ଯାଜପୁର: ରାଜ୍ୟରେ ଲଘୁଚାପ ଜନିତ ବର୍ଷା ଜାରି ରହିଛି । ଏହି କ୍ରମରେ ଯାଜପୁରରେ ଲଗାଣ ବର୍ଷା ଜାରି ରହିଛି । ଉପରମୁଣ୍ଡରେ ପ୍ରବଳ ବର୍ଷା ଯୋଗୁଁ ବୈତରଣୀ ନଦୀର ଜଳସ୍ତର କ୍ରମାଗତ ଭାବରେ ବୃଦ୍ଧି ପାଇବାରେ ଲାଗିଛି । ଫଳରେ ଶାଖା ନଦୀ କାଣୀନଦୀର ଜଳସ୍ତର ବି ବଢୁଛି । ଏହାଦ୍ୱାରା ଯାଜପୁର ଦଶରଥପୁର ବ୍ଲକର କଣ୍ଟାପଡା ଅଞ୍ଚଳ ସବୁଠାରୁ ଅଧିକ ପ୍ରଭାବିତ ହୋଇଛି । କଣ୍ଟାପଡା ପୋଲ ଠାରୁ ମାତ୍ର ୫ ମିଟର ମଧ୍ୟରେ ଏକାଧିକ ସ୍ଥାନରେ ଘାଇ ସୃଷ୍ଟି ହୋଇଛି । ଚଳିତ ବର୍ଷ ମଧ୍ୟ ଅତ୍ୟଧିକ ବନ୍ୟାଜଳ ଓ ଦୁର୍ବଳ ନଦୀବନ୍ଧ ଯୋଗୁଁ ବିଳମ୍ବିତ ରାତିରେ ପ୍ରାୟ ୫୦ ଫୁଟର ଘାଇ ସୃଷ୍ଟି ହୋଇଥିବା ଦେଖାଯାଇଛି ।
ବନ୍ୟାପାଣି ଆସିବା ଫଳରେ ଗୋଟିଏ ବାଲିବସ୍ତା ବୋଝେଇ ଟ୍ରକ ମଧ୍ୟ ପୋଲ ଉପରେ ଓଲଟି ପଡିଥିବା ଦେଖିବାକୁ ମିଳିଛି । ଦୁର୍ବଳ ନଦୀବନ୍ଧ ଯୋଗୁଁ ଗତ ୬ ବର୍ଷ ମଧ୍ୟରେ ଏଠାରେ ୪ ଥର ଘାଇ ସୃଷ୍ଟି ହେଲାଣି । ତଥାପି ମରାମତି ଅତି ଦୁର୍ବଳ ରହୁଥିବାରୁ ଏବଂ ନିମ୍ନମାନର କାମ କାରଣରୁ ବାରମ୍ୱାର ଘାଇ ସୃଷ୍ଟି ହେଉଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକ ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
