କଟକ: ଆଜି ଅନ୍ତର୍ଜାତୀୟ ଭିନ୍ନକ୍ଷମ ଦିବସ । ଅଦମ୍ୟ ଇଚ୍ଛା ଶକ୍ତି ଥିଲେ ଆସେ ବଡ଼ ସଫଳତା । ପଙ୍ଗୁ ମଧ୍ୟ ଗିରି ଲଂଘେ । ସେ ଯେ କୌଣସି ପରିସ୍ଥିତି ହେଉନା କାହିଁକି, ଦୃଢ଼ ମନୋବଳକୁ ପାଥେୟ କରି ଆଗେଇ ଚାଲିବା ଦ୍ୱାରା ଜୀବନରେ ଦେଖିଥିବା ସ୍ୱପ୍ନକୁ ମଣିଷ ହାସଲ କରିଥାଏ । ଏହି ଅବସରରେ କଟକରେ ଥିବା 'ସହାୟ' କେନ୍ଦ୍ରରେ ଅନ୍ତର୍ଜାତୀୟ ଭିନ୍ନକ୍ଷମ ଦିବସକୁ ବେଶ ଆଡ଼ମ୍ବର ସହ ପାଳନ କରାଯାଇଛି ।
- ପାଳନ ହେଲା ଆନ୍ତର୍ଜାତୀୟ ଭିନ୍ନକ୍ଷମ ଦିବସ :
'ସହାୟ' କେନ୍ଦ୍ରରେ ଥିବା ୧୦୦ରୁ ଊର୍ଦ୍ଧ୍ବ ଦିବ୍ୟାଙ୍ଗ ଛାତ୍ରଛାତ୍ରୀ ସେମାନଙ୍କ ବୌଦ୍ଧିକ ବିକାଶର ପଦର୍ଶନ କରିଛନ୍ତି । କି’ଏ ନାଚି-ଗାଇ ବେଶ ଆନନ୍ଦ ଅନୁଭବ କରୁଛି, ତ ଆଉ କିଏ ଚିତ୍ରାଙ୍କନ, ଯୋଗ ଏବଂ ହାତରେ ମେହେନ୍ଦୀ କରି ଏହି ଦିବସକୁ ପାଳନ କରିଛନ୍ତି । ହୁଏତ ଏମାନେ ମାନସିକ, ଶାରୀରିକ ସ୍ତରରେ ଅକ୍ଷମ କିନ୍ତୁ ସେମାନେ ଆଗମୀ ଦିନରେ ସମାଜରେ ସ୍ୱତନ୍ତ୍ର ପରିଚୟ ସୃଷ୍ଟି କରିବା ପାଇଁ ଜାରି ରଖିଛନ୍ତି ପ୍ରୟାସ । ତେବେ 'ସହାୟ' କେନ୍ଦ୍ରରେ ଏହି ବିଦ୍ୟାର୍ଥୀମାନଙ୍କୁ ଯୋଗ ଶିକ୍ଷା, ପାଠ୍ୟକ୍ରମ, ସଙ୍ଗୀତ, ନୃତ୍ୟ ଏବଂ ଚିତ୍ରକଳା ଇତ୍ୟାଦି ପ୍ରଶିକ୍ଷଣ ଦିଆଯାଏ । ଏହି ପିଲାମାନଙ୍କର ମଧ୍ୟରେ ସର୍ବାଙ୍ଗୀନ ବିକାଶ କରିବା ଏହି ଅନୁଷ୍ଠାନର ମୁଖ୍ୟ ଲକ୍ଷ୍ୟ ।
- ଏମତି କହିଲେ ଅଭିଭାବକ:
ଯେତେବେଳେ ଏଭଳି ଦିବ୍ୟାଙ୍ଗ ପିଲାମାନେ ମାଆ ଗର୍ଭରୁ ଜନ୍ମ ନିଅନ୍ତି ସେହି ସମୟରେ ତାଙ୍କୁ ନେଇ ପରିବାର ଖୁସି ମନେଇବା ଅପେକ୍ଷା ଦୁଃଖରେ ବୁଡି ରହୁନ୍ତି । କାହିଁକି ନା ସମାଜରେ ସେମାନେ ନିଜକୁ ପ୍ରତିଷ୍ଠିତ କରିବାରେ ସମ୍ପୂର୍ଣ୍ଣ ବିଫଳ ହେବାର ଭୟ ପିତାମାତା ମାନଙ୍କର ରହିଥାଏ । ତେଣୁ ବୋଝ ଉପରେ ନଳିତା ବିଡା ଅର୍ଥାତ ଦୁଃଖ ଉପରେ ଦୁଃଖକୁ ସାରା ଜୀବନ ଭୋଗିବା ପାଇଁ ମନସ୍ତ କରି ନେଇଥାନ୍ତି । କିନ୍ତୁ ବର୍ତ୍ତମାନ ସମୟରେ ସରକାରଙ୍କ ବିଭିନ୍ନ ଯୋଜନା ବଳରେ ଦିବ୍ୟାଙ୍ଗ ସବୁ ଦିଗରେ ସକ୍ଷମ ବୋଲି କହିଛନ୍ତି ଅଭିଭାବକ ।
ତେବେ ଗୋଟିଏ ଦିନ ନୁହେଁ ବରଂ ଏମାନଙ୍କ ପାଇଁ ପ୍ରତିଦିନ ଆନନ୍ଦ ଉଲ୍ଲସ ଦିନ ହୋଇ ପାରିଲେ ସେମାନେ ଦେଖୁଥିବା ସବୁ ସ୍ୱପ୍ନ ପୂର୍ଣ୍ଣ ହୋଇପାରିବ । କେହି କେହି ପିଲା ପୋଲିସ, ଡାକ୍ତର ଓ ଅଫିସର ହେବା ପାଇଁ ଲକ୍ଷ୍ୟ ରଖିଛନ୍ତି । ଏଥିରୁ ସ୍ପଷ୍ଟ ଯେ ସେମାନେ ଭିନ୍ନକ୍ଷମ ହୋଇପାରନ୍ତି ହେଲେ, ଜୀବନର ସ୍ୱପ୍ନ ସାକାର ଦିଗରେ ସକ୍ଷମ । ଏନେଇ ଦିବ୍ୟାଙ୍ଗ ଶିଶୁମାନଙ୍କ ଯୋଗ ପ୍ରଶିକ୍ଷକ ସତ୍ୟଭାମା ରଥ କହିଛନ୍ତି,‘‘ ଯେଉଁମାନେ ମାନସିକ ବିକାରଗ୍ରସ୍ତ ରହିଛନ୍ତି ତାଙ୍କୁ ଯୋଗ ବଳରେ ସୁସ୍ଥ କରାଯାଇପାରିବ ।’’
ଇଟିଭି ଭାରତ, କଟକ
