ଯାଜପୁର: ଦାଉ ସାଜିଛି ପ୍ରକୃତି । ଫନି ପରେ ସତେଯେମିତି କୋପ କରିଛନ୍ତି ରୌଦ ଦେବ । ଅସମ୍ଭାଳ ତାତି ସାଙ୍ଗକୁ ଗୁଳିଗୁଳିରେ ଛପପଟ ହେଉଛନ୍ତି ଯାଜପୁରବାସୀ । ପ୍ରତିଦିନ ତାପମାତ୍ରା 40 ଡିଗ୍ରୀ ରହୁଥିବାବେଳେ ଦିନ 10ଟା ପରେ କେହି ବାହାରକୁ ପାଦ କାଢି ହେଉନାହିଁ । ମଧ୍ୟାହ୍ନ ସମୟରେ ଶୂନଶାନ ହୋଇଯାଉଛି ରାସ୍ତା ଘାଟ । ତେବେ ଏଭଳି ଅସହ୍ୟ ଗରମ ହେଉଥିବାବେଳେ ଜନଗହଳି ସ୍ଥାନରେ ନାହିଁ ଜଳଛତ୍ର । ଯାହାକୁ ନେଇ ଦେଖାଦେଇଛି ଅସନ୍ତୋଷ ।
ସପ୍ତାହେ ଧରି ଜିଲ୍ଲାରେ ତାପମାତ୍ରା 40 ଡିଗ୍ରୀ ଉପରେ ରହୁଥିବାବେଳେ ଲୋକେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି । ଅସହ୍ୟ ଗରମରୁ ରକ୍ଷା ପାଇବା ପରେ ଲୋକେ ପଇଡ଼ ଦୋକାନ ଓ ଆଖୁରସ ଦୋକାନରେ ଭିଡ ଜମାଉଛନ୍ତି । କିନ୍ତୁ ଜନାକୀର୍ଣ୍ଣ ସ୍ଥାନରେ ତଥା ବସ ଷ୍ଟପ ଓ ସରକାର ଭାବେ ଜଳଛତ୍ର କିମ୍ବା ଯାତ୍ରୀ ବିଶ୍ରାମାଗାର ବନ୍ଦୋବସ୍ତ ନାହିଁ । ସେପଟେ, ସକାଳୁଆ ଅଫିସ ହୋଇନଥିବାରୁ ଲୋକେ ପ୍ରବଳ ଖରାରେ ଅଫିସ କାମ କରିବାକୁ ବାଧ୍ୟ ହେଉଛନ୍ତି ।
ସେହିପରି, ସହରର ରେଳଷ୍ଟେସନର ଅବସ୍ଥା ମଧ୍ୟ ନ କହିଲେ ଭଲ । କେବଳ ସ୍ଥାନୀୟ ବାସିନ୍ଦା ନୁହଁନ୍ତି, ଦୂରଦୁରାନ୍ତରୁ ଆସୁଥିବା ରେଳଯାତ୍ରୀ ଅସହ୍ୟ ଗରମରେ ଯନ୍ତ୍ରଣା ଭୋଗୁଛନ୍ତି । ତେବେ ଜିଲ୍ଲାରେ ଆଗକୁ ମଧ୍ୟ ଏପରି ପାଣିପାଗ ରହିବାର ଆଶଙ୍କା ରହୁଥିବାରୁ ପ୍ରଶାସନ ପକ୍ଷରୁ ଦିନ 12ରୁ 3 ଟା ପର୍ଯ୍ୟନ୍ତ ଘରୁ ନ ବାହାରିବାକୁ ପରାମର୍ଶ ଦିଆଯାଇଛି । ଏଥିସହ ସମ୍ଭାବ୍ୟ ଅଂଶୁଘାତ ଘଟଣାକୁ ରୋକିବା ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟରେ ସ୍ବତନ୍ତ୍ର ୱାର୍ଡ ଖୋଲାଯାଇଛି । ଶିଳ୍ପାଞ୍ଚଳ ସହିତ ବାହାରେ କାମ କରୁଥିବା ଶ୍ରମିକଙ୍କୁ ମଧ୍ୟ ଖରାତରାରେ କାମ ନ କରିବାକୁ ନିର୍ଦ୍ଦେଶ ଦିଆଯାଇଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
