ଯାଜପୁର: ଆଲୋକର ପର୍ବ ଦୀପାବଳି, ଅନ୍ଧାର ଉପରେ ଆଲୋକର ପର୍ବ ଏହି ଦୀପାବଳି । ପ୍ରଭୁ ରାମଚନ୍ଦ୍ର ଅଯୋଧ୍ୟାରୁ ବନବାସ ସାରି ଆଜିର ଦିନରେ ଫେରିବା ଖୁସିରେ ଏହି ପର୍ବ ପାଳନ ହେବାର ବିଶ୍ବାସ ରହିଛି । ଏନେଇ ସନ୍ଧ୍ୟାରୁ ପ୍ରତ୍ୟେକଙ୍କ ଘର ଅଗଣାରେ ଜଳିଛି ଦୀପ। ସାଥୀରେ ରଙ୍ଗ ବେରଙ୍ଗର ବାଣ ଫୁଟାଇ ଏହି ପର୍ବକୁ ପାଳନ କରିଛନ୍ତି ସଭିଏଁ ।
ବାଣ କିଣିବା ପାଇଁ ସମସ୍ତଙ୍କ ମନରେ ପ୍ରବଳ ଉତ୍ସାହ । ଗତ ଦୁଇ ତିନି ଧରି ଲଗାଣ ବର୍ଷା ଫଳରେ ବାଣ ବେପାର ସମ୍ପୂର୍ଣ୍ଣ ମାନ୍ଦା ହୋଇ ପଡିଥିବା ବେଳେ ଶନିବାର ରାତିରୁ ପାଗ ଅନୁକୂଳ ହେବା ପରେ ବାଣ ଦୋକାନରେ ଗ୍ରାହକଙ୍କ ପ୍ରବଳ ଭିଡ ଦେଖିବାକୁ ମିଳିଛି । ଯାଜପୁର ବାଳାଶ୍ରମ ବ୍ୟାସନଗରର ଷ୍ଟାଡିୟମ ପଡିଆରେ ଖୋଲା ଯାଇଛି ବାଣ ବଜାର । ଯେଉଁଠିକୁ ପରିବାର ପାଇଁ ସମସ୍ତେ ଛୁଟି ଆସୁଛନ୍ତି ବାଣ କିଣିବା ପାଇଁ।
ତେବେ ଶବ୍ଦ ସୃଷ୍ଟିକାରୀ ବାଣ ବିକ୍ରି ଉପରେ କଟକଣା ଜାରି ହୋଇଥିବାରୁ କେବଳ ଝରଝରି, ଧପଧପି ବାଣ କିଣିବା ପାଇଁ ଗ୍ରାହକଙ୍କ ବିଶେଷ ଆଗ୍ରହ ଦେଖିବାକୁ ମିଳିଛି। ଛୋଟ ପିଲାଙ୍କ ଠାରୁ ଆରମ୍ଭ କରି ବୟସ୍କଙ୍କ ପାଇଁ ସ୍ବତନ୍ତ୍ର ବାଣ ରହିଥିବାରୁ ବାଣ ଦେକାନରେ ଭିଡ ଲକ୍ଷ୍ୟ କରାଯାଇଛି । ତେଣେ ରବିବାର ବାଣ ବ୍ୟବସାୟର ଶେଷ ଦିନ ହୋଇଥିବାରୁ ଭଲ ବ୍ୟବସାୟ ହେବାର ଆଶା କରିଛନ୍ତି ବ୍ୟବସାୟୀ ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
