ଯାଜପୁର: ଭଦ୍ରକ ଆରଡ଼ି ଗସ୍ତ ସମୟରେ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କୁ ଯାଜପୁର ବିଜେପି ପକ୍ଷରୁ ସ୍ୱାଗତ ସମ୍ବର୍ଦ୍ଧନା ଦିଆଯାଇଛି । ଯାଜପୁର କିଆନାଳି ଛକଠାରେ ବିଜେପି ନେତା ଅମୀୟ ମଳିକଙ୍କ ନେତୃତ୍ୱରେ ଅନେକ ସଂଖ୍ୟାରେ ବିଜେପି କର୍ମକର୍ତ୍ତା ଏକତ୍ରିତ ହୋଇ ସାଂସଦ ଅପରାଜିତା ଷଡ଼ଙ୍ଗୀଙ୍କୁ ପୁଷ୍ପଗୁଚ୍ଛ ଦେଇ ସ୍ୱାଗତ କରିଥିଲେ ।
ଗତକାଲି (ଶୁକ୍ରବାର) ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ କୌଣସି କାର୍ଯ୍ୟକ୍ରମରେ ଯୋଗ ଦେବାକୁ ଭଦ୍ରକ ଆରଡ଼ି ଗସ୍ତ କରିଥିଲେ । ଏହି ସମୟରେ ଯାଜପୁର କିଆନାଳି ଛକଠାରେ ଜିଲ୍ଲା ବିଜେପି ପକ୍ଷରୁ ସାଂସଦଙ୍କୁ ବିପୁଳ ସମ୍ବର୍ଦ୍ଧନା ଦିଆଯାଇଥିଲା । ବିଜେପି ନେତା ଅମୀୟ ମଳିକ ନେତୃତ୍ୱରେ ଅନେକ ବିଜେପି କର୍ମକର୍ତ୍ତା ଏବଂ ଯାଜପୁରର ବୁଦ୍ଧିଜୀବୀ ମାନେ ସାମିଲ ହୋଇ ପୁଷ୍ପଗୁଚ୍ଛ ଦେଇ ସାଂସଦ ଅପରାଜିତା ଷଡ଼ଙ୍ଗୀଙ୍କୁ ସ୍ୱାଗତ କରିଥିଲେ । ଏହି ଅବସରରେ ମାଇନ୍ସ ସେକ୍ଟରରେ ହେଉଥିବା ବ୍ୟାପକ ଦୁର୍ନୀତିର ପ୍ରତିବାଦ କରିବାକୁ ଆହ୍ୱାନ ଦେଇଥିଲେ ସାଂସଦ ।
ଏହି ଅବସରରେ ସାଂସଦ ଅପରାଜିତା ଷଡ଼ଙ୍ଗୀ କହିଛନ୍ତି, "ଯାଜପୁରରେ ଭାରତୀୟ ଜନତା ପାର୍ଟିର କର୍ମୀଙ୍କ ମଧ୍ୟରେ ଏତେ ଉତ୍ସାହ ଦେଖି ବହୁତ ଖୁସି ଲାଗୁଛି । ଆଜି ସମସ୍ତଙ୍କ ସହିତ ଏଠାରେ ମିଶିବାକୁ ବହୁତ ଇଚ୍ଛା ଥିଲେ ମଧ୍ୟ ସମୟ ଅଭାବରୁ ମିଶି ପାରୁନାହିଁ । ତେବେ ଆମକୁ ଦଳମତ ନିର୍ବିଶେଷରେ ଏକାଠି ହୋଇ ଜିଲ୍ଲାରେ ହେଉଥିବା ଖଣୀ ଦୁର୍ନୀତି ଉପରେ ସ୍ବର ଉଠାଇବାକୁ ହେବ ।" ତେବେ ସାଂସଦ ଅପରାଜିତା ଷଡ଼ଙ୍ଗୀ ଏହି ଭବ୍ୟ ସ୍ବାଗତ ପାଇଁ ସମସ୍ତଙ୍କୁ ଧନ୍ୟବାଦ ଜଣାଇଥିଲେ ।
ଇଟିଭି ଭାରତ, ଯାଜପୁର
