ଯାଜପୁର: ପ୍ରଧାନମନ୍ତ୍ରୀ ଆବାସ ଯୋଜନାରେ ବ୍ୟାପକ ଜାଲିଆତି । ଲାଞ୍ଚ ନ ଦେଲେ ହିତାଧିକାରୀଙ୍କୁ ମିଳୁନି ଘର । ଜଣକ ନାଁରେ ଆସିଥିବା ଘର ଆଉଜଣକୁ ମିଳୁଛି । ଏପରିକି ତରବରିଆ ଭାବେ ଗୃହ ନିର୍ମାଣ ଶେଷ କରାଯାଇ ରାତି ଅଧିଆ ସଂପୃକ୍ତ ବ୍ୟକ୍ତିଙ୍କୁ ବିଲ୍ ମଧ୍ୟ ପଇଠ ହୋଇସାରିଛି । ଏଭଳି ଏକ ଦୁର୍ନୀତି ସାମ୍ନାକୁ ଆସିଛି ଯାଜପୁର ଜିଲ୍ଲା ମୁକୁନ୍ଦପୁର ଗାଁରେ । ମୁକୁନ୍ଦପୁରର ଶ୍ରୀଧର ଦାସ ନାମକ ଜଣେ ହିତାଧିକାରୀଙ୍କ ନାଁରେ ଆସିଥିବା ଘର ଆଉ ଜଣେ ବ୍ୟକ୍ତିଙ୍କୁ ମିଳିଛି । ସରକାରୀ ଓ୍ବେବସାଇଟରୁ ଏହା ଜଣାପଡିବା ପରେ ଆବେଦନକାରୀ ଜିଲ୍ଲା ପ୍ରଶାସନର ଦ୍ବାରସ୍ତ ହୋଇଛନ୍ତି । ଏହି ଘଟଣା ଧରାପଡିବା ପରେ ବିଭାଗୀୟ ଅଧିକାରୀଙ୍କ ବୁଦ୍ଧି ହଜି ଯାଇଛି ।
ସୂଚନା ମୁତାବକ, ମୁକୁନ୍ଦପୁର ନିବାସୀ ଶ୍ରୀଧର ଦାସଙ୍କ ଘର ଖଣ୍ଡେ ନ ଥିବାରୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ ନିର୍ମାଣ ପାଇଁ ଆବେଦନ କରିଥିଲେ । ସମସ୍ତ କାଗଜପତ୍ର ଦାଖଲ କରି ଯୋଗ୍ୟ ବିବେଚିତ ହେବା ସହ ଶ୍ରୀଧରଙ୍କ ନାମ ହିତାଧିକାରୀ ତାଲିକାରେ ଆସିଥିଲା । ପରେ ତାଙ୍କ ନାମରେ ଆସିଥିବା ଘର ତିଆରି ପାଇଁ ଅର୍ଥ ମଧ୍ୟ ମଞ୍ଜୁର ହୋଇଥିଲା । ହେଲେ ଲାଞ୍ଚ ନ ଦେବାରୁ ତାଙ୍କୁ ଘର ମିଳିଲା ନାହିଁ । ବରଂ ରାତି ଅଧିଆ ଜାଲିଆତି କରି ଘରଟି ସମାନ ନାଁ ଥିବା ଆଉ ଜଣେ ବ୍ୟକ୍ତିଙ୍କୁ ପ୍ରଦାନ କରାଯାଇଛି । ତେବେ କାଗଜପତ୍ରରେ ବାପା ନାଁ ଓ ପ୍ରମାଣଗତ କାଗଜପତ୍ର ଅଲଗା ଥିଲେ ମଧ୍ୟ ଅନ୍ୟ ଏକ ବ୍ୟକ୍ତିଙ୍କୁ କିପରି ଘର ମିଳିଲା, ସେନେଇ ସାଧାରଣରେ ପ୍ରଶ୍ନ ଉଠିଛି । ସରକାରୀ ଓ୍ବେବସାଇଟରୁ ଏହି ଜାଲିଆତି ସଂପର୍କରେ ଜଣାପଡିବା ପରେ ପ୍ରକୃତ ହିତାଧିକାରୀ ଆଇନର ଆଶ୍ରୟ ନେବା ସହ ବରିଷ୍ଠ ପ୍ରଶାସନିକ ଅଧିକାରୀଙ୍କ ନିକଟରେ ଅଭିଯୋଗ କରିଛନ୍ତି । ଦୁର୍ନୀତିରେ ସଂଶ୍ଲିଷ୍ଟ ଅଧିକାରୀ ଓ କର୍ମଚାରୀଙ୍କ ବିରୋଧରେ ଦୃଢ କାର୍ଯ୍ୟନୁଷ୍ଠାନ ନେବାକୁ ଦାବି ଜଣାଇଛନ୍ତି ଶ୍ରୀଧର । ନଚେତ୍ ସେ ପରିବାର ଧର ବ୍ଲକ ଏବଂ ଜିଲ୍ଲାପାଳଙ୍କ ଅଫିସ ଆଗରେ ଧାରଣାରେ ବସିବାକୁ ଚେତାବନୀ ଦେଇଛନ୍ତି ।
