ଯାଜପୁର: ବ୍ୟାସନଗର ପୌରପରିଷଦ ସ୍ଥିତ ଶଶୀଭୂଷଣ ମହିଳା ବିଦ୍ୟାଳୟ ନିକଟରେ ରାସ୍ତା ନିର୍ମାଣ ବେଳେ ଭାଙ୍ଗିଲା ସ୍କୁଲ ପାଚେରୀ । ପାଚେରୀ ଭାଙ୍ଗିବା ପରେ ସେହୁ ରାସ୍ତାା ଦେଇ ଯାଆସ କରୁଥିବା ଯାତ୍ରୀ ଅଳ୍ପକେ ବର୍ତ୍ତି ଯାଇଛନ୍ତି । ସୂଚନାନୁଯାୟୀ ବ୍ୟାସନଗର ପୌରପରିଷଦ କାର୍ଯ୍ୟାଳୟର ଅନୁମୋଦନ କ୍ରମେ ଏହି ରାସ୍ତା କାମ ଗତ 4 ଦିନ ଧରି ଚାଲିଛି । ଗୌରୀଶଙ୍କର ସେଠୀ ନାମକ ଜୈନିକ କଣ୍ଟ୍ରାକ୍ଟର ଏହି କାର୍ଯ୍ୟ କରୁଥିବା ଜଣାପଡିଛି । ତେବେ ଏହି ରାସ୍ତା ନିର୍ମାଣ ପାଇଁ ରାସ୍ତାର ଦୁଇ ପାର୍ଶ୍ୱ ଖୋଲା ଯାଇଥିଲା । ଯାହାକି ସ୍କୁଲ ପାଚେରୀ ଉପରେ ପ୍ରଭାବ ପଡିଥିଲା । ଯାହାଫଳରେ ଆଜି ସ୍କୁଲ ପାଚେରୀ ଭାଙ୍ଗି ଯାଇଥିବା ଜଣାପଡିଛି । ସୌଭାଗ୍ୟ ବଶତଃ ସେହି ବାଟ ଦେଇ ଯାଉଥିବା କୌଣସି ଲୋକଙ୍କର କ୍ଷତି ହୋଇନଥିବା ଜଣାପଡିଛି ।
ତେବେ ପାଚେରୀ ଭାଙ୍ଗିବା ଫଳରେ ସେହି ରାସ୍ତା ଦେଇ ଯିବା ଆସିବା ପାଇଁ ଲୋକେ ନାହିଁ ନଥିବା ହଇରାଣ ହରକତ ହେଉଥିବା ଦେଖିବାକୁ ମିଳିଛି । ଏଥିସହିତ ତୁରନ୍ତ ସ୍କୁଲ ପାଚେରୀ ନିର୍ମାଣ ପାଇଁ ସ୍ଥାନୀୟ ବାସିନ୍ଦା ମଧ୍ୟ ଦାବି କରିଛନ୍ତି । ସେପଟେ ରାସ୍ତା ନିର୍ମାଣ କାର୍ଯ୍ୟ କରୁଥିବା ନିର୍ବାହୀ ଅଧିକାରୀଙ୍କ କୌଣସି ପ୍ରତିକ୍ରିୟା ମିଳିପାରିନାହିଁ ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
