହେବ କାଳୀପୂଜା ଉତ୍ସବ । 6 ତାରିଖ ଦିନ ହେବ ମେଳଣ ଉତ୍ସବ।
ଚୋରଦା କାଳୀ ମେଲଣ ପଡିଆରେ ଅନୁଷ୍ଠିତ ହେବ ଏହି ଉତ୍ସବ । ସହରର ପ୍ରାୟ ସମସ୍ତ ମଣ୍ଡପରୁ ମୂର୍ତ୍ତି ସବୁ ଶୋଭାଯାତ୍ରାରେ ଯାଇ ମେଲଣ ପଡିଆରେ ଏକତ୍ର ହେବେ। ମେଲଣ ସ୍ଥଳରେ ଲକ୍ଷାଧିକ ଲୋକଙ୍କ ସମାଗମ ହେବାର ସମ୍ଭାବନା ଥିବାରୁ ଆୟୋଜକଙ୍କ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଇଛି।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
